1 Pit. 3
3
Nuatnaikiaru itiur túratniuit
1-2Tuma asamtai nuwa̱tiram atumí aishri̱ umirkatarum. Amesha péṉker Yus umirka weká asakmin áishrum Yus chichaman umirchaitiat ame túramurmin nekáa ámeka chichaatsmini̱ṉ nisha Yus shuar ajastinian wakerittiawai. 3Nu asamtai aya pátatek iwiarmampratniusha ti enentáimtusairap. Intiash tí peṉker iwiaratniusha, kuriji̱a̱i̱ iwiarmampratniusha, pushí tí kuitji̱a̱i̱ entsartincha ti enentáimtusairap. 4Antsu “nekas shíirmach ajastaj” tákumka enentáimin “shiir kajechu átaj” tu enentáimsatarum. Nuka sakarchattawai. Kame Yúsja̱i̱ṉkia nu timiá peṉkeraiti. 5Yaunchu núnisaraṉ nuwa̱ Yusan enentáimtusarmia nu, tura Yusan shiir enentáimtikratniun wakeriarmia nu, ni áishri̱n umirkar nuja̱i̱ ni enentái̱n shíirmach ajasár pujuarmiayi. 6Atumí we̱a̱tri̱ Sara ni áishri̱n Aprajáman umirmiayi. Umirin asa “winia uuntru” nin tíniuyayi. Atumsha péṉker túrakrumka tura sapijmiatsuk wekaakrumka, Saraja̱i̱ métek átatrume.
7Tura áishmaṉtirmesha Yus wakerana nu nekaarum atumí nuwe̱ shiir enentáimtusrum tsaniṉtarum. Nuwemsha, nuwa̱ asa, áishmaṉja̱i̱ métek katsuntrachminiaiti. Tura nisha ámiji̱a̱i̱ métek Yusa waitnenkartutariji̱a̱i̱ tuke iwiaaku átinian takusminiaiti. Tu enentáimta asam ame núwem shiir enentáimtusta. Yus áujkuram itiurchat atsutí tusarum túratarum.
Yusai̱ péṉker wekasatin
8Nuya̱sha ashí Yus shuartirmin tájarme, aya chikichík enentaik atí. Waitnennairatarum. Nekas yátsum aneam núnisrumek anenaitiarum. Aya áminiuk enentáimtutsuk chikichan yáiṉtaj tu enentáimsatarum. 9Yajauch turamainiakuisha “yapajkiataj” tiirap. Katsekramainiakuisha “íkkiataj” tiirap. Antsu “Yus winia shiir awajtúsuiti” tu enentáimsarum yajauch turamainiana nu péṉker awajsatarum. 10-12Yus chichamnum jú̱nis aarma asamtai nu túratarum
“Uunt Yus péṉker wekaana nuna wainiui tura ni áujmancha ántawai.
Tura yajauchin túrana nuna nakitrawai.
Tuma asamtai shiir pujustaj tákuṉka
tura tuke tsawant warastinian wakerana nuka yajauch chichaka̱i̱j
tura waitruawa̱i̱j tusa péṉker íimiasti.
Tunaanumia̱ kanakí̱ péṉkeran túrati.
Nekas enentáiji̱a̱i̱ shiir átinian e̱a̱ktí.” YKan. 34:12-16; 37:27
Itiurchat ai̱ṉ péṉker túratin
13¿Yaki yajauch túrutmat péṉker turamnisha? 14Túrasha péṉker túrayatmek wáitiakminkia Yus shiir enentáimtikramprattarme. Tuma asamtai ashamkartutsuk sapijmiatsuk wekasatniuitrume. Isa. 41:10-14; Mat. 5:10 15Tura “Kristu winia úuntruiti” tu enentáimtustarum. Tura “¿urukamtia Yus shuar ajasuítiam?” turamainiakuisha, péṉker aimkiamnium iwiarnarum pujustarum. Waantu enentáimtumatsuk nin péṉker enentáimtikrataj tusam túrata. 16“Yusja̱i̱ péṉker wekasataj” tu enentáimsarum wekasatarum. Yus shuar asakrumin chíkich shuar ántrar áujmatramainia nu ni ántar áujmatramsamun nekaawar natsa̱a̱rarat tusarum Yusja̱i̱ péṉker wekasatarum. 17Yajauch túrakur wáitsatniuja̱i̱ṉkia naṉkaamas, Yus wakerakuiṉkia péṉker túrakur wáitsatniuka tí peṉkeraiti.
18Kristu ii tunaari̱n asakártaj tusa jarutramkamiaji. Ashí asakárma asamtai atak tunaan jarukchatniuiti. Nisha tunaan peṉké túrichuitiat ii tunáa asakrin Yusai̱ ejetamtai tusa wáitrutmasmiaji. Aya̱shi̱i̱nkia jakayat ni wakaní̱ji̱a̱i̱ ni aya̱shi̱ ataksha iwiaaku ajasmiayi. 19Ni wakaní̱ji̱a̱i̱ jakáa wakaní̱n emetamu armia nuna etserkataj tusa wémiayi.Naṉ. 6:1-4; 2 Pit. 2:4; Jut. 1:6 20Nusha yaunchu Nuwái uunt kanun nájanuk siantu painti uwí pujurmia nui̱ Yuska umirtukarat tusa ti nákamaitiat Nuwái étserman umikcharmiayi. Nú kanunmasha ishichik, uchu aents kanunam pujuinian yumiji̱a̱i̱ uwemtikrarmiayi. 21Nu yumi Yus shuarti imiantinian nakumui. Ii aya̱shi̱ chamir awajsatai tusar imiantsuji. Antsu ii enentái̱ péṉker atí tusar Yus sear imianji. Nuja̱i̱ iisha uwemji. Jesukrístu nantakin asamtai nuja̱i̱ uwempraitji. 22Tura Nisha nayaimpiniam we akupin pujutai̱nium Yusa untsuurí̱ni̱ apujsamuiti. Túramtai nayaimpinmaya̱ suntarsha tura ashí kakaram akupin áiniana nusha Jesukrístun umirainiawai.
Currently Selected:
1 Pit. 3: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.