TANIELE 2 1

Na Mane haoru gi oru

1Na mane haoru gi oru o Hanania, o Misaele mo Asaria, na maneraha o Nebukanesa ki bani kasira igê na baga gi raha, ngaira ka arârâ ma igê na vavatana na gi. Ngaira ka kiria na Araha ma ka hagarahasia. 2Ma i ngekana i rarona na gi o Asaria ki ura so haritagi igê, ma ki nunginungi raha, ki vi: 3“Araha, God iata na êvarimami, igami kami hagarahasigo ma kami rahesigo. Na atamu ki rongo raha tare, ki bê ki arâ. 4Igo ko katogami surigi na tauhamami. Na tauhamu hato ka koro ma ka oto tare. Na suriha iamu ma na tarani, go katogami renigi, ka râ suria na monariha. 5I oto na tauhamu, matena go hagaitangigami, igami ma na ai i Jerusaleme, na hinua raha apuna iata na êvarimami. Na hagaitangiha ngekana ki ararigami, suria mi bagatauhamami. 6Igami kami haritohego ma kami murisigego. Igami kami aharêngigi na ara ni ramata iamu. 7Igami kami pe râ surigi na ramata iamu tangagami. Manga vi igami, ma kami têgi na ramata, vikê igami kami oga igê na ramana. 8Ma vi na ta nikâ? Na suriha iamu ma na hagaitangiha, go vategami, ka monari ga ararigami. 9Igo ko tagarenigami tangara na merongamami, ga pe botage renigi na ramata ma ka haritohego ngavê, ma ka mego hetehateha, ma ko tagarenigami tanga na maneraha, i erataga ngavê, ma ki mareha rârâ i pasina na otoha. 10Igami na kariamu mi rahesigo, igami kami muni ma, suria mi maki. Na makiha ki nahuigami ngavê.

11Siana ko kasi renigami hagetage, i era ma ki pe rongo raha na atamu. Siana ko aharêngia na suruheri iamu henigami. 12Gu ama ni takigami nga hete. Gu hagamonarigi na suruha iamu tanga o Abaramo, na ani go takuia bâraha, ma tanga o Isako na kariamu, ma tanga o Jakobo na êvarita na Isiraelita, i oto na parongana i maamu. 13Igo ko suru tangara, hanana vigo hagarakonira na raraha iata mangagi na higu i vavearo, se na one i one. 14Ma i ngekê, Araha, igami kami pe rako. Na enoni, naka ma i na ani mavê na agua, ngaira ka rako teharigami. Naka ma i he, na enoni ka kitenigami. Igami kami maki ngavê renigi na bagatauhamami. 15I ngekê igami kami pe nahunira rârâ na maneraha, se vi na poropete, se na enoni vige bêngenigami. I ngekê ki mareha rârâ na Ruma ni Rotu, hanana vigami susu tangago, se mi vogasigo, se vigami tagarenigi na ngauha tangago, se vigami hagahigasigo renigi na marâ i sigini koro. I mareha rârâ ta agua, hanana vigami rahesigo igê, hanana vigu takuigami. 16Gu aganarigami, suria mi angitenigi na tasi iamami, ma kami tangahurigami. Gu aganarigami nga tagenana manga i nago, matena mi susu tangago renira na sipi mane, na puruka mane, ma renira rako na rehagaro na kareta na sipi. 17Ngaia getea ma na angiteniha iamami ka na vogasiha iamami tangago i ngekê. I bara vi tani râ nikâ. Gu aganaria, hanana mi têtê viteamu i mêrihamami hagenani. Na enoni, i hagêguri togo renigo, ki asa vige bagahagêguri. 18Igami kami suru i mêrihamami hagenani, hanana vigami tototo surigo, kami rahesigo ma kami avarasigo. 19Siana ko hagamakigami. Gu tamanigami ma ko takuigami hete. 20Araha, gu katogi na mena, hanana mi tahi, ke rongo raha na atamu.

21Gu katora na enoni hato, ga hagamamasiaga apemami, ke maki ma ke ape ruruhi. Gu hatungigi râ na ramoha ma na arahanga tenira. Gu hagavotarira. 22Gu katora, ke tahetara renigo, vi igo getego ma ka na Araha God, go marungia na maveta hagenani, suria go raramohaga hunigo.”

23Na kariana na maneraha, ga kasira so na mane haoru gi oru igê na baga gi raha, ngaira ka ama ni bugua nga na gi renigi na oile, na mangate, na asire i maria, ma na ehogoni na ario. 24Na vavatani ki akê na vearina gi rua, 25ma ki tataka ma ki hagamakakara na ai ni Babilone, ga ura rihia na gi. 26Ma na angero iana na Araha ki vato so me i pasita o Asaria ma na tamana gi rua, ga oga igê na gi. Ngaia ki panegenigi râ hegitigi na vavatani, 27hanana i magarohaga na rarona na gi. Na gi ki pe ngêra rârâ na vera oru agana. Ngaira ka pe hatamia rârâ vi na kere mamasiaganiha sisite.

Na ki iata na mane haoru gi oru

28Hoi, igê na rarona na gi ngaira na vera oru ka haganega ka ki. Ngaira ka hagarahasia ma ka visia koro God, ka vi:

29“Ge visigo raha Araha God iata na êvarimami.

Ge hagarahasigo tare, ki bê ki arâ.

30Ge hagahigasia na atamu apuna, ke rongo raha.

Ge hagarahasigo tare, ki bê ki arâ.

31Ge visigo raha i Ruma Apuna iamu.

Ge hagarahasigo tare, ki bê ki arâ.

32Ge visigo raha igê na atohamu i avorata na angero.

Ge hagarahasigo tare, ki bê ki arâ.

Ge visigo raha, go bâ so tararugi na rutuni hato.

Ge hagarahasigo tare, ki bê ki arâ.

33Ge visigo raha renia na arahanga iamu.

Ge hagarahasigo tare, ki bê ki arâ.

34Ge visigo raha renigi na marâ i vavearo.

Ge hagarahasigo tare, ki bê ki arâ.

35Visia raha na Araha, igamu na enoni ma na marâ hato.