SUSANA 2
2
1I ta na tangiana i Babilone ki oga igê ta na mane, ga hêtana vi o Joakimo. 2Kaniana kani ka Susana, ka karena o Hilikia. Ka Susana ngaia ka na gete i bâkoro era, ma ki toto suria maninga God. 3Na enana ka na Siu, garu oto suria maninga na rotu ma karu hagesuria ka kareterua, ki râ surigi na ramata igê na buka iana o Moise. 4O Joakimo, na mane iana ka Susana, ki ruruguha bâraha. Na baga mu raha ni mahe ma ni apinige, na agua tanga ga barebare igê ma ka hagamamava igê, ki rihia na ruma iana. Hagarako na ani getera na Siu ka hakuhaku i pasina o Joakimo, hanana ga mehetamatamasi, suria ga hagahigasia ngavê.
5I pe arihu râ, ma ka atererua na meraha gi rua i berarogata na enoni, hanana garu vora re na mane ni hagatamasiha. Ngaira ka na enoni, na ani na Araha ki bani tamasi renira, ki vi: “Na eraha ki haganega i Babilone, i pasita na meraha: na mane ni hagatamasiha i asa vige bêngenira bâkoro hete na enoni.” 6Na vererua ngegana karu arâ tare i ruma iana o Joakimo, na ruma ga hagatamasi tare igê. Ngaira hato, ga togâni na tarani ni hagatamasiha, ka arâ i ngekana.
7Igê na ara ni ritovagani, matena na enoni hato ka aporoporo i pasita tanga ga ngêngê, ka Susana ki arâ tare, ki barebare igê na mu ni mahe ngekana. 8I na ara ni tangiani na meraha gi rua ngegana karu gâga karia ma karu hahutugia, matena i arâ ma na matena i aporo me igê, suria garu tenia ngavê. 9Na teniha ki aharêsirerua ngavê. Tahema ngairerua karu pe botage renigi na hagarahenga ma na tagaraha iaterua, vigaru hagatamasi igê na otoha. 10Na ara ni hitangiterua ki tenia bâraha ka Susana, ma ngairerua karu maki, vigaru hagarongorerua heri, 11renigi na teniha era iaterua hegitigi. 12Vikana i na ara ni tangiani ngairerua karu ama ni hahutugia nga, hanana viga bâsia.
13I ta na ritovagana ngairerua karu hetamatamasi, karu vi: “Ge aporo, ke ngê.” 14Vikê ngairerua karu hura vê, ma karu râ hetatari. I pe arihu, ma na ara ni hitangiterua ki aporo me, hanana vi ahiahi, ki mama renia ka Susana. Ngairerua karu kakangi vê, ma karu hetarahu. Na ara ni hitangiterua ki hagatea tani ki vi: “Na ta go tabea me ikê?” Na ara ni hitangiterua ki tugupu. Tahema ngairerua karu hagarongorerua heri, vi ngairerua hato karu tenia ka Susana. Ngairerua karu harikato, vigaru naasia na matena, i araria, vigaru bâsia ngaia getea. 15Ngekana ngairerua karu naasia na matena, i araria.
Ta na tangiana ka Susana ki râ me nikâ i mu ni mahe, manga bani hanana i arâ. Na kere gete tagara gi rua kani ga tage râ. Suria i mahanaga bâraha, tahema ngaia ki tabe mamanuha. 16I ngekana ki mareha rârâ igê ta na enoni, nga noga ma na meraha gi rua ngegana, garu ahi, hanana garu kikirihia. 17Ka Susana ki hagatorarerua na kere gete tagara iana, ki vi: “Muru aporo, kamuru toregi me tangê na oile ni mamanuha ma na marâ ni sigini hagatê, suria inê kê obania be mamanu. Muru girara nga, kamuru purusia na teha raha tanga na mu ni mahe, i era ma ta na enoni ki bâsiê.” 18Ngairerua karu râ, ma karu purusia na teha raha, ma karu hura igê na kere teha sisite, karu pane hura tenia na mu ni mahe, hanana vigaru totora na marâ, garu tabegi. Ngairerua karu pe hagarererua na meraha ngegana, garu ahi.
19I pusina ma na kere gete tagara karu hura vê karu râ, na maneraha gi rua, garu ahi ngegana, karu gaha râ tanga ka Susana, karu vi: 20“Na teha ki purupuru. I asa ta na enoni, vige bâsigia. Igamirua kamuru tenia bâraha, vigamuru rongo era henigo. Gu aganarigamurua, kamuru megotâ. 21Manga i mareha, igamirua kamuru page torego igê na tamasinga, ma kamuru tohetohe, vi igamirua kamuru bâsigo, vigo hagatorangenirerua aporo na kere gete tagara iamu, ko oga getego, hanana vigo arâ henia na mane haoru.”
22Ka Susana ki manavasua raha, ki vi: “E, i bara tangê! Manga vigê aganarigamurua, inê kê page meme renia na gamogamoha. Manga vigê usisi, inê ki asa be tahi tenia na raramohamurua. 23Inê kê usi be rongogamurua, suria gê pe obania ve haritohea na Araha, be tasitasi, naka ma muru hagatoraiê.”
24Vikana ka Susana ki ngere raha ngavê, ma na meraha ngegana karu ngere hagatoraia, 25ma na hitangiterua ki tango tangagi na teha, ma ki tangahigi. 26Matena na enoni tagara, ga oga i ruma, ka rongoa na ngereha i mu, ngaira ka tango râ, ka banu igê na kere teha tanga na mu, hanana ga girara, vi na ta kani tarahua ka Susana. 27Na meraha gi rua ngegana karu hagatoraia ka Susana i maata na enoni tagara. Na enoni tagara ka gasuga ma ka maki, suria ka Susana ka pe rongoa rârâ henigi na tarani vigana.
28Igê na tangiana i muri me, matena na enoni ka haku nikâ i ruma iana o Joakimo, na meraha gi rua ngegana karu râ nogaterua. Ngairerua karu tako nga, vigaru katoa na katoha era iaterua, hanana vigaru suria bera ka Susana ki meme. 29I maata na enoni hato ngairerua karu vi: “Merâ me ka Susana, kaniana o Joakimo, ka karena o Hilikia.” 30Ngaira ka merâ me. Na enana, na karena ma na goana hato ka râ me henia.
31Ka Susana ki na gete koro ma ki bâkoro ngavê. 32Ngaia ki buhia na bêna ki so i maana renia na gahu, i vavararaga. Na meraha era ngegana karu haribona, ka tavoa râ na gahu tenia na bêna, hanana vigaru vagevagesia na bâkorohana. 33Na enana, na karena, na goana ma na enoni hato ka angi, matena ga bâsia vikana.
34Na meraha gi rua ni hagatamasiha ngegana karu aharaga akê i maata na enoni, karu tê buhia ka Susana, ma karu tuguria. 35Ka Susana ki angi, ma ki atakê, suria i hagêguri togo renia na Araha. 36Na meraha gi rua ngegana karu tamasihari suria vikê, karu vi: “Matena igamirua getegamirua kamuru barebare i mu ni mahe, na gete ngekê ki banu me henirerua na kere gete tagara gi rua iana. Ngaia ki purusia na teha raha, ma ki bonasirerua na kere gete tagara iana, karu aporo. 37Ma hemuri ta na mane haoru, i bani ahi i rarona na mu, ki vaga me, ma ki râ tanga, ki metâ. 38Igamirua kamuru oga igê na ariruguna na mu ni mahe, ma na matena muru bâsirerua vikana, igamirua kamuru tango râ i pasiterua. 39Igamirua kamuru bâsirerua, garu paronga iera. Igamirua kamuru uhungia, vigamuru taua na mane, ma ki bara, suria i ramo teharigamirua. Ngaia ki tango tanga na teha, ki tangahia, ma ki gava vê ki râ. 40Vikana igamirua kamuru têa na gete. Igamirua kamuru hagatea renia na mane, ma ngaia ki usi, vige hagarongogamirua renia. Igamirua kamuru tohe, vi na tamasinga iamirua ngekê ki monari.”
41Na enoni, ga haku i ngekana, ngaira ka tongesurirerua, suria ngairerua ka na enoni raha iata ma nikâ garu na mane ni hagatamasiha. Ngaira ka suria ka Susana, hanana vi meme.
42Ma ka Susana ki ngere, ki vi: “God, igo ko bani oga me ma ko gâga tare, ki bê ki arâ. I mareha rârâ ta na marâ, vige pinihi tenigo. Igo ko bani giraragi na ara ni marâ, i nago tarani i vora me. 43Bâ, inê kê sugi me. Igo ko girara, vi inê kê pe tugiê rârâ na tarana, garu visia. Igo ko girara, vi ngairerua karu hagatoraiê. I tanu hega kani vigê meme?”
44Na Araha ki aganaria na nungiha iana. 45Matena ga torea vê ka Susana, hanana viga nanahuia ki meme, God ki angaria ta na mane haoru, o Taniele na atana. 46Ngaia ki ngere raha, ki vi: “Inê kê usi hagetage, vi ve bâsia, mu nahuia ki meme.”
47Na enoni hato ka aharia, ka vi: “Suria i hega go vi vikana?” 48O Taniele ki ura i maata, ki vi: “Isiraelita, i hega, mu beka? I tanu hega kani mu suria purupuru na gete na Isiraelita? Tanu hega kani mu pe tarahua i nago, vi ngaia ki kato vikana monari? Igamu ki mareha ngavê, vigamu uhungia, hanana vigamu tarahua na ta ki monari! 49Mu hagatamasi aporo! Na meraha ngegana karu hagaparu ma igê na tamasinga iaterua.”
50Hoi, na enoni hato ka rêrête ka aporo i ruma ni hagatamasiha. I ngekana na enoni raha ka vi tanga igê o Taniele, ka vi: “Râ me, ku oga so henigami, ma ku ramatenia tangagami na takoha iamu, suria God ki katogo, ko tako mataha.”
51O Taniele ki tamasi tangara, ki vi: “Mu tora hetatari renirerua na meraha na mane ni hagatamasiha, ma be hagatererua hegitigi.” 52Ma hemuri o Taniele ki unia me na hitangiterua ma ki vi tanga, ki vi: “Igo ka na meraha ni eraha. Igo ko togâni na meni na tasi iamu. 53Igo ko surira bera na enoni. Igo ko hagatotongora na ani, ga oga suri parongata, ma na ani, ga bagaparongata hete, ko nakara ma vê, henaka vi na Araha ki vi, siana ko hagamesira na enoni, i koro ma ki oto na parongata. 54Manga vi igo, ma ko bâsia monari ka Susana henia na mane haoru, hoi, gu visia me: Igê na hunana na apinige ta kani go bâsirerua, garu rongo era igê?”
Ngaia ki arami, ki vi: “Igê na hunana na kere gahiga.” 55O Taniele ki vi: “Koro era! Na hagaparunga iamu ki apariri tangago so maremu, ko meme. God ki bani bonasia na angero iana, hanana i reterete vurusigo.”
56O Taniele ki haribona, ka torea vê na ani ngekê na meraha, ma ka torea me nikâ na ruata na meraha. O Taniele ki tamasi tanga, ki vi: “Igo na eragani nuni! Igo na Siu, ma ki tanu hega, ko usurira na Kananita? Na bâkorohana na gete ngekana ki uhungigo, ma na teniha era ki aharêsigo. 57Igamurua kamuru bani kato me vikana henira na gete na Isiraelita, suria ga magutenigamurua ngavê. Ma ngaia ma ikê ka na gete na Isiraelita i usi, vige aganaria na teniha era iamurua. 58Hoita, gu visia me: Igê na hunana na apinige ta kanigo bâsirerua, garu rongo era igê?”
Ngaia ki arami, ki vi: “Igê na hunana na angari raha.”
59O Taniele ki vi: “Koro era! Na hagaparunga iamu ki apariri tangago so maremu, ko meme. Na angero iana God ki bani nanê, hanana i reterete vurusigo renia na tatapa borahu iana, ma ki hatungigamurua ngavê.”
60Vikana na enoni hato ka ngere raha, ma ka hagarahasia God, i hagatahira na ani, ga hagêguri togo renia. 61Ngaira ka apariri tangarerua na meraha gi rua ngegana, suria o Taniele ki hagatanga monari renirerua, vi ngairerua karu tohe vero. 62Na ramata iana o Moise ki vi, ga hagahatungira nga na enoni, ga tohetohe vero, renia na hagaitangiha, ga harikato renia na ani, vi ga hagatoraia. Tahema ka nahuirerua karu me, ma ka hagatahia na gete i matarotaro ngekana.
63Na enana ka Susana, ma o vaniana, ma na goana ngaira ka hagarahasia God, suria ga tarahua, vi ka Susana ki pe katoa rârâ na tarana, na meraha karu hagatoraia renia. 64Haganega tenia i ngekana o Taniele ka hagahigasia ngavê.
Currently Selected:
SUSANA 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific