BARUKU 6
6
Na leta i segea o Jeremia
1Ikê ka hagatarêngenia na leta, i segea o Jeremia tangara na ai ni Juta, matena na maneraha ni Babilonia ki sugi henahuraura igê tanga i Babilone. I rarona na leta ikê ka oga igê na tamasinga iana God, i hagatora o Jeremia renigi tangara.
2Igamu kamu haritohea God. Tahema na maneraha o Nebukanesa ki sugi henahuraugamu tanga i Babilone. 3Igamu kamu page mamahuara i ngekana surigi rako na harisi, surigi na apaparaha gi pi. Ma hemuri God ki page bêngenigamu hura tanga i pasimi ma kamu page asitatara igê.
4I ngekana i Babilone igamu kamu page bâsigi na nunuta na ataro, ga tagarahigi renigi na apinige, na siliva ma na golo. Na enoni ahuroto ka toregi i gaparata ma ka magutenigi ngavê. 5Igamu kamu hinahinaru, hanana siana kamu hakunira. Siana kamu magutenira na harasita, matena mu bâsira ga torera rârâ igê na hagarahenga, ka rahesira. 6Ki tuguhigamu, mu vi ma hete: “Igo getego ma, Araha, ki tuguhigami, vigami rahesigo igo.” 7Na angero iana God ki page ngahisigamu i ngekana. Ngaia ki page marupegamu.
8Na mane ni tahenga ka tagarahigi na nunuta na ataro renigi na apinige ma ka parugi renigi na siliva ma na golo. Ngaira ka pe tonga renigi na meata. Ngaira ka na marâ purua ma. Ngaira ki asa vige tamasi. 9Na enoni ka tagarahigi na tarepuri na golo ma ka nakagi i bêta na harasita, manga vi ngaira ka na kere gete, ga barigigi na mahe ma na rêni. 10Ta na mateni na mane ni hagarahenga iata ka hanagogi na siliva ma na golo tenira na harasita ma ka nahunigi so mareta. 11Nakara ma nikâ na êrâ igê na ngêsu, ngaira ka vatera nogata tani. Na enoni ka hagesurugi na nunuta na ataro ngegana, ga tagarahigi renigi na apinige, na siliva ma na golo, manga vi ngaira ka na enoni. 12Naka ma ngaira ka hagesuru rotorotoaga memera mangara na maneraha, ma ngaira ki asa, vige maningaira so mareta, se vige hagatahira so mareta tenira na ane. 13Matena na momo igê na ngêsu ki akuhukuhu hurigi na maata, ta na enoni ki taruhigi râ tenira, suria i bara tangara so ngaira mareta. 14Na ataro ka taugi na vato mangara na maneraha ni kotiha, ma ka pe tonga na raramohata, hanana viga hagaitangia ta na enoni, i erasira. 15Tani na mateni ngaira ka taugi na gê i masi ma na akesi, ma ki bara tangara, vige ngahi pusira so mareta renigi igê na hearihatana, se vige ura pusira na mane, ga hanagora. 16Na tarani ngegê ka hagabângenia, vi ngaira ka na marâ purua ma. Tahema siana kamu rahesira.
17Na ataro ngegana ngaira ka oga so ma igê na ngêsu iata mangagi na abotagani na apira. Na maata ki momoga renigi na akuhukuhugani na êgata na enoni, ga bêbanu me igê na ngêsu. 18Na mane ni hagarahenga ka raburigi, ki nganganihaga na maani ruma ma na raburini na ngêsu, hanana siana na mane hanago ka hogegi. Ngaira ka raburigi pusira banu manga na enoni i ruma ni hagaitangiha, ga sugi nahuia ki meme, suria vi haritohea na maneraha. 19Ngaira ka tangagi rako era na laiti tangara teharira so ngaira mareta, ma ki bara ngavê tangara na ataro, vige bâsigi na laiti, naka ma vi na ani gi tage togo ma. 20Na rarota ka anega mangagi na gogohane na ngêsu, ma na gahu iata ka êvariga. Henaka, ma ngaira ka pe giraragi rârâ. 21Na maata ka arisuga renigi na roboni na gi igê na ngêsu. 22Na roke, na gapagapêsu ma na manu getera ka tagirira, ma na pusi nikâ. 23Na tarani ngegana ka hagabângenia, vi ngaira ka na marâ purua ma. Tahema siana kamu rahesira.
24Na enoni ka hagabâkorogi na nunuta na ataro ngegana renigi na golo. Ma ngaira ki asa vige togatoga, manga mareha ta na enoni, vige taruhigi. Matena na enoni ga hanugi ki rono, ngaira ka tagarahigi. Ma ngaira na ataro ka pe hatamigi rârâ. 25Naka ma na mena, na ani raha se na ani sisite, ma tangara ngaira ki tagenana ma. I bara ngavê tangara, vige manavasua.
26Bâ, ngaira ka na ataka mavê na marâ. Ngaira ka pe girara, vige arârâ mareta. Tahema na enoni ka torera rârâ ma. 27Na enoni, ga onosurira, ngaira ka maki, matena na hitangita na harasita ka apuri so i ano ma ka pe girara vige aharaga mareta. Manga ta na enoni, ma ki hagêrasia tani na ataro i tagua, ngaia ki bara tanga, vige guru râ tenia na atohana. Ma ki manga vi ura hagakere, ngaia ki bara iana, vige ura ototo marena. Manga viga vutungira na ataro ngegana renigi ta na marâ, ki tanu manga ga vutungira na gahuata na enoni. 28Na mane ni hagarahenga ka hagavuringenigi na marâ, ga vogasira na harasita renigi, ma ka nakagi na haga tangara so mareta ma. Na gete iata na mane ni hagarahenga ka hahahi na ganiani ni vogasiha tangara so mareta, ma ka pe meratongani râ na enoni matareha ma na ani i bara tangara. 29Naka ma na gete, i tahataha na obata, se ga kahu apara, ma ngaira nikâ ka hatarigi na marâ, ga vogasi re. Na tarani ngegê ka hagabângenia, vi ngaira na harasi ngegana ka na marâ purua ma. Tahema siana kamu rahesira.
30Bâ, na gete ka vogasigi na marâ, ga tagarahigi renigi na apinige, se na siliva, se na golo. Tanu hega ka hêtata vi na ataro? 31Na mane ni hagarahenga ka oga igê na ngêsu, matena ga hetaki, ka hagesuru tatari, ka gorogoro bêhuri ma ka pe buhigi na bêta. 32Na mane ni hagarahenga ka ngerengere raha i maata na ataro iata, manga igê na ngêra na hagatataha. 33Ngaira ka tasigi râ na gahu tenira na harasita ma ka hagesurura re na gete iata ma na kareta. 34Naka ma na enoni ka hagahihasira na harasi ngegana, se vige erasira, i tagenana ma, suria i bara tangara vige barugi bê aporo na tauhata tangara. Ngaira ki bara tangara, vige kasia akê ta na enoni, vi maneraha, se vige kasia so, 35se vige katoa ke ruruguha, se vige vatea na haga. Manga ta na enoni ma ki surusuru tangara, ma ki pe hagamonaria na suruha iana, ngaira ki bara tangara, vige tuguria. 36Ngaira ki bara tangara, vige hagatahia ta na enoni tenia na mera, se vige tamania na enoni i pe ramo pusia na ani i ramo teharia. 37Ngaira ki bara tangara, vige hagamaravagi na maana na enoni i guru, se vige haganaku parongana na ani igê na mamasiaganiha iana. 38Ngaira ki bara tangara, vige takuira se vige tamanira na gete na nâ se vi na kare banogo. 39Na harasi ngegana, ga tagarahigi renigi na apinige ma ka parugi renigi na siliva ma na golo, ngaira ka pe tonga rârâ na raramohata mangagi na hê, ga toregi igê na hungani ni hê. Ma na enoni, ga rahesira, ka page maki ngavê. 40Tanu hega na enoni ka takusia, vi na marâ ngegana ka na harasi, se ga visira vi na ataro?
Na ai ni Babilonia ka pe hagahigasira na harasita mareta nikâ. 41Manga na enoni ma ki bibi, ngaira ka mebanu igê na ngêsu, ma ka nungia Belo na ataro, hanana i katoa, ki tamasi. Ma Belo ki na marâ purua ma nikâ. I asa vige giraragi rârâ ta na marâ. 42Henaka na enoni ka tahetara, vi na harasita ngegana ki bara tangara, vige tamanira bême, ma ngaira ka beka ngavê, suria ga ama ni rahesira nga. 43Mareha vi nga noga ma i manga ngekana, ma na gete nikâ ka hugusira mareta, ma ka gâga i papani na tara, ma ka sungigi na marâ i sigini koro, ma ka nanasi mane. Manga na mane, ma ki râ me ki merâ na hitangita, hanana vi paronga era henia, ngaia na gete akana ki aporo me ma ki rurusira na tamana, vi na mane ka usitenira ngaira, suria viga pe bâkoro. 44Na ani mavê na tarani renira na ataro ngegana ka pe monari. Tanu hega na enoni ka takusia, vi na marâ ngegana ka na harasi, se viga visira, vi na ataro?
45Na mane ni tahenga ma na ani ga maningaigi na tagaraha renigi na golo, ngaira ka tagarahira na ataro ngegana surigi na takoha iata mareta. 46Naka ma ngaira na mane ga tagarahira na ataro, ngaira ka pe mêri arihu. Ma ki tanu hega ka girara, viga hagavorera na ataro? 47Ngaira ka haganahunira na raraha iata renigi ma na hagaparunga ma na makiha. 48Igê na mateni ni hearihatana ma ni perenga na mane ni hagarahenga ka takusia na agua, hanana viga mera ahi igê na harasita. Na ataro ngegana ki bara ngavê tangara, vige tamanira na enoni igê na mateni ni hearihatana ma ni perenga. 49Renia ta na enoni ka pe tahetara renira na ataro ngegana, vi ngaira ka na marâ purua ma?
50Na ataro ngegana ka na apinige purua ma, ga parugi renigi na siliva ma na golo. I ta na tangiana na enoni ka page tahetara igê, vi na ataro ngegana ka na marâ purua ma. 51Na enoni hato i maveta henira na maneraha iata ka page tahetara, vi na enoni kani ga tagarahira na ataro ngegana. Ngaira ka mareha vi na ataro, ge tonga na raramohata. 52Ti ki pe tahetara renira, vi ngaira ka mareha vi na ataro monari?
53Na harasi ngegana ki bara tangara, vige kasia ta na enoni ke maneraha, se vige katoa na rangi. 54Ngaira ki bara tangara, vige bâsurigi na marâ iata mareta, se vige surigi na marâ igê na otoha, se vige urapusigi na tarani, ga pe oto. I mareha makoko vê, vige katoa rârâ ta na marâ mangara na manu ga gagaha rârâ. 55Manga tani na ngêsu, ma ki suhia na ania, na mane ni hagarahenga ka gavagava tangagi na manavata, ma na ataro, ga tagarahigi renigi na apinige ma ka parugi renigi na golo ma na siliva, ki bara tangara vige gava. Ngaira ka nonoro mangagi na gogohane igê na ngêsu. 56Ngaira ki bara tangara, vige meraheariha na maneraha se vi na merongata. Tanu hega na enoni ka tongesurira, vi ngaira ka na ataro?
57Na ataro ngegana, ga tagarahira renigi na apinige ma ka parugi renigi na siliva ma na golo, ngaira ki bara tangara, vige urapusira na mane hanago ma na manero, 58ga obania viga hasuigi na siliva ma na goli tenira, se viga tasigi râ na gahu tenira. Ngaira na mane hanago ma na manero ka migigava na ara ni marâ hato ngegana. Na ataro ki bara tangara ngavê, vige urapusira. 59Haganega tenia na maneraha raha, tariha igê na kere abotagana na pi na hê, ngaia ki koro teharira na ataro, suria ngaia na ataro ki na marâ i pe monari. Na maani ruma nikâ ki koro teharira na ataro, suria na maani ruma ki pusigi banu na marâ i ruma. Na u na gugura ni ruma iana na maneraha ki koro teharira na ataro.
60God ki hagavoragi na arito, na hageha ma na higu, hanana ga mave, ma ngaigi ki tê viteana. 61Tagenana ma nikâ ngaigi na marangea ma na roga. Na marangea ka girara ga bâsia, naka ma i hagatê era. Na roga ki rogaroga i na ara ni agua. 62Matena God ki bonasigi na vaha, ki gagaha i avorana na maveta hagenani, ngaigi ki tê viteana. 63Matena God ki kasia na gi, hanana i ngêgi na barani ma na vapuni, ngaia ki tê viteana. Ma na ataro ki bara tangara, vige katogi na tarani ngegana. Ngaira ka pe maratorana na raramohana God. 64Ti ki takusira se i visira, vi ngaira ka na ataro? Ngaira ki bara ngavê tangara, vige tamasigia se vige erasigia. 65Mu bani girara, vi ngaira ka na marâ purua ma. Tahema siana kamu rahesira.
66Na ataro ngegana ki mareha ngavê, vige tonga na raramohata. Ngaira ki bara tangara, vige kuasira na maneraha, se vige komanira. 67Ngaira ki bara tangara, vige katogi rârâ tani na mena i vavearo tangara na enoni. Ngaira ki bara tangara, vige mave mangagi na arito se vi na hageha. 68Na ogaha iata na marâ vasiga i bemu ki koro teharia na ogaha iata na ataro ngegana, suria na marâ vasiga ngaira ka girara ga gavagava, hanana ga tahitahi, ma na ataro ki bara tangara. 69Tahema ki mataha ngavê, vi na ataro ngegana ka na marâ purua ma. Tahema siana kamu rahesira.
70Na harasi ngegana, ga tagarahira renigi na apinige ma ka parugi renigi na siliva ma na golo, ngaira ka mangagi na marâ ni hagamagusiha i mu ni huki. Ngaigi ki bara ngavê tangara, vige anumasia na mu. 71Ngaigi ki bara tangara, vige tarigenira na manu, ma na manu ka ama ni tagirigi nga. Ngaigi ki maratorani ngavê na tone i mu. Na ataro ngegana ka manga na gahua, ga kasia râ igê na roto hono. 72Na gahu rotorotoaga memera, ga hagesuru renigi, ki kakaga. Tahema igia ka girara, vi ngaira ka mareha ngavê vi na ataro. Ma hemuri ngaigi ki page anega ma ki mauhu, ma na enoni page meramaki.
73Na enoni, i koro ma ki oto i maana God ma ki pe rahesira na ataro, ngaia ki asa, vige page togâna na makiha.
Currently Selected:
BARUKU 6: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific