NEHEMIA 1
1
O Nehemia ki tako renia i Jerusaleme
1Ikê ki na sihonga renigi na tauhana o Nehemia karena o Gakalia. Igê na hageha na Kisileve, matena o Ataseresese ki maneraha i Pesia surigi noga na harisi tangahuru gi rua, inê o Nehemia kê oga i Susa na hinua raha. 2O Ganani na hitangita na goaku ki ata me tenia i Juta henira tani na mane nikâ. Inê kê hagatera renia i Jerusaleme ma renira na goamami na Siu, ga bani aporo tenia i Babilonia tanga i Jerusaleme. 3Ngaira ka hagarongoê, vi na ani ga tahi ma ka bani aporo i pasita, ngaira ka tarahua, vi i bara ngavê tangara, ma na enoni ga pe Siu i ngekana ka meramarabe tare. Ngaira ka hagarongoê nikâ, vi na para ni hinua i Jerusaleme ka ahoge mênga, ma na maani para ni hinua ka pe tagarahigi aporo i murina ga tihu renia na gi. 4Matena gê rongo vikana, inê kê oga so ma kê angi.
Inê kê angi ma kê pe ngê rârâ surigi na tangiani haritamani. Inê kê avarasia God, kê vi: 5“God, Araha raha teha, igo ko raramohaga hunigo ma ko hagamamagutaga tangagami. Igo ko hagamonaria tare na suruheri iamu henira na enoni, ga takuigo ma ka marupegi na ramata iamu. 6Araha, gu karingê ma ku aganaria na avarasiha iaku. Igê na tangiani ma na bungiani inê kê avarasigo tangara na kariamu na Isiraelita. Inê kê visia mataha, vi igami na Isiraelita kami tasi. Igami, na êvariku menê kami tasi. 7Igami kami murisigego ma kami pe marupegi na ramata iamu. Igami kami pe arâ surigi na ramata, go bani vatea o Moise na kariamu renigi tangagami. 8Hoi, gu takusia aporo na tamasinga iamu tanga o Moise go vi, ‘Manga igamu na Isiraelita ma kamu pe tototo suriê, hoi, inê kê page tokorenigamu i berarogata na enoni i na agua getigi. 9Ma ki manga mu urisi parongami, kamu ahariê ma kamu marupegi aporo na ramata iaku, hoi, inê kê page toregamu aporo tanga na agua, gê bani atea tanga, vigamu rahesiê igê, henaka igamu kamu totoko suria na maveta hagenani.’
10“Araha, na Isiraelita ka na kariamu. Igo ko atera tangago maremu. Igo ko hagatahira renia na raramohamu raha, suria go raramohaga hunigo. 11Araha, gu aganarigi na avarasiha iamami, na aniku ma na anita na kariamu hato getera ga hagahigasigo. Gu katoa na maneraha ke koro tangê i ngekê, hanana ve râha koro.”
Igê na mateni ngegana inê kê bâbâsuria na vaini tanga na maneraha, matena i ngêngê.
Currently Selected:
NEHEMIA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific