NEHEMIA 2
2
O Nehemia ki râ tanga i Jerusaleme
1I ta na tangiana i murini na hageha ge he, matena na maneraha o Ataseresese ki ngêngê, inê kê torea na vaini tanga. Ngaia ki pe bani bâsiê, vi ve arikuku. 2Tahema ngaia ki hagateê, ki vi: “Hega ko arikuku bâraha? Igo ko pe maeha. Ta na marâ kani katogo ko arikuku.”
3Inê kê gasuga. Inê kê arami, kê vi: “Maneraha, gu mêri arihu! Tanu hega kani vigê bâbâ rikiriki ma na hinua ga bagira igê na êvariku ki aruhuruhu ma na maani para ni hinua ka makaka?”
4Na maneraha ki hagate, ki vi: “Na ta kanigo obania?
Inê kê avarasia God raramohaga hunia, 5ma kê kahu vi tanga na maneraha, kê vi: “Manga igo, maneraha, ma ko obakoro reniê ma ko agana ko aganariê, gu nakê be râ tanga i Juta tanga na hinua ga bagira igê na êvariku, hanana ve tagarahia aporo na hinua.”
6Na maneraha ma kaniana karu oga harahara. Na maneraha ki aganariê ma ki hagateê, ki vi: “Na tangiani gi hita kanigo page gâga vê surigi? I na keta kanigo page aporo me igê?” Ma inê kê hagarongoa renia.
7Hemuri inê kê nungia ki koro tangê ma ki vateê na leta tangara na mane ga bâsuria urusia na apanena kereso i ve i Uparatesi, hanana ga hagamarumungeniê kê arâ tanga i Juta. 8Inê kê nungia nikâ na leta tanga o Asapa, i bâsurigi na vapuni iana na maneraha, hanana i mahatangenigi tangê na apinige tangagi na maani para ni ruma nganganihaga i ngahisia na ruma ni rotu, tangagi na para ni hinua ma tanga na ruma iaku. Na maneraha ki vateê renigi na ara ni marâ gê nungigi, suria God ki tamaniê.
9Na maneraha ki hagatorangenira tani na mane ga bêngenira na mane ni me henira tani na me igê na hosi, ka râ me heniê. Ma inê kê râ tanga i kereso i ve i Uparatesi. Matena gê ata râ i ngekana, inê kê tagarenigi tangara na mane ga bâsuria i ngekana na leta tenia na maneraha. 10O Sanabalata ni Bete Gorone ma o Tobia na hitangita na mane ga bâsuria i na apanena i Amone, ngairerua karu mangariaga ngavê, matena garu rongo, vi ta na enoni ki râ me, hanana vi hagakorogi na ogaha iata na Isiraelita.
11Inê kê râ nga tanga i Jerusaleme, ma surigi na tangiani gi oru, 12inê kê pe hagarongoa rârâ ta na enoni renia na marâ God ki hagatakusiê renia, hanana vigê katoa tanga i Jerusaleme. Hemuri igê na gupuna na bungiana inê kê rite ma kê hura henira tani na kariaku. Mareha rârâ vi tani na tonki, nga noga ma na ani gê tagiria matena gê râ me. 13I bungibungi mênga ma inê kê hura tenia na hinua igê na maani para Maruguna kereso. Inê kê rihu bêso tanga na vepusu Bagama ma tanga na maani para Bêniroro. Matena gê râ, inê kê haharirigi na para ni hinua, ga ahoge ma na maani para ni hinua ga makaka. 14Hemuri tenia na apanena bêkê na hinua, inê kê râ tanga na maani para Vebanga ma tanga na nonganonga Maneraha. Na tonki gê tagiria ki bara, vige râ, suria ga herora igê na hê. 15Vikê inê kê so tanga na maruguna Kiteroni ma kê tage kê râ, kê hahariria na para. Hemuri kê aporo suri ugaku ma kê banu aporo i hinua igê na maani para Maruguna.
16I mareha rârâ na hitangita na enoni raha i hinua ge girara, vi i he kanigê râ igê ma vi na ta gê katoa. Mataro me i na matena ngekê inê kê pe visia rârâ ta na marâ tanga ta na hitangita na goaku na Siu se vi tangara na mane ni hagarahenga, se ve tangara na enoni raha se vi tangara na ani ga bâsuria na hinua, se vi tangara na ani mavê na enoni ga tagarahia aporo na para ni hinua. 17Ma i ngekê inê kê vi tangara, kê vi: “Igamu kamu bani girara, vi na ogaha iaku ki pe koro, suria i Jerusaleme ki aruhuruhu ma na maani para igê ka makaka. Naka ke tagarahigi aporo na para ni hinua ma ke hatungia na makiha iaka.” 18Inê kê hagarongora renia vi manga i he God ki ngahisiê ma ki tamaniê, ma renia na tamasinga iana na maneraha tangê.
Ngaira ka arami, ka vi: “Hoi, nika! Ge tagarahigi aporo!” Ma ngaira ka nanê, hanana viga haganega na tagaraha.
19Matena o Sanabalata mo Tobia mo Geseme na mane ni Arabia ka rongoa na katoha iamami, ngaira ka rurusigami, ka vi: “Mu takusia vari, vi ararigamu vigamu tagarahigi? Mu obania vari, vigamu rêrapusia na maneraha?”
20Inê kê arami, kê vi: “God raramohaga hunia ki page katogi na tagaraha iamami ka tavoraha bâkoro. Igami nga ka na kariana. I asa vigami naka vê na tagaraha. Ma igamu ki pe oto tangagamu, vigamu nahunia na anima na kere mako i Jerusaleme. Igamu kamu mamahuara ma me. I bara vigami megamu tongani.
Currently Selected:
NEHEMIA 2: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific