SAKARIA 8
8
Na Araha ki surua vi hagakoroa aporo Jerusaleme
1Na Araha raramohaga hunia ki hagagirara o Sakaria renia na tamasinga iana, ki vi: 2“Inê kê tangasia bâraha, vigê tamania Jerusaleme, suria gê mesira bâraha na kariaku igê. Tahema inê kê mangariaga bâraha tangara na merongata. Ngaia kani gê visia, inê na Araha raramohaga huniê. 3Inê be aporo i Jerusaleme, na hinua apuna iaku, ma be oga i ngekana. Ga page hêtana Jerusaleme, vi na hinua i toto suriê, ma na hungana iaku Sione ka page hêtana, vi hungana apuna. 4Na meraha ma na gemêa, ga rivato, ka page oga nikâ igê na mahera ni hinua. 5Ma na kere mane ma na kere gete ka page oga apisi nikâ igê na tara. Ngaia kani gê visia, inê na Araha raramohaga huniê.
6“Na enoni i na agua ngekê, ga tahitahi mêngara, ngaira ka takusia vari, vi na tarana ngekê ki bara ngavê, ma tangê inê ki pe bara. 7Inê be hagatahira na kariaku tenigi na agua, ga henahuraura tangagi, 8ma be torera aporo tenia i kerekê ma i kereso, hanana ge oga i Jerusaleme. Ngaira nga ka page vora na kariaku, ma inê nga na God iata, gê marungira igê na otoha ma na totohesuringa. Ngaia kani gê visia, inê na Araha raramohaga huniê.”
9Na Araha raramohaga hunia ki vi: “Mu ramoramo! Na tamasinga, mu rongoa i ngekê, na poropete ka bani visia me i kere vê, matena ga haganega ka tagarahia aporo igê na Ruma ni Rotu. 10I nago na tarana matena ngekana na enoni ka tagara purua ma, ma na puruka nikâ, suria i mareha na haga. Ma na enoni, i sikasika i tagua, na merongana ka nahuia vari. Inê kê katora na enoni ka heheariha. 11Ma i ngekê nga inê kê katora bâ getea na enoni igê na agua ikê, na ani ga tahitahi mêngara. 12Ngaira ka page oga igê na ramana, ma ka page hasigi na mu iata. Na pariki ni vaini iata ka page hunguhungu, ma na mu ka page ganora bâkoro. Na rangi ki page sivurigi bâkoro na mu. Na ramana ngekê inê be vatera na kariaku renia, na ani ga tahitahi mêngara. 13Ai ni Juta me Isiraele! I na matena i nago na ai mahuara ka heguhaguha, ka vivi, ‘Na eraha, i tarahura na ai ni Juta me Isiraele, ke tarahugamu nogami hete!’ Ma inê be hagatahigamu igamu, ma hemuri na ai mahuara ka page visira heri, ka vivi, ‘Na ramana, i tarahura na ai ni Juta me Isiraele, ke tarahugamu nogami hete!’ Tahema mu ramoramo. Siana kamu magu! Ngaia kani gê visia, inê na Araha raramohaga huniê.”
14Na Araha raramohaga hunia ki vi: “Matena na uvarimi ka hagamangariê, inê kê kato, vigê hagaitangira, ma kê pe tako rugu renira. Inê kê katoa na katoha iaku. 15Ma i ngekê nga inê be koro tangara na ai ni Jerusaleme me Juta. Vikê, siana kamu magu! 16Igê nga na marâ ga tuguhigamu: mu tamasi monari heri. Igê na kotiha mu katogi na morani na otoha, hanana i voravora me na morana na marapeha. 17Siana kamu erasigamu heri! Siana kamu tohetohe vero! Inê kê usitenigi na hagaparunga, na tarani ga pe oto, ma na hearihatana. Ngaia kani gê visia, inê na Araha raramohaga huniê.”
18Na Araha raramohaga hunia ki hagagirara o Sakaria renia na tamasinga iana ki vi: 19“Na hariharinga igê na heta, na rimata na pita ma na tangahuruta na hageha ka page vora na tangiani raha ni vagevageha, ga obâbakoro igê na ai ni Juta. I tuguhigamu, mu tangasigi ma na monariha ma na marapeha. Ngaia kani gê visia, inê na Araha raramohaga huniê.”
20Na Araha raramohaga hunia ki vi: “Ta na tangiana na enoni gahu tenigi rako na hinua ka page râ me i Jerusaleme. 21Na enoni i hinua ka page vi tangara na enoni i ta na hinua, ka vivi, ‘Igami kami arâ, kami rahesia na Araha raramohaga hunia, hanana i tamanigami. Mu râ me henigami!’ 22Na enoni gahu tenigi na marê ramo ka page râ me i Jerusaleme, hanana ga rahesiê ma ka avarasiê igê, inê na Araha raramohaga huniê. 23Igê na matena ngekana na ai mahuara tangahuru gi tage ka page karumia na ani gi tage togo na Siu, ka vivi, ‘Igami kami obania, vigami arâ henigo, suria igami kami rongoa, vi God ki ngahisigo.’ Ngaia kani gê visia, inê na Araha raramohaga huniê.”
Currently Selected:
SAKARIA 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
