SAKARIA 7
7
Na hagatenga renia na hariharinga
1Na heta na tangiana igê na sivata na hageha, ga hêtana vi Kisileve, igê na heta na harisi o Tario ki maneraha teha igê, na Araha ki tamasi tangê nikâ.
2Na ai ni Betele ka hagatorangenirerua o Sarese mo Regemeleki henira na kariaterua tanga na Ruma ni Rotu iana na Araha raramohaga hunia, hanana viga avarasia igê na Araha. 3Ma ngaira ka hagatorangenira nikâ, hanana viga hagatera na mane ni vogasiha ma na poropete, ka vivi: “I koro ma vari, vigami kami ama ni angiangi nga, ma kami ama ni harihari nga, suria na Ruma ni Rotu ki aruhuruhu? Surigi me noga na harisi rako kani mi bani kato vikana igê.”
4Vikê na Araha raramohaga hunia ki tamasi tangê, ki vi: “Sakaria, gu hagarongora na enoni ma na mane ni vogasiha igê na agua renia na tamasinge aku. 5Surigi me noga na harisi tangahuru gi pi, igê na ara ni rimata ma na pita na hageha, igamu kamu angiangi ma kamu harihari. Matena mu kato vikana, ki hega, igamu kamu takusiê igê vari? 6Matena mu ngêngê ma kamu totono, igamu kamu takusiê igê vari?”
7Na tarana ngekê na Araha ki bani visia i harata na poropete i nago, matena i Jerusaleme ki oga igê na ramana ma ka rako teha ngavê igê na enoni i hinua rihia Jerusaleme, ma igê na bena ma igê na hungani.
Na guguruganiha ki hagaratena na hagaitangiha
8Na Araha raramohaga hunia ki tamasi tanga o Sakaria, ki vi: 9“I nago vê noga inê kê bani bonasira na kariaku, kê vi, ‘Igê na kotiha mu girara kamu arâ surigi na tarani, ga otooto. Mu hekorokoro ma kamu hetakui heri. 10Siana kamu hagamamasiagara na gete na nâ, na kare banogo, na ai mahuara i pasimi, se vi na ani ma vê na enoni, i bara tangara. Ma siana kamu katogi na tarani, ga erasigamu heri.’
11“Ma na kariaku ka togeaga ngavê, ma ka usi, vige tê viteaku. Ngaira ka pe karinga. 12Ngaira ka parisi hêga. Suria ngaira ka usitenia na hagesuringa, gê vatera renia, matena gê tamasi tangara i harata na poropete i nago, tahema inê kê mangariaga bâraha tangara. 13Suria ngaira ka pe karingê, matena gê tamasi, tahema inê nogaku kê pe karingara, matena ga avarasiê. 14Inê kê manga na roga raha, i tokorenira surigi na apanena iata na ai mahuara. Ma na apanena iata ki hihiruga ma ki baguru.”
Currently Selected:
SAKARIA 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
