SAKARIA 4
4
Na rimata na maruteha: na atohana na laiti
1Na angero, i bani meêtamasi tare, ki râ me nikâ. Ngaia ki ngingiê, manga vi inê kê mêru. 2Ngaia ki hagateê, ki vi: “Na ta ko bâsia?” Inê kê arami, kê vi: “Inê kê bâsia na golo na atohana na laiti. Ma igê ka goga na laiti gi pi, ma na ara ni hitangini ki nahunigi na agua gi pi, ga tangagi igê. Ma i gupuni ki akê teha na agua, i oga igê na pi na oile, i hagavunusigi na laiti. 3Na apinige ni olive gi rua karu ura hetangenia.” 4Ma inê kê hagatea na angero, kê vi: “Maneraha, na marâ tanga na ta igê?” 5Ngaia ki hagateê bê aporo, ki vi: “Go pe hagare?” Inê kê arami, kê vi: “Ua, maneraha, inê kê pe hagare.”
10bNa angero ki vi tangê, ki vi: “Na laiti gi pi ka manga na maana na Araha, i bâsira na ara ni marâ hato i maveta hagenani.” 11Ma hemuri inê kê hagatea, kê vi: “Na apinige ni oile gi rua, karu ura hetangenia, tanga na ta? 12Na ta ki na girarana na arana tani ma na arana tani, garu rato igê na hagepu na golo, i gogogo igê na oile?”
13Ngaia ki hagateê bê aporo, ki vi: “Go pe hagare?” Inê kê arami, kê vi: “Ua, maneraha, gê pe hagare.” 14Ma ngaia ki vi: “Ngairerua ka na vererua na mane, God ki bani atererua ma ki bani monererua renia na oile, hanana garu tagara tanga na Araha, i nahunia na maveta hagenani.”
Na suruha iana God tanga o Serubabele
6Na angero ki hagatorê, kê hagarongoa o Serubabele renia na tamasinga iana na Araha tanga, i tamasi vikê: “Igo ko page tehateha, mareha vi renia na hearihatana, se vi renia na raramohanu maremu, ma renia hete na raramohaku inê. 7Na bagahagapepe raha mangagi na barani ka page magahuru i maamu. Igo ko page tagarahia aporo na Ruma ni Rotu, ma na matena go tehusua renigi na hê, na enoni ka page gasi na maata renia, ka vivi, ‘E, bâkoro era! Bâkoro era ngavê!’ Inê nga na Araha raramohaga huniê kani gê visia.”
8Na Araha ki hagagirarê renia na tamasinga getea nikâ. 9Ngaia ki vi: “O Serubabele ki bani haganega na Ruma ni Rotu, ma ki page hagahatungia nikâ. Igê na matena ngekana na kariaku ka page girara igê, vi inê, na Araha raramohaga huniê, kani gê hagatorangenigo tangara. 10aNgaira ka tako tugupu mênga renia, suria na tagaraha ki râ haritagi bâraha. Ma ngaira ka page bâsia o Serubabele, i ama ni tagarahia nga na Ruma ni Rotu, ma ngaira ka page vagevage renia.”
Currently Selected:
SAKARIA 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
