SAKARIA 14
14
Na Araha ki page marungia na maveta hagenani
1Na tangiana, na Araha ki page surira igê na enoni, ki hagarangi me noga. Ai ni Jerusaleme, na merongami ka page hanagogi hato vê na nahuninga iami, ma ka page tonganigi i maami. 2Na Araha ki page hagahakura na enoni hato i maveta, hanana ga taharia Jerusaleme. Ngaira ka page raua na hinua, ka page rurugugi na ruma, ma ka page tugurira na gete ma ka rongo era henira. Ngaira ka page henahuraura ta apanini me, ma ta apanini me ka page nakara so i hinua. 3Ma hemuri na Araha ngaia marena ki page meraheariha na enoni ngegana manga i nago. 4I na matena ngekana ngaia ki page ura igê na hungana ni olive, kerekê i Jerusaleme. Ma na hungana ni olive ki page avaga i gupu tenia i kerekê tanga i kereso, ma ki page vora na marahiragana raha, suria na apanena gi rua karu guru hegetigi. 5Na marahiragana ki haganega tenia i kerekê tanga i kereso, ma ngaia ki na tara tangagamu, mu tahitahi igê. Igamu kamu page gavagava, mangara na uvarimi i nago igê na nunu raha, matena o Usia ki marungia i Juta. Na Araha God iaku ki page merarâ me na angero hato iana.
6I na matena ngekana ki hato, vige anumaga igê na enoni, se vige meme na ngêra, suria i magarisi ngavê. 7Ma ki hato vige roto hono. Ki page tangi tare. Na bungiana ki manga nikâ na tangiana. I na keta ki page voravora me igê na tarana ngekana? Na Araha ngaia getea ma ki girara.
8I na matena ngekana na ve koro ki page gogogo tenia i Jerusaleme. Ta na matangana ki page gogogo tanga na asi i kerekê, ma ta na matangana tanga na asi i kereso. Ngaia ki page gogogo tare, naka ma i rangirangi se na arito ru. I asa vige page mamata. 9Ma na Araha ki page marungia na maveta hagenani. Na ara ni marâ hato ka page rahesia ngaia getea ma God.
10Na agua hagenani i Geba i ta bogona mataro me i Rimone i ta bogona ki page benaga, nga noga ma Jerusaleme ki page rikiriki kê. Na hinua ki raha vikê: i haganega tenia na maani para, ga hêtana vi Benamino, mataro me igê na bani maani para, ga hêtana vi Roguna, ma tenia na bebetehe iana o Gananele mataro me igê na agua, ga rusirusi igê na vaini na kariana na maneraha. 11Na enoni ka page oga ape tatara i ngekana, ma ki asa ta na marâ, vige page hagamakukura.
12Na Araha ki page hagaitangira na enoni hato renia na ringa raha, ga taharia Jerusaleme. Na apeta ka page kakaga mamêrigata. Na maata ma na meata ka page kakaga mamêrigani.
13I na matena ngekana na Araha ki page katora igê, ka tugupu ma ka bubununuga ngavê, ma ka ata ni heariha ma vê mareta. 14Na mane i Juta ka page heariha pusia Jerusaleme. Ngaira ka page raugi na ruruguha iata na merongata hato: na golo, na siliva ma na gahu, rako ma rako ngavê.
15Na ringa raha ngekana ki page tarahura nikâ na hosi, na tonki, na kamelo ma na marâ hato vigana i pasita na merongata na ai ni Jerusaleme.
16Ma hemuri na ani, ga taharia Jerusaleme ma ka tahi, ngaira ka page arâ i ngekana i na ara ni harisi, hanana ga rahesia igê na Araha raramohaga hunia, i marungira, ma ka hagarahasia igê na tangiana raha ni Ruhu. 17Manga vi na agua, ma ki usi, vige râ, hanana ge rahesia na Araha raramohaga hunia, i marungira, na rangi ki asa hagetage, vige page rangisia na agua iata. 18Manga vi na ai ni Esipito, ma ka usi, vige hagarahasia na tangiana raha ni Ruhu, na ringa ki page tarahura nogata. Na Araha ki page hagaitangira re na ara ni agua, ga usi vige râ i ngekana. 19Ngaia nga ki na hagaitangiha i page tarahura na ai ni Esipito ma na agua getigi, manga vi ngaira, ma ka pe hagarahasia na tangiana raha ni Ruhu.
20I na matena ngekana, nakagi ma vi na kere belo sisite igê na varo ni hosi, ka page segea igê nikâ na tamasinga, i vi “Anina na Araha.” Na marâ, ga kukuki igê i Ruma ni Rotu, ka page apuna mangagi na apira i maana na bea ni vogasiha. 21Na ara ni marâ, ga kukuki igê i Jerusaleme ma i Juta hagenani, ka page hagapugi tanga ga vogasia igê na Araha raramohaga hunia. Na enoni, ga vogasia na Araha, ngaira ka page kukukigi igê na ganiani ni vogasiha. I na matena ngekana na enoni ki hato, vige page vuri se vige page hagavuri igê na Ruma ni Rotu iana na Araha raramohaga hunia.
Currently Selected:
SAKARIA 14: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
