SAKARIA 13
13
1Na Araha raramohaga hunia ki vi: “I na matena ngekana ta na ve banga ki page haganega ki gogogo, hanana i hagamatarotarora na raraha iana o Tavite ma na ai ni Jerusaleme tenigi na tasi iata ma na vogasiha ni ataro. 2I na matena ngekana inê nga na Araha raramohaga huniê be hagamagahurura igê na ataro hato tenia na agua, ma na enoni hato ka page hitenira. Inê be hagamagahurura nikâ na poropete hagaparu ma na enoni hato, ga obania viga vogasira na ataro. 3Manga na enoni, ma ki ama ni vivi, vi ngaia ki poropete, na enana karu page vi tanga, karu vivi, ‘I ararigo, go me, suria igo ko vi, vigo tarohenigi na tamasinga iana na Araha, ma hete na hagaparunga.’ Manga i tamasi poropete, na enana karu ahura ki meme. 4I na matena ngekana na ara ni poropete i page maki renigi na maruteha iana, ma ki page usi, vige maramara poropete, se vige aruha renia na gahu varehuga ni poropete, hanana i hagabekasira na enoni. 5Ma ki hagaiga hete, ki vivi, ‘Inê kê mareha vi na poropete. Inê na mane gê tagara ma i mu, haganega tenia na matena gê sisite.’ 6Manga ta na enoni, ma ki hagatea, ki vivi, ‘I hega, kani orerega na apemu?’ Ma ngaia ki page arami, ki vivi, ‘O, gê meraheariha na mane i ruma iata na tamaku.’”
7Na Araha raramohaga hunia ki vi: “Tatapa borahu, gu aharaga! Ku taharia na mane, i bâsuri sipi, na ani i tagara tangê. Gu nahu hunia, ma na sipi ka page totoko. Inê be taharira na kariaku.
8“Igê na agua hagenani na apanini me gi rua karu page meme ma na apanini me gi tage ki page tahitahi. Ngaia kani gê visia, inê na Araha. 9Inê be hagamatarotarora na ani ga page tahitahi, manga na siliva ma na golo ga hagamatarotarogi renia na gi. 10Ma hemuri ngaira ka page avarasiê, ma inê be aganarira. Inê be vi tangara, vi ngaira ka na kariaku, ma ka page visiê, vi inê ki na Araha God iata.”
Currently Selected:
SAKARIA 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
