SAKARIA 11
11
Na maneraha ga era ka vota
1Libanone, gu tahataha,
hanana na gi ki ngaura na maneraha iamu,
ga mangagi na apinige raha.
2Kareagani na apinige, mu angi maramara,
suria ga bani tapigi na apinige raha,
ka tâ i ano.
Apinige gatagata i Basani, mu angi maramara,
suria ga bani tapitapia na vapuna.
3Rongo! Na maneraha ka angiangi,
ka angisia na raramohata.
Rongo! Na laione ka ngurunguru,
suria i era na vapuna iata
i ve i Jotano.
Na mane gi rua garu bâsuri sipi
4Na Araha God iaku ki vi tangê, ki vi: “Gu maramara mane, i bâsurira na sipi, ga page nahuira. 5Na enoni, ga vurira na sipi ma ka nahuira, ngaira ka pe tangahurira. Na enoni, ga hagavuringenira na sipi, ka vi, ‘Igia ka babarisi, suria ga têgi na haga raha. Koro era, Araha!’ Ngaira na mane, ga bâsuri sipi, ka pe takuira nogata.
6“I tagenana ma inê na Araha ki hato, vi ve takuira na enoni i maveta. Inê be nakara na enoni hato i ruguhata na maneraha iata. Na enoni ka page mamasiaga, suria na maneraha iata ka page heparapara, ma ka page hagaerasia ngavê na maveta. Inê ki asa ve hagatahira tenira.”
7Vikê, inê be râ be tagara tangara na mane, ga vurivuri ma ka hagavuri sipi. Inê be bâsurira na sipi, ga page nahuira. Inê be torererua na vato girua. Na ani gi tage kê hêtana vi Hetamaniha, ma tani kê hêtana vi Haku. Hoi, inê kê bâsuri sipi. 8I rarona na hageha gi tage inê kê hatungira na vera oru na tamaku, ga bâsuri sipi, suria ngaira ka ruhiê. 9Ma hemuri inê kê vi tangara na sipi, kê vi: “Inê ki hato, vi ve bâsurigamu nikâ. Nakara vê ma, ga me ga me, ga magahuru ga magahuru. Ma na ani ga tahitahi ke nanahuira mareta heri.” 10Ma inê kê tavoa na vato, gê hêtana vi Hetamaniha, ma kê barugia, na girarana vigê hatungia na suruheri iana na Araha henira na enoni hato i maveta. 11Vikê na suruheri ki hatohato igê na tangiana ngekana. Na mane, ga vuri ma ka hagavuri sipi, ka boreteniê ma ka girara, vi na Araha ki tamasi tangara igê na tarani, gê katogi. 12Inê kê vi tangara, kê vi: “I koro ma vari, vigamu vateê na meku? Manga i mareha, hoi, naka vê.” Ma ngaira ka vateê na meku, na tangahuru gi oru na siliva.
13Na Araha ki vi tangê, ki vi: “Ngaia nga vi na haga raha, ga takusia, vi ararigo? Gu nakagi i na agua ni kasiha ni haga tanga na Ruma ni Rotu.” Vikê inê kê toregi na siliva tangahuru gi oru ngegê, ma kê kasigi tanga na Ruma ni Rotu. 14Ma hemuri inê kê barugia nikâ na ruata na vato, gê hêtana vi Haku, na girarana vi hatohato na haku iaterua Juta me Isiraele.
15Ma hemuri na Araha ki vi tangê, ki vi: “Gu maramara nikâ na mane i bâsuri sipi. Ma i ngekê gu maramara na ani, i pe botage renira na sipi. 16Bâ, inê kê bani kasia na mane, i bâsurira na sipi iaku. Ma ngaia ki pe botage renira, naka ma ga tahitahi se ga meme. Ngaia ki pe garira nikâ na ani ga tarupe, se vige marimarira na ani ga mamari, se vige hagangêra na ani ga tahitahi mêngara. Ngaia ki ngaura ma hete na sipi binibinikaga ngavê ma ki retegi râ na misi nêgata. 17I page era ngavê tanga na mane ngekana, i pe botage renira na sipi, suria i pania na totoha ni sipi iana. I araria ma, vige hagamamaria ngavê igê na hearihatana, ma ke hato na raramohana. I araria ma, vige me na rimana, ma ke guru na maana i otona.”
Currently Selected:
SAKARIA 11: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
