SAKARIA 10
10
Na Araha ki surua na tahinga tangara na kariana
1Mu avarasia na Araha renia na rangi
igê na matena ni hasinga.
Ngaia nga na Araha ki hagatorangenigi
na roto bungibungiha ma na rangi raha.
Ngaia ki katogi na mu i vavaka bâkoro.
2Na enoni ka rahesira na ataro,
ma ka hagatera na enoni ni hinarunga.
Ma ngaira ka hagaparu boromera!
Ngaira ka hagabekasigamu ma renigi na maruteha iata.
Ngaira ka hagagatagata apemi purua ma.
Tahema na enoni ka mangara na sipi, ga tarupe.
Ngaira ka tugupu, suria i mareha na ani,
vige bêngenira.
3Na Araha raramohaga hunia ki vi:
“Inê kê mangariaga tangara na ai mahuara ngegana,
ga marungira na kariaku.
Inê be hagaitangira.
Inê kê nahunira na ai ni Juta,
ma inê nga, na Araha raramohaga huniê,
kê page anumasira.
Inê be katora ke ramo mangara na hosi ni me.
4Tenira na kariaku ka page vora me
na enoni raha, na maneraha ma na ani ga ramata,
hanana ga marungira.
5Na ai ni Juta ka page tehateha
mangara na mane ni me ka purira so
na merongata igê na makomako i tara.
Ngaira ka page meraheariha,
suria na Araha ki ngahisira,
ma na merongata igê na hosi ka page gava.
6“Inê be hagaramonira na ai ni Juta.
Inê be hagatahira na ai ni Isiraele.
Inê be katora, ke aporo i pasita,
suria gê takuira bâraha.
I page bâ, manga vi inê kê pe bani kasi renira rârâ.
Inê nga nga na Araha God iata,
ma kê aganarigi na nungnungi iata.
7Na ai ni Isiraele ka page ramoramo
mangara na mane ni me,
ma ka page vagevage mangara na mane,
ga tono na vaini.
Na raraha iata ka page takusira tare,
vi ngaira ka teharira na merongata,
ma ka page vagevagesiê, inê na Araha iata.
8“Inê be unira ma be hagahakura na kariaku.
Inê be hagatahira ma be hagarakonira manga i nago.
9Naka ma inê kê tokorenira
surigi na apanena iata na ai mahuara,
ngaira ka ama ni takusiê nga
igê na agua hagatê ngegana.
Ngaira ma na kareta ka page tahi
ma ka page aporo me tagenata i pasita.
10Inê be torera aporo tenia i Esipito me Asiria,
hanana ge oga aporo i pasita.
Inê be kasira, ke oga i Gileata me Libanone nikâ,
ma ke aharêsia na agua hagenani.
11Matena ga tarêhia na asi i Esipito,
inê be tahurugi na navo,
ma na rutuni i ve i Nile ka page mamata.
Inê be hagamakira na ai ni Asiria,
ga paro bâraha,
ma be hatungigi na raramohana Esipito.
12Inê be hagaramonira na kariaku,
ma ngaira ka page rahesiê,
ma ka page têtê viteaku.
Ngaia kani gê visia, inê na Araha.”
Currently Selected:
SAKARIA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
