TOBITI 9
9
Na haga tenia i hinua i Ragesi
1Hoi, o Tobiasi ki unia o Rapaele ma ki vi tanga, ki vi: 2“Asaria, gu merarâ me na mane tagara ge he ma na kamelo gi rua ma ko arâ i hinua i Ragesi tanga na ruma iana o Gabaele. Go tagarenia tanga na pepa na heaganariha, hanana i vatego na haga. Hemuri ko haroa me tanga na ngêra na hagataku. 3Igo ko bani girara, vi o vaemaku ki tomanigi na tangiani gê arâ ma kê aporo me surigi. Ngaia ki page anumanuma, manga vi inê ma kê hagarihu vê, naka ma na tangiana gi tage. 4Igo ko bani girara nikâ, vi o Raguele ki vi, vigê gâga noga, ma inê kê hagagara era, vi ve arâ.
5Hoita, o Rapaele ma na verehe na mane tagara ka râ i hinua i Ragesi i Metia. Ngaira ka mêru i pasina o Gabaele. O Rapaele ki tagarenia na pepa na heaganariha tanga ma ki hagarongoa, vi o Tobiasi karena o Tobiti ki kahu êragi râ ma, ma ki haroa o Gabaele tanga na ngêra na hagataku. O Gabaele ki tomanigi ototo râ nga na anga ni haga, i gâga mêngagi igê na puru. Ngaira ka hagarutangira na kamelo renigi. 6Igê na kahuagana na tangiana ngaira ka tavoraha ka râ tanga na ngêra na hagataku. Matena o Rapaele ma o Gabaele karu ata râ i ruma iana o Raguele, ngairerua karu bâsia râ o Tobiasi i oga ki ngêngê. O Tobiasi ki aharaga ototo râ ma ki mêri renia o Gabaele. O Gabaele ki mêri renia bê aporo ma ki angi. Ngaia ki vi: “Igo ko maratorana o vaemamu. Ngaia ki na mane koro ma ki mamahata. Na Araha God ke korokoro tangagamu, igo ma kaniamu, ka hungâmu ma o vaemamu. Ge hagarahasia God, suria i katoê kê tahi rârâ mataro me kê bâsia o Tobiasi na goaku tonge i maratorana o vaemana.”
Currently Selected:
TOBITI 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific