TOBITI 8
8
Na bungiana ga hagataku igê ngekana
1Matena ga ngê hato, ngaira ka râ ka mêru, suria i bungi raha noga. Na enana ka Sara karu merâ ki banu o Tobiasi igê na kiboru ni mêruha. 2O Tobiasi ki takusigi aporo na tamasinga iana o Rapaele. Tahema ngaia ki tavorerua hura na rokona ma na bunaniana na siare tenia na anga i bani nakarerua igê. Ngaia ki nakarerua igê na apira i noro igê na marâ i sigini koro. 3Na vanuhani ki tarigenia vê na ataro tenirerua ma ki gava ki râ hagatê tanga i Esipito. O Rapaele ki tarigenia ma ki ranguia i ngekana ma ki rakugi na êgana ma na rimana.
4O Tobiasi ma ka Sara karu oga getererua igê na kiboru. Na maani ruma ni kiboru ki purupuru. O Tobiasi ki aharaga tenia na bea ma ki vi tanga kaniana, ki vi: “Kego, aharaga. Karu nungia na Araha ke takuigerua ma ke animasigerua.” 5Ka Sara ki aharaga, hanana garu nunginungi haku ma karu nungia God ki anumasirerua. Hoi o Tobiasi ki nunginungi, ki vi:
“God iata na êvarimami,
na enoni hato ke hagarahasigo.
Na marâ hato go hagavorara i vavearo ma i ano
ke hagahigasigo hagahu.
6Igo ko hagavora o Atama
ma ko hagauragingenia henia ka Eva,
hanana i tamania ma ki marupea.
Ngairerua karu vora re na enata na enoni hato.
Igo ko vi, ‘I pe araria na mane, vige gâga getea.
Inê be hagavora na gete i marisina,
hanana i tamania.’
7Araha, inê kê êragia ka Sara,
suria i oto tangê,
mareha vi suria gê tenia.
Gu takuigamirua nga,
hanana muru tage gemêa haku.”
8Ngairerua haku karu vi: “I monari”, 9ma karu tâ karu mêru.
Igê na bungiana nga ngekana o Raguele ki rite ki aharaga ma ki unira na kariana. Ngaira hato ka hura ka râ, hanana ga oparia na kiru. 10Suria o Raguele ki tako, ki vi: “O Tobiasi vari ki page me nogana ma na enoni hato ka page rurusigia ma ka page migiamerabe.” 11Matena ga oparia hato na kiru, o Raguele ki aporo banu i ruma, ma ki vi tanga kaniana, ki vi: 12“Gu kasia ta na kere gete tagara, ke râ ke bâ renia o Tobiasi, manga vi tahitahi mênga. Manga i mareha, hoi, igia ka bagia, i era ma na enoni ka girara.” 13Ngairerua karu kasia na kere gete tagara, ki torea na laiti ma ki râ ki bâ renia, manga vi ngaia ki tahitahi mênga. Matena i tangahia vê na maani ruma ni kiboru, ngaia ki bâsirerua garu mêru bore vê. 14Vikê ngaia ki aporo ma ki hagarongorerua o Raguele ma ka Etena, vi o Tobiasi ki tahitahi mênga ma ki gâga bâkoro ma. 15Hemuri o Raguele ki hagarahasia God na Araha, ki vi:
“God, i tuguhigami vigami hagarahasigo.
Na kariamu ke hagarahasigo tare
igê na mêrihata hagenani matarotaro.
16Inê kê hagarahasigo,
suria go hagakoro obaku.
Igo ko takuigami
ma inê kê magu hagaborâ ma.
17Araha, i marisimu vigami hagarahasigo.
Igo ko takuirerua na arua ngegê
na kare i tage iata na enaterua hegitigi.
Inê kê nungigo,
ku takuirerua ma ku anumasirerua.
Go katorerua karu mauri arihu
igê na vagevageha ma na hetakuiha.”
18Hemuri o Raguele ki bonasira na kariana, ka ahunia aporo na kiru matena i bungibungi mênga.
19O Raguele ki vi tanga kaniana, ki hahi na bereti araria na magotoha raha. Hemuri ngaia ki râ tangara na togoha iana ma ki mera aporo me na puruka mane na voemavo gi rua ma na sipi mane ge he. Ngaia ki bonasira na kariana ka nahuira tanga na ngêra na hagataku. 20Ngaia ki unia me o Tobiasi ma ki vi tanga, ki vi: “Siana ko aporo rêrê. Gu oga so nga surirerua na viki gi rua. Gu gâga so hanana igia ka ngêngê ma ka totono haku. Vikana igo ko hagakoro obana ka kareku i murina i bani mamasiaga me ngavê. 21Hemuri igo ko kahu migiaporo ta apaneni na nahuninga iaku ma ko aporo bâkoro ma i pasina o vaemamu. Ma ta apanena ko kahu nahunia, matena ka Etena menê kamuru meme. Go girara nga, vi igamirua kamuru takuigo bâraha. Haganega tenia i ngekê igo ko manga o karemirua manga ka Sara ka karemirua. I monari o kareku.”
Currently Selected:
TOBITI 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific