RUTI 4
4
O Boasi ki êragia ka Ruti
1O Boasi ki râ i na agua ni hekarigiana igê na maani para ni hinua, ma ki oga so igê. Hoi, na mane o Boasi ki bani hagarongoa ka Ruti renia, ngaia ki ri me i ngekana. O Boasi ki unia me, ki vi: “E bamane. Râ me ikê. Oga so.” Vikê na mane ki râ me ma ki oga so. 2Hemuri o Boasi ki unira me na tangahuri mane ni hagaotonga i hinua, ka oga so nogata. 3Matena ga oga so, o Boasi ki vi tanga na mane i tuguhia hagenago vi anumasira na raraha iana o Elemeleki, ki vi: “Ka Naomi, i bani aporo me tenia i Moaba, ngaia ki obania vi hagavuringenia na mako iana o Elemeleki na raraha iakerua. 4Inê kê takusia, vi i koro tangago, vigo girara. Hoi, manga go obania na mako, go vuria nga i maata na mane ga gâga igê. Manga go pe obania, ma ko visia me, suria igo kani i oto tangago hagenago, vigo vuria. Manga i mareha, hoi, inê.”
Na mane ki arami, ki vi: “I koro ma be vuria.”
5O Boasi ki vi: “I koro era! Ma ki manga go vuria na mako tenia ka Naomi, hoi, go vuria nikâ ka Ruti na gete na nâ ni Moaba, hanana na mako ki gâga igê na raraha iana o Magalone i me.”
6Na mane ki arami, ki vi: “Manga ngekana, inê kê usi vi ve vuria na mako, suria i era ma na kareku inê ka pe page nahunia na mako ngekana. Gu vuria igo. Inê kê usi.”
7I na mateni ngegana na tauhata na Isiraelita tanga na hagavuringa se na hohoronga ki manga ikê: Na ani i hagavuri ki tarasia râ na santele iana ma ki vatea renia na ani i vurivuri. Na tarana ngekê ki hagabângenia vi na ara ni marâ ka oto i berarogaterua.
8Vikê, matena na mane i vi tanga o Boasi, ki vi ‘Gu vuria igo’, ngaia ki tarasia râ na santele iana ma ki vatea renia o Boasi. 9Hemuri o Boasi ki vi tangara na mane ni hagaotonga ma na enoni hato i ngekana, ki vi: “I ngekê igamu hato kamu girara, vi inê kê vurigi tenia ka Naomi na nahuninga hato iata o Elemeleki ma o karena o Kilione mo Magalone. 10Tahema ka Ruti, na nâ ni Moaba i me tenia o Magalone, ngaia ki vora re na gete iaku. Vikana na mako ki gâga nga igê na raraha iana na mane i me, ma na raraha iana ki asa, vige page magahuru i berarogata na goana ma i pasina. Igamu nga kanimu girara na tarana ngekê i ngekê.”
11Na mane ni hagaotonga ma na enoni getera ga oga i ngekana ka vi: “Ua, igami kami girara. Na Araha ke katoa kaniamu ke maratoraterua ka Ragele ma ka Lea, garu aparara rako na kare i pasina o Jakobo. I koro ko ruruguha i berarogata na enoni i Eparata ma ke rongo raha na atamu i Beteleheme. 12Na Araha ke katogamurua igo ma na gete i karekare ikê, kamuru apara kare rako, hanana na raraha iamurua ka rakorako mangara na raraha iana o Peresi, o kareterua o Juta ma ka Tamare.
O Boasi ma na raraha iana
13Hoi, o Boasi ki merâ ka Ruti i pasina manga na gete iana. Ngairerua karu mêru haku. Na Araha ki koro tanga ka Ruti. Ka Ruti ki obara ma ki apara na kare mane. 14Na gete ka vi tanga ka Naomi, ka vi: “Ge hagarahasia na Araha, suria ngaia ki haganahunigo renia o vesimu, hanana i marupego. O vesimu ke rongo raha na atana i Isiraele! 15Ka hungâmu ki takuigo bâraha ma ki tamanigo ngavê, teharira manga vigu aparara o karemu gi pi. Ma i ngekê ngaia ki apara vê o vesimu, i page hagavagesigo aporo nikâ ma ki page marupego go gemêa.” 16Ka Naomi ki ragea ma ki topea ma ki marupea o vesina.
17Na gete ga basigu hetanga ka hêtana na kare mane vi o Obeti. Ngaira ka hagarongo rârâ, ka vi: “Ka Naomi ki tê kare!”
O Obeti ki apara o Jese ma o Jese ki apara o Tavite.
18Ikê ki na raraha iana o Peresi. O Peresi ki apara o Geserone. 19O Geserone ki apara o Ramo. O Ramo ki apara o Aminataba. 20O Aminataba ki apara o Nagasone. O Nagasone ki apara o Salamone. 21O Salamone ki apara o Boasi. O Boasi ki apara o Obeti. 22O obeti ki apara o Jese mo Jese ki apara o Tavite.
Currently Selected:
RUTI 4: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific