RUTI 3
3
Ka Ruti ma o Boasi karu heobani
1I ta na tangiana ka Naomi ki vi tanga ka Ruti, ki vi: “Inê be garia nga na mane tangago, hanana go panepane ruma. 2Igo ko bani girara, vi o Boasi, na ani mu bani tagara i mu iana igo ma na gete getera, ngaia ki na raraha iaka. Hoi, gu rongo. I rikini i manurahi ngaia ki page râ igê na agua i haata igê na koni. 3Hoi, gu mamanu bâkoro, ko monego renia na marâ i sigini koro, ma ko tuguni renigi na ani bâkoro ngavê. Hemuri ko arâ igê na agua i haata igê. Go gâga i ngekana ma siana ki bâsigo mataro me ki ngêngê ma ki totono hato. 4Go bâsia maninga, vi i he kani vi page tâtâ igê ki mauru. Matena i mauru bore, go gaia râ na aruhana ma ko tâtâ so i gusigana. Ngaia ki page visia tangago, na ta ko page katoa.”
5Ka Ruti ki arami, ki vi: “Na ara ni marâ go visigi kê page katogi nga.”
6Hoita, ka Ruti ki râ igê na agua ni hatanga ma ki râ surigi maninga na tamasinga iana ka hungâna tanga. 7Matena o Boasi ki ngê ma ki tono hato, ngaia ki koro na apena. Ngaia ki râ igê na agua ga naka igê na koni, ma ki tâ so ki mauru i ngekana. Ka Ruti ki kakauni me, ki gaia râ na aruhana ma ki tâ so i gusigana. 8Igê na bungiana o Boasi ki gasuga ki rite. Ngaia ki ahoro râ ma ki kone ngavê, suria i bâsia ta na gete i tâtâ i gusigana. 9Ngaia ki hagatea, ki vi: “Ka ti igo?”
Ka Ruti ki arami, ki vi: “Ka Ruti kani inê. Suria na raraha iaku kanigo igo tahema ki tuguhigo, vigo anumasiê. Hoi, gu êragiê.”
10O Boasi ki vi: “Na Araha ke korokoro tangago. Inê kê bani girara, vi igo ko toto suria ka hungâmu. Ma i ngekê inê kê kahu girara, vi igo ko toto suria ngavê na raraha iamu. Igo ko pe amane rârâ henira na mane haoru, henaka na ani ga ruruguha se na ani ga matareha. 11Hoi, ka Ruti, siana ko tako bâraha. Inê be katogi na ara ni marâ go obanigi. Na enoni hato i hinua ngaira ka bani girarago, vi igo ka na gete koro. 12I monari, vi inê ka na raraha gê hagarangigo, ma ki tuguhiê, vigê anumasigo. Ma ta na mane hete na raraha hagarangigo tehariê inê ki gâga. 13Go gâga ikê i rikini bungi akê. I gomaha mavoraro igerua karu page tarahua, manga vi ngaia ma ki obania vi anumasigo se i mareha. Manga vi obania, ki koro era. Manga i mareha, hoi, inê kê tohe renia God mamauri, vi inênga kê page anumasigo. Hoi, gu oga so i rikini bungi akê ma ku tâ ku mêru.”
14Vikê ka Ruti ki tâ ki mêru, i gusigana o Boasi. Matena i bungibungi mênga, ngaia ki rite, suria o Boasi ki pe obania, ta na enoni vige girara, vi ka Ruti ki oga i ngekana. 15O Boasi ki vi tanga ka Ruti, ki vi: “Gu tavoa na aruha iamu ma ku vatarangenia ikê.” Ka Ruti ki kato vikana. O Boasi ki kara so igê na koni na ararina na 30 kilo ma ki tamania karu raga ki tâ i gaparana ka Ruti. Ma ka Ruti ki migiaporo i hinua. 16Matena ka Ruti ki ata vê, ka hungâna ki hagate, ki vi: “Kareku, na mani marâ ki koro ma?”
Ka Ruti ki hagarongoa ka hungâna renigi na ara ni marâ i tanugi o Boasi tanga. 17Ma ngaia ki vi nikâ, ki vi: “O Boasi ki vi tangê, ki vi, i pe koro vi ve aporo me baguru tangago. Tahema ngaia ki vateê renigi na koni hato igê.”
18Ka Naomi ki vi tanga, ki vi: “Ka Ruti, gu piringiape, mataro me ka arâ manga hanani na tarani hato ngegê. Inê kê girara o Boasi ki page takotako tarana i ngekê.”
Currently Selected:
RUTI 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific