KI 94
94
God ki surira na enoni hato
1Araha, igo ki na God, go hagaitangira na enoni era.
Gu hagabângenia na mangariaganiha iamu.
2Igo ko surira na ara ni enoni hato.
Gu vatera na enoni, ga paroparo,
na hagaitangiha, i ararira.
3I na keta ki page hato igê
na vagevageha iata na enoni era?
I arihu mênga vari, Araha?
4I na keta ki page hato igê
na paroparoha iata na manero?
I na keta ngaira ka page hato igê,
vige ageage renigi na bagatarihata?
5Araha, ngaira ka purira so i ano na kariamu.
Ngaira ka hagamamasiaga apeta.
6Ngaira ka nahuira ka me na gete, ga nâ, ma na kare banogo
ma na mahuara, ga oga i pasimami.
7Ngaira ka vi: “Na Araha, ki asa, vige bâsigia.
God, na Isiraelita ka rahesia,
ki asa, vige rigigia.”
8Kariaku, igamu kamu bonobonoga ngavê!
I asa iami, vigamu takotako sisite vari?
9God ki vategia na karingaka.
Ngaia ki pe rongorongo vari?
Ngaia ki vategia na maaka.
Ngaia ki pe bâbâ vari?
10Ngaia ki hagaotora na enoni i maveta.
Ngaia ki pe hagaitangira vari?
Ngaia ki hagesurira na ara ni enoni hato.
Ngaia ki hite vari?
11Na Araha ki bani giraragi na aitangihata.#1 Co 3.20
Ngaia ki bani girara, viga takotako bekabekaga.
12Araha, ga babarisi na enoni, go hagaotora,
ma ko hagesurira renigi na ramata iamu.
13Igo ko hagamamarora tenigi na bagabevoani,
mataro me ko sutasuta karira na enoni era.
14Renia na Araha ki asa,
vige rumakaka renira na kariana.
I asa iana, vige panira na anina.
15Na suriha igê na kotiha ka page oto aporo.
Ma na enoni hato, ga tê viteana God,
ka page aganaria na otoha.
16Ti ki tamaniê pusira na enoni era?
Ti ki panepane heniê pusira na ani ga erataga?
17Manga vi na Araha, ma ke pe bani tamaniê,
inê be bani me rêrê.
18Matena gê sugi votavota noga,
igo, Araha, ko tauê,
suria go takuiê tare.
19Na ara ni mateni gê takoha bâraha ma kê anumanuma,
igo ko hagarekoniê ma ko hagakoro obaku.
20Igo ko tora getego hagetage
tenira na maneraha, na suriha ga pe oto.
Igo ko tora getego hagetage
tenira na maneraha, ga nakagi na ramata,
ga hagagatagatanigi na tarani, ga pe oto.
21Ngaira ka harikato renira na enoni, ga koro,
ma ka surira bera ka meme na enoni,
ga pe tanugi ta na marâ, ga era.
22Ma na Araha ki anumasiê,
ma inê kê rukuruku i pasina God iaku.
23Ma ngaia ki page hagaitangira renigi na bagatarihata,
ma ki page hagamagahurura renigi na tasi iata.
Na Araha God iaka ki page hagaerasira ngavê.
Currently Selected:
KI 94: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
