KI 77
77
Na hagagatagataniha matena na mamasiaganiha#Na ki iana o Asapa.
1Inê kê avarasia raha God na Araha.
Inê kê ngere raha, hanana i aganariê.
2I na matena na bagabevoani inê kê takusia na Araha.
Surigi na bungiani nikâ inê kê nunginungi,
ma kê ama ni hata era nga.
3Inê kê takusia God ma kê gegege.
Matena gê takotako renia,
inê kê bagahagêguri.
4Ngaia ki katoê, kê pe mauru surigi na bungiani.
Inê kê anumanuma bâraha,
ma ki asa be tamasi.
5Inê kê takusigi aporo na mateni i nago.
Inê kê takusigi aporo na harisi hato vê kere vê noga,
matena gê kirigi na tagaraha raha iana.
6I na ara ni bungiani inê kê pe mauru,
suria gê takotako bâraha
renigi na hagatenga iaku mareku.
7Na Araha ki page kasikasi renigia vari?
I asa vari, vige korokoro tangagia nikâ?
8Ngaia ki hato vari, vige takuigia?
Na suruha iana ka hato vari?
9I hatohato vari na takuiha tarema iana?
Na mangariaganiha ki bani urusia vari na takuiha iana?
10Vikê inê kê vi: “Na marâ, gê hata era bâraha renia, ikê:
God na Araha ki asa, vige raramohaga nikâ.”
11Inê be takusigi aporo na tagaraha raha iamu, Araha.
Inê be takusigi aporo na mena iamu i nago.
12Inê be takotako renigi na ara ni marâ hato, go bani tanugi,
renigi na tagaraha raha iamu,
ga hagabângenia na raramohamu raha.
13Na tauhamu, God, ka matarotaro teha.
O ti ki maratoramu?
14Igo nga ki na God, go tanugi na mena.
Igo ko hagabângenia na raramohamu raha
i pasita na enoni i maveta, ga pe tongesurigo.
15Renia na raramohamu igo ko hagatahira na kariamu,
na raraha iaterua o Jakobo mo Josepo.
16Matena na ve ma na asi ka bâsigo, Araha,
ngaigi ka magu,
ma na rutuni ka gisigisi.
17Na roto ka rangirangi.
Na akurua i vavearo,
ma na marangea ka sisiki.
18Na akurua ka gugusuhia.
Na marangea ka takiria na maveta,
ma na ano ki gisigisi ma ki angingi.
19Igo ko râ mamata i gupuna na asi.
Na tara iamu ki râ igê na rutuni.
Ma ki asa, ka bâsigi na peregamu.
20Igo ko bêngenira na kariamu,
manga na avanu ni sipi,
matena o Moise mo Aroni karu bâsurira.
Currently Selected:
KI 77: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
