KI 66
66
Visia koro God renia na marapeha iana#Ex 14.21; Js 3.14-17
1Igamu hato na enoni, mu hagarahasia na Araha!
Mu ngerengere ma kamu vagevage!
2Mu kiria God, i rongo raha na atana.
Mu hagarahasia bâraha.
3Mu vi tanga God, kamu vivi:
“Na tauhamu ka koro teha,
ma ka hagakonera na enoni.
Na raramohamu ki raha teha.
Tahema na merongamu ka bêtu tangago
ma ka magutenigo.
4Na ara ni enoni hato i maveta ka rahesigo.
Ngaira ka kiki, ka visigo raha.
Ngaira ka ki, ka hagahigasia na atamu.”
5Mu râ me, kamu gerigi na marâ, God ki bani tanugi,
na tauhana koro, ga hagakonera na enoni.
6Ngaia ki katoa, ki mamata na asi.
Na uvarika ka tarê igê na ve mamata.
I ngekana igia ka vagevage
renigi na marâ, i katogi.
7Na arahanga iana ki goga tare,
suria i raramohaga hunia.
Ngaia ki hahutugira na enoni hato, ga pe rahesia.
I bara ta na enoni, vige urapusia.
8Igamu hato na enoni i maveta hagenani
mu kasia akê na God iamami
igê na ringemi raha.
9Ngaia ki katogami, kami tahitahi,
hanana na merongamami ka pe teharigami.
10God, igo ko bani uhungigami,
manga na gi, i hagamatarotaroa na siliva.
11Igo ko nakagami vê, kami tu igê na êtu,
ma ko hagamamasiaga apemami.
12Igo ko katora na merongamami, ka purigami so nga.
Na mamasiaga, ga tarahugami,
ka manga na gi ma na maganuha raha.
Ma i ngekê igo ko bani merâgami
tanga na agua ni tahinga.
13Inê be susu tangago i ruma ni rotu iamu.
Inê be tagarenigi tangago na marâ, gê bani surugi.
14Inê be hagamonarigi na suruha iaku,
matena ga tarahuê na bagabevoani.
15Inê be susu tangago igê na bea ni vogasiha
renira na sipi, na puruka ma na goti,
ma na robona ki page akê i vavearo.
16Mu karingê, igamu hato na enoni, mu tê viteana na Araha,
menê be hagarongogamu renigi na tauhana God tangê.
17Inê kê avarasia na Araha.
Inê kê kiria ma kê visia raha.
18Manga ve tenia na eraha igê na aitangihaku,
na Araha ki asa, vige aganariê.
19Ma God ki rongoê monari,
ma ki aganaria na nunginungi iaku.
20Inê kê hagarahasia God na Araha,
suria ngaia ki aganaria na nunginungi iaku,
ma ki hagabângenia tangê na takuiha tarema iana.
Currently Selected:
KI 66: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
