KI 65
65
Visia koro God renigi na mahatanga iana#Na vivita ma na ki iana o Tavite.
1God, i tuguhigami, mi hagarahasigo i Sione
ma kami hagamonarigi na suruha iamami tangago,
2suria go aganarigi na nunginungi iata na enoni.
Na ara ni enoni hato ka page râ me i pasimu,
3renia ga higera na tasi iata.
Na ginomami era ka aharêsigami,
ma igo ko bonotenigi.
4Ga babarisi na enoni, go atera
ma ko unira, ka goga igê na ruma ni rotu iamu.
I page togo na aitangihamami
renigi na korohamu i pasimu,
renigi na mahatanga iamu i Ruma ni Rotu apuna iamu.
5Igo ko aganarigami, suria go katogami, kami teha,
ma ko hagatahigami renigi na mena, go katogi.
Na enoni i maveta hagenani
mi na apanini hagatê na asi
ngaira ka hagêguri togo renigo.
6Igo ko raramohaga hunigo!
Igo ko nakagi na barani igê na atohani
renia na raramohamu raha.
7Igo ko hagapiova na asi, i ramo ma ki arobo,
ma ko hagamanapura na enoni,
ga katogi na perenga.
8Na enoni hato i maveta ka konetenigi bâraha
na tagaraha raha iamu.
Igê na botoni heri na maveta
na enoni hato ka vagevagesigi na tauhamu
ma ka ngerengere.
9Suria go marupea na mako,
igo ko hagarangisia,
ma ko katoa, ki korokoro ma ki ango.
Igo ko haganongagi na ve, ka gogogo.
Igo ko katogi na ngêra ka akê i maveta hagenani
surigi na katoha iamu.
10Igo ko hagarangisigi maninga na mu, ga hikirugi,
hanana ga avoka bâkoro.
Igo ko hagamarumua na mako,
hanana ga vavaka na ngêra.
11Na harisi ni ngêra ki koro teha suria na korohamu.
I na ara ni agua ka rakorako igê na ngêra.
12Na totoha ni sipi ka rako
igê na bena ni go igê na masusu
ma igê na tarihani na hungani nikâ.
13Na bena ni go ka gahuigi na sipi.
Ka rako na ngêra igê na maruguni.
Surigi na ara ni hinua hato
na enoni ka kiki ma ka ngerengere,
suria ga vagevage.
Currently Selected:
KI 65: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
