KI 22
22
Na mamasiaganiha ma na tahinga#Na ki iana o Tavite.
1God iaku, God iaku,
renia ta ko paniê?
Inê kê gegege ma kê avarasigo,
ma kê arisigo bâraha.
2Na tangiani ma na bungiani
inê kê avarasigo, God iaku.
Igo ko pe aganaria na nunginungi iaku,
ma ki asa, be mauru, God iaku.
3Igo ko Araha raramohaga hunigo,
ma na kare ni Isiraele ka visigo raha.
4Na uvarimami ka hagêguri togo renigo.
Ngaira ka tako togo renigo,
ma igo ko hagatahira.
5Ngaira ka avarasigo ma ka tahitahi.
Ngaira ka hagêguri togo renigo,
ma ka pe raruni era renigo.
6Ngaira ka pe katoê manga vi na enoni,
ma ka puriê hete manga na sure.
Na enoni ka meêmarabe,
ma ka kikiteniê.
7Na ara ni enoni, ga bâsiê,#Mt 27.39; Mk 15.29; Lk 23.35.
ka tamasi erasiê.
Ngaira ka hagakokohara tangê,
ma ka karikaringe bê reniê.
8Ngaira ka vi tangê, ka vivi:#Mt 27.43.
“Igo ko hagêguri togo renia na Araha!
Tanu hega ki pe hagatahigo?
Manga vi na Araha, ma ki takuigo,
tanu hega ki pe tamanigo?”
9Igo ko vateê na mauriha,
matena gê vora me.
Igo ko anumasiê,
matena gê susu mênga.
10Inê kê bani hagêguri togo renigo,
haganega tenia gê vora me.
Igo na bani God iaku,
tenia na matena na kenaku ki aparê me.
11Siana ko hagarisiê,
suria gê mamasiaga.
Ma ki asa ta na enoni, vige tamaniê,
nga noga ma igo.
12Na merongaku ka rihiê mangara na puruka mane.
Na puruka mane ramo ni Basani ka rihiê.
13Ngaira ka manganga mangara na o vasiga,
ga ngurunguru ma ka ngasiê.
14Na raramohaku ki anu,
manga na ve i mamata i ano.
Na apeku hagenani ki mangusi.
Na bunaniaku ki mameaga.
15Ki mamata rârâ vê na rioku.
Na meaku ki puru i bêparegoku.
Igo ko paniê,
matena gê tâ tanga na kiru.
16Rako na merongaku ka rihiê,
manga ga rihiê na totoha ni o vasiga.
Ngaira ka ahuragi
na rimaku ma na êgaku.
17Inê kê rataga rârâ,
ma ka oga so ma na suriku.
Na merongaku ka boreteniê,
ma ka makimaki teniê.
18Ngaira ka pile taisi renigi na gahu iaku,#Mt 27.35; Mk 15.24; Lk 23.34; Jn 19.24.
hanana viga tongani.
19Araha, siana ko hagarisiê!
Rêrê me ku hagatahiê!
20Gu anumasiê tenia na tatapa borahu.
Gu hagatahiê tenira na o ngegana.
21Gu hagatahiê tenigi na harata na o ngegana
ma tenigi na hota na puruka mane vasiga.
Igo ko tamaniê,
matena gê avarasigo.
22Inê be hagarongora na goaku, na kariamu,#He 2.12.
renia na hetamaniha iamu tangê.
Inê be visigo raha,
matena ga hakuhaku me tanga na hagarahenga.
23“Igamu na kariana na Araha,
mu visia raha.
Igamu na raraha iana o Jakobo,
mu kasia akê na Araha.
Igamu na kare ni Isiraele,
mu bêtuhia na Araha.
24Suria ngaia ki botage renira na enoni matareha,
ma ki takusigi na mamasiaganiha iata.
Ngaia ki pe murisigera,
ma ki tamanira hete,
matena ga avarasia.”
25Matena ga hakuhaku me na kariamu tanga na hagarahenga,
inê be visigo raha, Araha,
renia na hetamaniha iamu tangê.
I maata na enoni, ga rahesigo,
inê be tagarenigi na vogasiha iaku,
gê bani surugi.
26Na enoni, ga matareha, ka page ngê masu.
Na enoni, ga arâ ka rotu,
ka page visigo raha.
Inê kê nungigo, Araha,
hanana ga mauri koro tare.
27Na enoni hato i maveta
ka page takusia aporo na Araha.
Tenigi na ara ni agua i maveta hagenani
ngaira ka page aporo,
ka bêtu ka rahesia na Araha.
28Na marungaha ki na anina na Araha.
Ngaia ki marungira na enoni hato i maveta.
29Na enoni, ga paroparo,
ka page bêrusu i maana.
Na enoni, ga tahitahi mêngara,
ma na ani ga bani me nikâ
ka page bêrusu i maana.
30Na enoni i hemuri me
ka page tê viteana na Araha.
Na enoni ka page tarohenia na Araha
tangara na kareta.
31Ka page hagarongora na enoni, ga page vora me,
vi na Araha ki hagatahira na kariana.
Currently Selected:
KI 22: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
