KI 119
119
Na ramata iana na Araha
1Ga babarisi na enoni, ga matarotaro na parongata,
ma ka marupegi na ramata iana na Araha.
2Ga babarisi na enoni, ga arâ surigi na tamasiga iana,
ma ka tê viteana i mêrihata hagenani.
3Ga babarisi na enoni, ga mareha vige tasi,
ma ka toto surigi na obaniha iana na Araha.
4Araha, igo ko bani vategami na ramata iamu,
ma ko bonasigami, vigami marupegi maninga.
5Inê kê naasia bâraha, be toto surigo,
matena gê arâ surigi na tamasinga iamu.
6Manga gê takusigi tare na ramata hato iamu,
vikê ki asa iaku, vi ve maki.
7Inê be visigo raha i mêrihaku matarotaro,
matena gê hagesuringenigi na takotako oto iamu.
8Inê be têgi na ramata iamu.
Siana hagetage ko paniê.
Na tê viteani na ramata iana na Araha
9Manga i he na enoni haoru ki girara i paronga matarotaro?
Ki tuguhia, i marupegi na ramata iamu.
10Inê be toto surigo i mêrihaku hagenani.
Gu tamaniê,
hanana siana kê aharêngigi na ramata iamu.
11Inê kê bani nakagi na ramata iamu i na aitangihaku,
hanana siana kê guguruga tangago.
12Inê kê hagarahasigo, Araha.
Gu hagesuriê renigi na obaniha iamu.
13Inê be tarohenigi na ramata hato,
go bani visigi tangê.
14Inê kê mage ni râ surigi na ramata iamu
teharigi na ruruguha raha.
15Inê kê hagesuringenigi na tamasinga iamu.
Inê kê takotako renigi na hagesuringa iamu.
16Inê kê vagevagesigi na ramata iamu.
I asa iaku, be bonotenigi na tamasinga iamu.
Na vagevageha renigi na ramata iana na Araha
17Araha, gu korokoro tangê, na kariamu,
hanana gê mauri,
ma kê arâ surigi na hagesuringa iamu.
18Gu mavesia na obaku,
hanana ve giraragi na marâ koro ma na monariha
igê na ramata iamu.
19Inê kê mamahuara ma i maveta ikê.
Siana ko pinihigi na ramata iamu teniê.
20Inê kê angisia bâraha,
vi be aitangisigi tare na takotako iamu.
21Igo ko ramonira na enoni paroparo.
I era ngavê tangara na enoni,
ga aharêngigi na ramata iamu.
22Gu hagatahiê tenigi na guhata ma na kasi rurunga iata,
suria inê kê marupegi na ramata iamu.
23Na maneraha ka harikato reniê,
ma inê be takotako renigi na hagesuringa iamu.
24Na tamasinga iamu ka hagakoro obaku,
ma ka vateê na takotako koro.
Na togeaganiha ni marupeani na ramata iana na Araha
25Inê kê tâ i ano.
Gu hagamauriê, manga go bani surua.
26Inê kê visia mataha na mêrihaku hagenani,
ma igo ko aganariê.
Gu hagesuriê renigi na ramata iamu.
27Gu tamaniê, be aitangisigi maninga na ramata iamu,
ma inê be takotako renigi na mena iamu.
28Inê ki rugu bâraha na obaku.
Go hagaramoniê, manga go bani surua.
29Gu marupeê tenia na tara ni hagaparunga.
Gu takuiê ma ku hagesuriê renigi na ramata iamu.
30Inê kê bani atea na tara ni monariha.
Inê kê takusigi tare na tamasinga iamu.
31Inê kê oto surigi na hagesuringa iamu, Araha.
Siana kê raruni era renigo.
32Inê be hata ni têgi na ramata iamu,
manga vigo hagaraha nga na aitangiha tangê.
Na nunginungi ni aitangiha
33Araha, gu hagesuriê renigi na girarani na ramata iamu,
ma inê be marupegi tare.
34Gu ramatenigi na ramata iamu tangê,
hanana be toto surigi ma be marupegi
i mêrihaku hagenani.
35Gu tamaniê, be arâ surigi na ramata iamu,
suria gê vagevagesigi.
36Gu hagaobaniê renigi na tamasinga iamu
teharigi na ruruguha.
37Gu tamaniê, hanana siana kê takusigi na marâ purua.
Gu korokoro tangê, manga go bani surua.
38Gu hagamonaria na suruha iamu tangê, na kariamu,
na suruha iamu tangara na enoni, ga tê viteamu.
39Gu hagatahiê tenigi na guhata, gê magutenigi.
Na takotako iamu ka koro teha ngavê!
40Inê kê obania ni têgi na ramata iamu.
Gu hagamauriê,
suria i oto na tauhamu.
Na hagêguringa togo renigi na ramata iana na Araha
41Araha, gu hagabângenia na takuiha tarema iamu tangê,
ma ku hagatahiê, manga go bani surua.
42Vikê inê kê girara gê aramira na enoni, gê guhariê,
suria gê hagêguri togo renigi na tamasinga iamu.
43Gu tamaniê, hanana ve tamasi monari tare,
suria ga raruni togo renigi na takotako iamu.
44Inê be ama ni marupegi nga na ramata iamu,
tare ma tarema.
45Inê ki mataku tangê, gê hagaotoa na mauriha iaku,
suria gê uhungia,
vigê arâ surigi na hagesuringa iamu.
46Inê be tamasigi na ramata iamu tangara na maneraha,
ma ki asa iaku, be maki.
47Inê kê vagevagesigi na ramata iamu,
suria gê tenigi bâraha.
48Inê kê hagahigasigi na ramata iamu, gê tenigi.
Inê be takotako renigi na hagesuringa iamu.
Na raruniha togo renigi na ramata iana na Araha
49Gu takusia na suruha iamu tangê, na kariamu,
suria gê raruni togo renia.
50Inê kê ramoramo igê na mamasiaganiha iaku,
suria na suruha iamu ki hagamauriê.
51Henaka na enoni paroparo ka rurusiê tare,
ma inê kê pe murisigegi na ramata iamu.
52Na tamasinga iamu i nago kere vê noga
inê kê takusigi aporo,
ma ngaira ka hagagatagataniê.
53Matena gê bâsira na enoni era,
ga aharêngigi na ramata iamu,
inê kê mangariaga teha.
54I maveta ikê, gê mamahuara igê,
na ramata iamu ka na ki iaku.
55Surigi na bungiani inê kê takusigo, Araha,
ma kê takotako renigi na ramata iamu.
56Inê kê vagevage,
suria gê têgi na tamasinga iamu.
Na totosuriana na ramata iana na Araha
57Araha, igo getego ma kê obanigo.
Inê kê surua, vigê têtê viteamu.
58Inê kê nungigo i mêrihaku hagenani,
hanana go takuiê, manga go bani surua.
59Inê kê bani bâ i mêrihaku,
ma kê surua,
vigê arâ surigi na hagesuringa iamu.
60Inê kê pe hagarihu,
ma kê hata ni têgi na ramata iamu.
61Henaka na enoni ka bani tutu kariê,
ma inê kê pe bonotenigi na ramata iamu.
62Igê na gupuni na bungiani inê kê rite,
hanana gê visigo raha renigi na katoha oto iamu.
63Inê ki na tamata na enoni hato, ga rahesigo,
ma na enoni hato, ga têgi na ramata iamu.
64Na maveta hagenani ki hagabângenia na takuiha tarema iamu.
Araha, gu hagesuriê renigi na ramata iamu.
Na ramata iana na Araha ka na marâ raha
65Araha, igo ko bani hagamonaria na suruha iamu,
suria igo ko koro tangê, na kariamu.
66Gu vateê na tako mataha ma na giraraha,
suria inê kê tongesurigi na ramata iamu.
67Matena i mamênga, vigu hagaitangiê, inê kê râ tasi,
ma i ngekê inê kê tê viteamu.
68Igo ko koro teha ngavê ma nikâ na tauhamu!
Gu hagagirarê renigi na ramata iamu.
69Na enoni paroparo ka hagahagaparu reniê,
ma inê kê tê viteamu i mêrihaku hagenani.
70Na enoni ngegana ka bekabekaga,
ma inê kê vagevagesigi hete na ramata iamu.
71Na hagaitangiha, i tarahuê, ki koro tangê,
suria i hagagirarê renigi na ramata iamu.
72Tangê inê, na ramata iamu ka teharigi
na ara ni haga hato i maveta hagenani.
Na ramata iana na Araha ka oto
73Igo ko hagavoraê ma ko marupeê.
Gu vateê na aitangiha,
hanana gê hagesuringenigi na ramata iamu.
74Na enoni, ga rahesigo, ka page vagevagesiê,
matena ga bâsiê,
gê hagêguri togo renia na suruha iamu.
75Araha, inê kê bani girara, vi na katoha iamu ka oto,
ma ko hagaitangiê, suria go toto hesuri.
76Gu hagaramoniê renia na takuiha tarema iamu,
manga go bani surua tangê, na kariamu.
77Gu takuiê ma ku hagamauriê,
suria inê kê vagevagesigi na ramata iamu.
78Gu hagamakira na enoni, ga pe tê viteamu,
suria ga hagatoraiê,
ma tangê inê, inê be takotako renigi na hagesuringa iamu.
79Na enoni, ga rahesigo, ka râ me i pasiku,
hanana ge aitangisigi na ramata iamu.
80Gu katoê, be têgi maninga ngavê na ramata iamu,
hanana siana kê maki.
Na nunginungi ni tahinga
81Araha, inê ki meme na apeku,
suria gê naasigo, vigo hagatahiê.
Inê kê raruni togo renigi na tamasinga iamu.
82Inê kê hagamera maaku,
suria gê bâbâ renia na marâ, go bani surua.
Ma inê kê hagate, kê vi:
“I na keta ko page tamaniê igê?”
83Henaka gê manga na kakagana na apira,
ma inê kê pe bonotenigi na ramata iamu.
84I arihu me noga, manga i he kê naasigo?
I na keta ko page hagaitangira igê na enoni,
ga merongasiê, na kariamu?
85Na enoni paroparo, ga haritohegi na ramata iamu,
ngaira ka suta kariê.
86Na ramata hato iamu ka marisini, viga tongesurigi.
Na enoni ka merongasiê purua ma.
Gu tamaniê!
87Ngaira ka haga ni nahuiê be meme,
ma inê kê ama ni tê viteamu nga.
88Go korokoro tangê igê na takuiha tarema iamu,
hanana gê marupegi na ramata iamu.
Na tongesuriani na ramata iana na Araha
89Na tamasinga iamu, Araha, ka goga tare ma tarema.
Ngaigi ki tâtâ nga i pasimu.
90Na totosuriha iamu ki goga tare, ki bê ki arâ.
Igo ko bani naka na maveta igê na atohana,
ma ki asa, vige guru tenia.
91Na ara ni marâ hato ka goga mataro me i ngekê,
suria igo ko bonasira vikana,
ma ngaira ka tê viteamu.
92Manga ve pe vagevagesigi na ramata iamu,
inê be bani me renigi na mamasiaga iaku.
93I asa iaku hagetage, be bonotenigi na hagesuringa iamu,
suria igo ko hagamauriê renigi.
94Inê ki na kariamu. Gu hagatahiê!
Inê kê uhungia tare,
hanana gê arâ surigi na ramata iamu.
95Na enoni era ka ahi kariê, viga nahuiê kê meme,
ma inê be takotako renigi na ramata iamu.
96Inê kê bani girara, vi na ara ni marâ hato ka pe teha,
nga noga ma na ramata iamu ka teha.
Na marupeana na ramata iana na Araha
97Inê kê tenigi bâraha na ramata iamu.
Inê kê takotako renigi igê na tangiani hagenani.
98Na hagesuringa iamu ki goga tare igê na aitangihaku,
ma ki katoê, kê takotako mataha teharira na merongaku.
99Na aitangiha iaku ki teharigi
na anita na mane hato ni hagesuringa,
suria gê takotako renigi na hagesuringa iamu.
100Inê kê tako mataha teharira na me raha,
suria gê oto surigi na tamasinga iamu.
101Inê kê kitenigi na tarani, ga pe oto,
hanana gê tê viteamu.
102Inê kê pe hagêrahu ni râ surigi na hagesuringa iamu,
suria igo kanigo hagesuriê.
103Na hagesuringa iamu ki mamaki ngavê tangê
teharia na pirui.
104Na ramata iamu ka katoê, kê tako mataha.
Tahema inê kê kitenigi na tarani hato, ga râ tasi.
Na ramata iana na Araha ka mavesigi na obata na enoni
105Na tamasinga iamu ki manga na ahame, i mavesiê,
hanana gê bâsia na tara.
106Inê be hagamonaria na tohenga iaku,
vigê arâ surigi na hagesuringa iamu.
107Inê kê mamasiaga teha ngavê, Araha.
Gu hagamauriê, manga go bani surua.
108Gu aganariê, Araha, matena gê visigo koro,
ma ku hagesuriê renigi na ramata iamu.
109Na mêriha iaku ki goga tare igê na perenga,
ma ki asa, be bonotenigi na ramata iamu.
110Na enoni era ka tutu kariê,
ma inê kê pe guguruga tangago.
111Inê kê têgi na ramata iamu tare, ki bê ki arâ.
Ngaigi ki hagakoro obaku bâraha.
112Inê kê bani vi, vigê marupegi na ramata iamu,
tare, mataro me kê meme.
Na ramata iana na Araha ka marupera na enoni
113Inê kê kitenira na enoni, ga obaherua renigo, Araha,
ma kê tenigi bâraha hete na ramata iamu.
114Igo ko anumasiê ma ko marupeê.
Inê kê hagêguri togo renia na suruha iamu.
115Mu tari era, igamu na enoni era,
hanana gê marupegi na ramata iana God iaku.
116Gu hagaramoniê, manga go bani surua,
hanana gê mauri ma kê pe nanasi baguru.
117Gu tamaniê, hanana ve ape tatara,
ma be takusigi tare na ramata iamu.
118Igo ko usitenira na enoni hato,
ga aharêngigi na ramata iamu.
Ngaira ka hagahagaparu ma ka harikato purua ma.
119Igo ko katora na enoni era i maveta manga na roro.
Tahema inê kê tenigi na hagesuringa iamu.
120Inê kê tatata, suria gê magutenigo,
ma kê magutenigi nikâ na suriha iamu.
Na tê viteani na ramata iana na Araha
121Na tauhaku ka koro ma ka oto.
Siana ko paniê tangara na merongaku.
122Gu suru tangê, hanana vigu tamaniê, na kariamu.
Siana ka merongasiê na enoni, ga erataga.
123Inê kê hagamera maaku,
suria gê naasia na hetamaniha tenigo,
hanana vigo hagatahiê, manga go bani surua.
124Go korokoro tangê renia na takuiha tarema iamu,
ma ku hagesuriê renigi na ramata iamu.
125Inê ki na kariamu.
Gu vateê na aitangiha,
hanana gê aitangisigi na hagesuringa iamu.
126Araha, gu gagêmaga i ngekê,
suria na enoni ka aharêngigi na ramata iamu.
127Inê kê tenigi na ramata iamu teharia na golo,
teharia na golo tararina.
128Tahema inê kê arâ surigi na tamasinga hato iamu.
Inê kê kitenigi na ara ni tarani era.
Na teniha ni têgi na ramata iana na Araha
129Na tamasinga iamu ka koro teha ngavê!
Inê kê arâ surigi i mêrihaku hagenani.
130Na hagararinga renigi na tamasinga iamu
ki mavesigi na obata na enoni, ga hite,
ma ki katora, ka tako mataha.
131Inê kê tangakuhigi na ramata iamu
ma kê angisigi bâraha.
132Gu ahariê ma ku korokoro tangê,
manga go koro tangara na enoni hato, ga takuigo.
133Gu hagaotoê, manga go bani surua.
Siana na eraha ki aharêsiê.
134Gu hagatahiê tenira na enoni, ga hagamamasiaga apeku,
hanana gê marupegi na ramata iamu.
135Gu tamaniê ma ku mavesia na obaku,
ma ku hagesuriê renigi na ramata iamu.
136Inê kê angiangi bâraha,
suria na enoni ka aharê igê na ramata iamu.
Na otoha na ramata iana na Araha
137Araha, na tauhamu ka oto,
ma ka oto nikâ na ramata iamu.
138Igê na otoha ma na monariha iamu
igo ko bani vategami na ramata, ga oto.
139Na mangariaganiha iaku ki tarê manga na gi i obaku,
suria na merongaku ka pe gagêmaga renigi na ramata iamu.
140Na suruha iamu ka tahetara renia vi i monari.
Inê, na kariamu, kê tenia bâraha.
141Henaka inê na enoni purua,
ma na enoni getera ka ruhiê,
inê ki asa, be bonotenigi na hagesuringa iamu.
142Na otohamu ki asa, vige page hato,
ma na ramata iamu ka monari tare.
143Ga bani tarahuê na anumanumaha ma na bagabevoani,
ma na ramata iamu ka hagakoro obaku.
144Na hagesuringa iamu ka oto tare.
Gu vateê na aitangiha, hanana gê mauri.
Na nunginungi ni tahinga
145Araha, inê kê avarasigo i mêrihaku hagenani.
Gu aganariê,
ma inê be tê viteamu.
146Inê kê avarasigo.
Gu hagatahiê,
hanana ve marupegi na ramata iamu.
147Igê na kahuagana na tangiana inê kê avarasigo.
Gu tamaniê,
suria gê raruni togo renia na suruha iamu.
148Surigi na bungiani hagenani inê kê bâbâ ma,
hanana gê takotako renigi na hagesuringa iamu.
149Araha, gu aganariê renia na takuiha tarema iamu.
Gu takuiê ma ku anumasia na mêriha iaku.
150Na enoni, ga merongasiê, ka hagarangiê me noga.
I asa hagetage iata, vige marupegi na ramata iamu.
151Ma igo ko ngahisiê, Araha,
ma na ramata hato iamu ka monari tare.
152I kere vê noga inê kê bani giraragi,
vi na hagesuringa iamu, ko bani nakagi,
ka goga tare, ki bê ki arâ.
Na nunginungi ni hetamaniha
153Araha, gu rigia na mamasiaganiha iaku ma ku hagatahiê,
suria inê kê pe bonotenigi na ramata iamu.
154Gu rohe pusiê ma ku hagatahiê.
Gu hagamauriê, manga go bani surua.
155Na enoni era ki asa, vige tahi,
suria ngaira ka aharêngigi na ramata iamu.
156Araha, na takuiha iamu ki raha teha.
Gu takuiê ma ku hagatahiê.
157Ka rako na merongaku ma na enoni, ga hagamamasiaga apeku,
ma inê kê pe murisigegi na ramata iamu.
158Inê kê makimaki tenira na enoni, ga murisigego,
suria ga pe marupegi na ramata iamu.
159Bâ, Araha, inê kê tenigi na hagesuringa iamu.
Na takuiha iamu ki goga tare.
Gu anumasia na mêriha iaku.
160Na monariha ka na hunani na tamasinga iamu,
ma na ramata hato iamu ka oto,
ma ki asa, vige page hato.
Na tenihani na ramata iana na Araha
161Na maneraha ka merongasiê purua,
ma inê kê pane henigi na ramata iamu.
162Inê kê vagevagesigi bâraha na suruha iamu,
manga na enoni i vagevagesigi na ruruguha raha.
163Inê kê kitenigi na hagaparunga hatohato,
ma kê makimaki tenigi
ma kê tenigi hete na ramata iamu.
164Hagepi i na ara ni tangiani inê kê visigo koro
renigi na tamasinga oto iamu.
165Na enoni, ga tenigi na ramata iamu,
ka oga igê na marapeha,
ma ki asa ta na marâ, vige hagavotarira.
166Inê kê naasia na tahinga tenigo, Araha,
ma kê marupegi na ramata iamu.
167Inê kê arâ surigi na hagesuringa iamu.
Inê kê tenigi i mêrihaku hagenani.
168Inê kê marupegi na ramata ma na hagesuringa iamu.
Igo ko girara na mêrihaku hagenani.
Na nunginungi ni hetamaniha
169Araha, gu aganaria na avarasiha iaku.
Gu hagamataha obaku, manga go bani surua.
170Gu aganaria na nunginungi iaku,
ma ku hagatahiê, manga go bani surua.
171Inê be hagarahasigo tare,
suria go hagesuriê renigi na ramata iamu.
172Inê be kirigi na ramata iamu,
suria ga oto na tamasinga hato iamu.
173Gu nanê tare, hanana go tamaniê,
suria inê kê arâ surigi na ramata iamu.
174Inê kê naasia bâraha na tahinga tenigo, Araha.
Inê kê vagevagesigi bâraha na ramata iamu.
175Gu hagamauriê, hanana gê hagarahasigo.
Na hagesuringa iamu ke tamaniê.
176Inê kê tarupe manga na sipi, i tasi.
Gu gariê, na kariamu,
suria gê takusigi tare na ramata iamu.
Currently Selected:
KI 119: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
