NA MARAMARÊRAVA 8
8
Na tamasinga iana na takoha mataha
1Rongo! Na takoha mataha ki tamasi raha.
Na aitangisiha ki ngere, hanana ga rongorongo.
2Na takoha mataha ki ura
igê na botoni na hungani hagarangia na tara
ma igê na matangani na tara.
3I na akereni na maani para ni hinua
hagarangia na tarâto banu ngaia ki ngere, ki vi:
4“Igamu, enoni hato, mu rongoê.
Inê kê tamasi tangara na enoni hato i maveta.
5Igamu na bonoani, mu uhungia kamu nahuni takoha.
Igamu mu bekabekaga, mu uhungia kamu takotako maninga.
6Mu rongo, suria gê tamasigi na marâ raha.
Inê kê tamasi kê pe hagaparugamu.
7Inê kê tamasia na monariha.
Inê kê kitenigi ngavê na hagaparunga.
8Na ara ni marâ gê visigi ka monari.
Inê kê pe hagahagabeka se vi ve toratora tamasinga.
9Tanga na ani i nahunia na aitangisiha
na ara ni marâ ka rongo mataha tanga.
Tanga na ani i nahuni takoha mataha
na ara ni marâ ka mave tanga.
10Mu atea nga na hagesuringa iaku
mareha vi na siliva.
Mu barigiê nga teharia na golo taranina.
11Inê takoha mataha,
inê kê koro teharigi na hê i raha na meni.
I berarogani na marâ hato mu barigigi
ki mareha rârâ ta na marâ vige maratoraku.
12Inê, takoha mataha, inê kê nahunia na aitangisiha.
Inê kê nahunigi na giraraha ma na hagakitakitana koro.
13Na hagahigasiana na Araha
ki vi na kiteniana na eraha.
Tahema inê kê kitenigi na paroparoha,
na heruruhinga, na bagatauha ma na hagaparunga.
14Inê kê nahunigi na hagaotonga koro,
na hagakitakitana koro, na aitangisiha ma na ramoha.
15Inê kê tamanira na maneraha
ka marungira bâkoro na enoni.
Inê kê tamanira na gavumane,
ka nakagi na ramata koro.
16Na ara ni maneraha i maveta,
na gavumane ma na ani ga nahuni ramoha
inê kê tamanira ka marungira maninga na kariata.
17Inê kê takuira na ani ga takuiê.
Na ani ga gariê, ka girara ga page tarahuê.
18Na mahatanga iaku ka na ruruguha,
na hagahigasiana, na ramana ma na otoha.
19Na mahatanga iaku ka teharigi
na golo ma na siliva taranini.
20Inê kê râ suria na tara na paronga koro,
surigi na tara tanga na otoha.
21Na ani ga takuiê inê kê haganahunira
renigi na ruruguha ga gâga hagahu,
ga page aharêsira ngavê.
22Na Araha ki hagavorê i nago kere vê noga,
i nago tarani na ara ni marâ hato.
23Ngaia ki hagavorê hagenago tatare
igê na haganegahani na marâ.
Inê kê bani vora me, ma na maveta ki mamênga.
24Inê kê bani vora me, ma na asi ka mamêngagi.
Inê kê bani vora me, ma na ve banga ka mamêngagi.
25Inê kê bani vora me, ma na barani ka mamêngagi.
Inê kê bani vora me, ma na hungani ka mamêngagi.
26Inê kê bani vora me, ma God ki kahu hagavoragi
na ano, na bemu ma na mako,
naka ma na kere momogana sisite ngavê.
27Inê kê oga i ngekana, matena ngaia ki naka
na vavearo igê na atohana
ma ki gasia na taritarihana na asi.
28Inê kê oga i ngekana
matena ngaia ki nakagi na vaha i vavearo,
ki katogi ka gogogo na maani na asi,
29ma ki bonasigi na asi
ka oga tonge igê na pereperegani.
Inê kê oga i ngekana, matena i nakagi
na gagatani na maveta.
30Inê kê oga henia manga vi inê
ka na mane ni hagaotonga iana.
Inê kê vagevage ngavê i na ara ni tangiani.
Inê kê obakoro ngavê, suria gê oga henia.
31Inê kê vagevagesia na maveta.
Inê kê vagevagesira na enoni.
32Tahema kakare, mu karingê.
Mu têtê viteaku, hanana mu page vagevage.
33Mu arâ surigi na hagesuringa tangagamu
hanana mu takotako mataha.
Siana kamu hagêrahu renigi.
34I babarisi na enoni i têtê viteaku,
i rêra i na ara ni tangiani i maani ruma iaku
ma ki anumasia na ruma iaku.
35Na enoni i tarahuê,
ngaia ki tarahua na mêriha
ma na Araha ki page korokoro tanga.
36Na enoni i pe tarahuê,
ngaia ki hagaratena marena.
Na enoni i kiteniê,
ngaia ki takuia na mera.
Currently Selected:
NA MARAMARÊRAVA 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
