NA MARAMARÊRAVA 6
6
Na ramoniha ka hagaotoa na ogaha
1Kakare, i hega, igo ko bani suru vari,
vi igo ko barua na hagaba iana na enoni getea?
2I hega, na tamasinga iamu maremu ka pe bani tugo vari?
I hega, na suruha iamu maremu ka pe bani rakugo vari?
3E, kakare, vikana igo ko oga
i na ababani rimana na enoni ngekana.
Hoi, go katokato vikê hanana go huhura:
go gaha râ tanga ma ko nungia,
hanana i nakago vê ko asitatara.
4Hemuri ko kahu tâ ko mauru ma ko mamaro.
5Siana ko gâga purupuru.
Go huhura tenia na basu manga na manu,
se manga na goti vasiga tenia na suta.
6Igo na babaga,
go boretenira na mangiri manga i he kaniga tagara,
hanana go nahuni takoha.
7I mareha rârâ ta na hitangita vige bêngenira
se vige ramatenira se vige hagaotora.
8Bâ, matena i rakorako na ngêra,
ngaira ka ruguni ka bêbagi haku,
nanê tanga na matena i marehasira igê na ngêra,
hanana vige ruguni.
9Igo na babaga, go tâ taraha?
I keta kanigo aharaga?
10Igo ko vi: ‘E, ve mêru noga sisite.
Be rumigi na rimaku ma be mamaro noga.’
11Ma matena go mêru,
na matareha ki gamorahigo manga na manero.
Na baguruha ki tarahugo manga na mane hanago.
12Na oga ngongogana, na eragani nuni
ki tokorenigi na hagaparunga.
13Ngaia ki rengasi maa, ki hekaruhi
ma na kakêna ki ususu rârâ
ma ngaia ki hagahagaparugo ma.
14Na eraha ki bara i bêna.
Ngaia ki varovaro me.
15Tahema na bagabevoana ki hagagasugania
ma ki page hitaria ngavê.
Ma ngaia ki asa vige tahi.
16Na tarani ge ono se gi pi
na Araha i makimaki tenigi ngavê:
17na enoni i paroparo,
na enoni ni hagaparunga,
na enoni ni nahunga ni enoni koro,
18na enoni i bara i bêna na eraha,
na enoni i gâga sutaga,
19na enoni i tohetohe vero,
se i katora na ahegoata ka hekorekore.
Na urapusiana na gamogamoha
20Kakare, go arâ surigi nga
na tamasinga ma na hagesuringa iaterua na enamu.
Siana ko bonotenigi.
21Go takusigi tare na tamasinga iaterua.
Go nakanaka igê na aitangihamu.
Gu surugi i riomu.
22Na hagesuringa iaterua ke bêngenigo i tara,
ke anumasigo suria na bungiana
ma ke hagaotogo igê na tangiana.
23Na hagesuringa iaterua ka na laiti mave
i mavesia na aitangihamu.
Na ramoniha iaterua ka hagabâsigo
renia na ogaha koro.
24Ngaigi ka anumasigo tenigi na tamasinga oho
iata na gete iata na mane getera.
25Siana ko gahe surigi na bâkorohata.
Siana na maata ka hagamugo ma ka angarigo.
26Na êrâ ko vuria renia ma na kere haga
i araria na mena na bereti.
Ma na gamogamoha, e,
igo ko vuria renia na mauriha iamu.
27I hega, na tuguni ki pe nonoro vari,
manga go tugunia na anguruna na gi igê na anga igê?
28I hega, na êgamu karu pe titihu vari,
manga go pupu igê na garapa?
29Na mêruha henia na gete iana na mane getea
ki manga ngekana nikâ, i vi, vi mamasiaganiha.
Ti ki mauru henia, e, na hagatotongoha ki arâ me.
30Na enoni ka pe ruhia bâraha na mane
i hanago, suria i magê ngavê.
31Ma ki manga vigo tarahua,
ngaia ki tuguhia, vi vuria na vurina hagepi kê nikâ.
Ma vari ki têtê tara renigi na nahuninga hato iana.
32Na enoni i gamogamo, ki bekabekaga,
suria i erasia marena ngavê.
33Ga page ramusia ma ka page hagamakia
ma na makiha ngekana ki gâga henia tare.
34Na hengariana ki katoa o vaniana
ki mangariaga ngavê
ma ki naka na siva i raharaha ngavê.
35Ngaia ki asa vige aganaria na toto.
Na mangariaganiha iana ki asa vige soso,
naka ma gi hita na haga.
Currently Selected:
NA MARAMARÊRAVA 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
