NA MARAMARÊRAVA 5
5
Siana na gamogamoha
1Kakare, karingagi na takoha mataha iaku.
Gu rongogi na aitangisiha iaku.
2Vikana igo ko girara go hagaotoa na ogaha iamu
ma na tamasinga iamu ka page hagabângenia
vi igo ko nahunia na aitangisiha.
3Gu hinarua na gete êragi i meramêru na mane.
Na gaviharana ki mamaki manga na pirui
ma na nunuguha iana ki matari manga na oile ni olive.
4Ma i murina ngekana ngaigi ki mahe ngavê
ma ki hagamamasiagago.
5Ngaia ki bêngenigo tanga na anoano,
tanga na agua iata na ani ga bani me.
6Na tara i râ suria ki na tara ni mera.
Ngaia ki pania na tara ni mêriha.
Ngaia ki tarupe ma ki pe girara.
7Kakare, mu karingê.
Mu tototo surigi tare na tamasinga iaku.
8Siana kamu hakunia na gete ngekana.
Siana kamu karikari hagarangia na ruma iana.
9Manga i mareha, na enoni ki hato vige hagahigasigamu,
ma igamu kamu page me karekare,
suria na mane i asa iata vige hetaki
ka page nahuigamu kamu meme.
10Ua, na enoni getera ka page nahunigi
na ruruguha iami ma na marâ hato mu tagara bâraha renigi.
11Igamu kamu page gegege igê na bea iami
ma kamu page meme igê
matena i gâga so ma na surimi.
12Igamu kamu bagahagêguri
ma kamu page gegege raha, kamu vivi:
‘Inê kê ngaritenigi tare na hagesuringa tangê
na hagaotonga ma na ramoniha.
Inê kê hagahuniê nga mareku!
13Inê kê pe bani karingagi na hagesuringa tangê.
Inê kê herepusigi ma na karingaku.
14Ki parama ma kê tahetara,
vi inê kê hagamakiê mareku i maata na enoni.’
15Go totono nga igê na vebanga iamu maremu,
i vi, go tototo suria na gete iamu maremu.
Go titi ve nga igê na vekaru iamu maremu,
i vi, go takuia ngaia getea ma.
16Na kare ni tara iamu ki asa vige tamanigo,
manga na ve tenia na vebanga i atani gogo mavê
i tara ma igê na mahera ni ruma.
17Ngaira nga na karemu kaniga tamanigo igo,
mareha vi na enoni getera râ.
18Go vagevagesia nga hete na gete iamu,
na gete go êragia hagâkani.
19Ngaia ki bâkoro ma ki manâhi.
Na gete iamu ke tâ i na aitangihamu.
Na hetakuiha iana ke angarigo ngavê.
20Kakare, tanu hega kani vigo tangasia râ
na gete iana na mane getea?
Tanu hega kani vigo matare râ
i susuna na gete iana na mane getea?
21I mareha ta na marâ vige pinihi tenia na Araha.
Ngaia ki hahutugira tare na enoni,
naka ma ga arâ i he.
22Na enoni i bagaparongana
ki naka na tu tanga marena.
Ngaia ki tutu igê na basu ni tasi iana marena.
23Ngaia ki meme,
suria i pe hagatogo suria marena.
Ngaia ki arâ igê na anoano,
suria i bekabekaga ngavê.
Currently Selected:
NA MARAMARÊRAVA 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
