NA MARAMARÊRAVA 30
30
Na tamasinga iana o Agure
1Igê na tamasinga iana o Agure o karena o Jake.
“God iaku, inê kê guna bâraha.
Inê kê uhungia makira ngavê
ma inê kê rumakaka.
2Inê ki bono ngavê na bêku.
I bâ manga vi inê ki mareha vi na enoni,
suria gê pe nahuni takoha.
3Inê kê pe hagesuringenia na takoha mataha.
Tahema inê kê pe aitangisia maninga rârâ God.
4Ta na enoni ki râ vari i pasina God ma ki aporo me?
Ta na enoni ki taua vari na roga i rimana?
Se i rumia vari na ve igê na gahu?
Ti ki atea na bogona na maveta?
Ti kani ngaia? Ti ka no karena?
Visia me!
5God ki hagamonarigi tare na ara ni tamasinga iana.
Ngaia ki manga na bêata
tangara na enoni hato ga rukuruku i pasina.
6Siana ko nakagi banu me nikâ
na tamasinga henigi na tamasinga iana,
i era ma ki ramonigo
ma ki hagatanga monari renigo, vigo hagaparu.
7God iaku, na marâ gi rua kanigê nungigo renirerua.
Gu haganahuniê renirerua
ma hemuri kê kahu meme.
8Tamaniê, siana kê hagaparu.
Siana ko nakê kê ruruguha se matareha.
Go vateê ma na ngêra go takusia vi arariê.
9Manga na ngêra ma ki aharêsiê,
vari gê page hagaigago, kê vivi
Na Araha, ti kani ngaia?
Ma ki manga gê matareha,
vari kê page hanago
ma kê page hagaerasia na atamu.”
Tani nikâ na maramarêrava
10Siana ko hagatoraia na enoni vurivuri tanga na avanuna, i era ma ki arangenigo ma ko mamasiaga.
11Tani na enoni ka arangenira o vaemata ma ka tamasi erasira kenata. 12Ngaira ka vi, vi ngaira ka matarotaro ma hete ga makoraga ngavê. 13Ngaira ka kasira akê mareta ma ka kasira so na enoni getera. 14Tani na enoni ka hagamamasiagara ngavê na enoni matareha. Ngaira ka tonga re na rivota i masi manga na tatapa borahu se na gê ni ahura ma ka ngaura na enoni i bara tangara.
15Na namu ki girararerua na tamasinga gi rua ma. Na ani gi tage: Vateê! Na ruata: Vateê!
16Na marâ ge he ga hagatage ma ki asa vige vivi “Uhu noga”: na agua iata na enoni ga bani me, na gete i gomara, na mako avagavaga i obania na rangi, ma na gi i asa vige vi: “Uhu noga.”
17Na enoni i memarabe o vaemana se i guguruga ngavê tanga kenana ki araria vi na ahetaronga ka ngaua se na tehe ka akarogi na maana.
18Na marâ ge he ka hagakoneê ma ki mareha vi ve aitangisigi. 19Manga i he na ahetaronga ki tarahua na tara iana i vavearo? Manga i he na ma ki tarahua na tara iana igê na hê? Manga i he na haka ki tarahua na tara iana i avoa? Ma manga i he na mane ma na gete karu tarahua na hegirareana?
20Na gete i gamogamo ki vivi, “Inê kê pe katoa rârâ na tarana i era! Tanga ngaia na gamogamoha vari ki na marâ purua ma i manga i ngêngê se i taruhia na harana.
21-23Na tarani ge he na enoni ka usitenigi: na enoni vurivuri ki voravora re na maneraha, na enoni bekabekaga ki ngêngê masu aharêngia, na gete era ki auragi, ma na kere gete rakuraku ki panea râ na avanuna.
24Na marâ mamauri ge he i maveta ka taromega ma ka girara teha ngavê: 25na mangiri, suria ngaira ka rurugi haku na ngêra tanga na matena i marehasira igê na ngêra; 26na kiki, suria ngaira ka pe ramoramo ma ka tagarahigi na robota igê na hê; 27na pê, suria ngaira ka pe nahunia na ani vige bêngenira ma ngaira ka arâ harahara; 28na tata. Igo ko girara go taura i rimamu ma ngaira ka gâga i ruma raha iata na maneraha.
29Na marâ mamauri ge he ka kasikasi uga: 30na laione, suria ngaia ki ramo teharira na marâ hato mamauri ma ki asa hagetage vige magu; 31na goti mane ma na kua mane, ma na maneraha i maata na kariana.
32Manga go hagarahasigo maremu se go mangariaga, go takotako noga ma ko herehere pusia na haramu.
33Manga go taketake na tavoni na susu, ngaia ki voravora re na totona; manga go tahurua na barisuna ta na enoni, na gapu ki arâ me; manga go hagamangaria ta na enoni, igamurua kamuru page heariha.
Currently Selected:
NA MARAMARÊRAVA 30: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
