NA MARAMARÊRAVA 29
29
1Manga go ama ni togeaga nga ko usisitenigi na hagaotonga tangago, na hagaitangiha ki page parama ma ki tarahugo, ma ki asa vigu tahi.
2Manga na gavumane ma ki koro, na enoni ka vagevage. Manga na gavumane ma ki era, na enoni ka mamasiaga.
3Manga go têtê suria na takoha mataha, o vaemamu ki ageagesigo. Manga go takuira na êrâ, igo ko page têtê tara renigi na nahuninga iamu.
4Manga na maneraha ma ki ototo na parongana, na enoni ka akê me bâkoro. Manga vi ngaia ma ki vanasigi ma na haga, ngaia ki hagaerasia ngavê na agua.
5Manga go tamasi sukasuka tanga na tamamu, igo ko naka na etu tanga.
6Na enoni era ka votavota igê na basu na bagatauhata, ma na enoni koro ka vagevage ma ka obâbakoro.
7Na enoni koro ka giraragi na marâ ga oto tangara na enoni matareha viga nahunigi ma na enoni era ka pe hagaregi rârâ.
8Na eragani nuni ki girara i hagagonera na enoni hato i hinua ma na enoni i nahuni takoha ki hagabungira.
9Manga na enoni ni takoha ma ki hagakotia na ani i pe nahuni takoha, na enoni i pe nahuni takoha ngekana ki ruru ma, ki ngerengere ma, ma ki guhaguha.
10Na enoni ni nahunga ni nuni ka kitenira na ani ga koro ma ka oto na parongata, ma na enoni koro ka manatangenira hete.
11Na enoni bekabekaga ka mangariaga mave ma na enoni ni takoha ka piringiape ma ka munigi so ma.
12Manga na maneraha ma ki aganarigi na hagaparunga, na gavumane hato iana ka page vora re na enoni ni hagaparunga.
13Na enoni matareha ma na ani i hagamamasiaga karu tagenaterua ma vikê: na Araha ki vatererua karu tonga na maaterua.
14Na maneraha i suria na enoni matareha igê na monariha, ngaia ki page maneraha arihu.
15Na ramusiha ma na ramoniha karu koro tangara na kare. Manga na kare ma ka arâ suri barisuta ma, ngaira ka page hagamakira kenata. 16Manga ga rakorako na enoni era ka hemarungi, na eraha ki ama ni akê me nga. Ma na enoni koro ka page bâsira ga votavota.
17Hagaotoa o karemu ma hanana go page ageagesia tare, suria ngaia ki asa vige page hagamakigo.
18Manga i mareha na enoni vige tamasigi na ramata iana God, na enoni hato ka page aharê ngavê. Ga babarisi na enoni ga marupegi na ramata iana God.
19I asa vigu hagaotoa na karemu igê na tamasinga. Vari ngaia ki rongorongogiraragi ma ki asa vige râ surigi.
20Na enoni i pe tamasi takotako ki era teharia na ani i bekabekaga.
21Manga go vatea na kariamu na ani mavê na marâ i obania tenigo haganega me matena i sisite, ta na tangiana ngaia ki page teharenigo.
22Na enoni ga bagamangamangariaga, ngaira ka hagavoregi na hekorekoreani ma ka rakorako na tarani ga pe koro.
23Manga go paroparo, igo ko page vota. Manga go nakago so maremu, na enoni ka page hagarahasigo.
24Manga na enoni hanago ma ki megotongani na marâ i hanagoa, igo ko hagaratemu maremu, suria manga go tamasia na monariha igê na kotiha, na hagaitangiha ki page tarahugo.
25Manga go takotako bâraha renigi na tamasinga iata na enoni renigo, igo ko tu karigo maremu. Gu hagêguritogo renia na Araha ma ko apeape hatara.
26Na enoni ka uhungia viga manatangenia na ani i nahuni ramoha. Ma ngaia getea ma na Araha ki girara i haganahunigo renigi na marâ i oto tangago.
27Na enoni koro ka mamakuku tenira na enoni era, ma na enoni era ka mamakuku tenira na enoni koro.
Currently Selected:
NA MARAMARÊRAVA 29: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
