PILIPI 2

Arâ suria na parongana o Kirisito

1Manga vi o Kirisito, ma ki marungia na mêrihami hagenani, igamu kamu nganganihaga renia vari? Na hetakuiha iami ki pe hagaramonigamu vari? Igamu kamu pe obahaku henia na Higona Apu vari? Igamu kamu pe hekorokoro, ma kamu pe heanumasige vari? 2Hoi, inê kê kanukanugamu, kamu katoê, kê vagevage ngavê, renia mu obahaku igê na takotakoha iami, ma igê na hetakuiha iami, ma kamu heaganari igê na marâ hato igê na mêrihami hagenani. 3Siana kamu tanugi na marâ, suria vi igamu kamu hengari, ma kamu hetagetage, se suria vi gamu parunigamu hagaborâ. Ma ki tuguhigamu, mu heharitagi, ma siana kamu takusigamu maremi, vi igamu kamu koro teharira na enoni getera. 4Siana kamu takusigamu maremi ma, ma kamu takusira nikâ hete na enoni getera. 5I tuguhigamu, vigamu paronga manga o Kirisito Jesu, i bani paronga vikê: 6“Ngaia ki tarema i God,

ma ngaia ki pe maresuria,

vi ngaia ki God,

henaka ngaia ki oto tanga.

7Ma igê na obaniha iana marena,

ngaia ki naka vê,

ma ki vora renia na kare rakuraku.

Ngaia ki vora renia na enoni,

ma ki mauri mangara na enoni.

8Ngaia ki kasia so marena,

ma ki tê viteana God tare,

henaka i tarahua na mera:

na mera nga iana igê na kuruse.

9Tahema God ki kasia akê, ki teha,

ma ki katoa, ki rongo raha na atana

teharigi na ara ni ata hato,

10hanana ngaira hato, ga oga

i pasina God, ma i maveta,

ma ngaira hato, ga bani me,

ka susure, ma ka bêtuhia,

ma ka hanetasia o Jesu,

11ma hanana ngaira hato

ka tarohenia mataha,

vi o Jesu Kirisito

ki na Araha iata,

ma ka visia raha God Vaemana renia.

Mu manga na laiti tangara na enoni

12Manga ngekana, kariaku hetakui, matena gê oga henigamu, igamu kamu tê viteaku tare, ma i ngekê, matena gê pe oga henigamu, igamu kamu ama ni tê viteaku nga. Mu magutenia ma kamu hanetasia God, ma kamu uhungia nga, vi gamu tahitahi ki bê ki arâ. 13Renia God ki tagara tare i pasimi, hanana vi gamu agana, ma kamu girara mu tanugi na marâ, ga râ suria na katoha iana marena.

14Siana kamu hagagege, se vi gamu hetuguri igê na ara ni marâ, mu tanugi, 15hanana ga matarotaro na parongami, ma ka ototo, manga i marisita na karena koro God, ga oga i maveta i pasita na enoni, ga era ma ka tasitasi tare. I tuguhigamu, vigamu mavesira mangagi na higu, ga mave i vavearo, 16matena mu tarohenia tangara na taroha renia na mêriha mora. Manga mu katokato vikana, inê kê page girara, gê ageage renigamu igê na Tangiana, i page arâ me igê o Kirisito. Manga ngekana, ki tongatonga na girarana, vi inê kê pe tagara purua ma, matena gê mangusi renia na tagaraha.

17I pe asa, vi ge nahuiê be me. Tahema ki bâ, manga vi na gapuku ki gogo igê na vogasiha na tongesuri iami, mu tagarenia tanga God. Manga gê me, inê kê vagevage, gê megamu vage. 18Ma ki tagenana ma, i tuguhigamu nogami, vi gamu vagevage, ma kamu meêvage.

O Timoti mo Epaporotito

19Inê kê tongesuria, vi na Araha o Jesu ki page hagamarumungeniê, kê hagatorangenia rêrê o Timoti tangagamu, hanana na tarohami ki hagakoro obaku. 20Ngaia getea ma ki obahaku heniê, ma ki obania bâraha maninga, vi tamanigamu. 21Na enoni hato getera ka hemasesi ma, ma ka pe takusigi na marâ, o Jesu Kirisito i obanigi. 22Ma igamu nogami kamu bani girara, vi ngaia ki bani manisingenia na taroheniana na Taroha Koro, renia ngaia ma inê kamuru tagara haku manga o vahemana garu tagara haku. 23Tahema inê kê takusia, vi gê hagaguhia vê rêrê tangagamu, ma na marâ gi tage ve girara i nago, vi ngaira ka page he nakê. 24Ma inê kê tongesuria, vi na Araha ki page hagamarumungeniê, hanana gê vatugigamu rêrê, inê mareku.

25Inê kê takusia, vi i tuguhiê, be hagaguhia tangagamu o Epaporotito, na goaka igê na tongesuriha. Ngaia ki tamaniê bâraha igê na tagaraha, ma ki ramoramo pusia na Taroha Koro. Igamu kamu bani hagatorangenia me, ki tamaniê. 26Ngaia ki angisia, vi ge bâsigamu, ma ki tako bâraha, renia igamu kamu rongoa, vi ngaia ki maeha. 27I monari, ngaia ki maeha ma ki haga ni me, ma God ki takuia: mareha vi ngaia ma, ma inê nikâ, suria ngaia ki hagabarasia, vi ge tarahuê nikâ ta na mamasiaganiha. 28Tahema i hataera bâraha na apeku, vi ve hagatorangenia tangagamu, hanana vi igamu kamu vagevage aporo, matena mu bâsia, ma ke hato na takoha iaku renia. 29Hoi, igamu kamu unia banu i pasimi, ma kamu vagevage, manga i marisimi, suria igamu ma ngaia kamu tongesuria na Araha. I tuguhigamu, vigamu hanetasira na enoni, ga manga ngaia, 30suria ngaia ki kasi manavana, ma ki haga ni me renia na tagaraha tanga o Kirisito, hanana ngaia ki tamaniê, suria i asa iami, vi gamu tamaniê igamu.

Currently Selected:

PILIPI 2: KCB

Highlight

Copy

Compare