HAGARAHENGA 19
19
Na ogaha ni matarotaroha i maana God
1Na Araha ki hagatora o Moise, 2ki torea na tamasinga iana tangara na Isiraelita hato. Ngaia ki vi: “Mu paronga koro ma kamu ototo, suria inê na Araha God iami inê nga paronga koro ma kê oto. 3Na ara ni hitangimi ki tuguhia vi hagahigasia kenana ma o vaemana ma ki marupea na tangiana ni mamaroha, manga gê bani naka me tangagamu. Inênga ka na Araha God iami.
4“Siana kamu murisigeê, hanana vigamu hagarapera na ataro. Siana kamu tagarahigi na nunuta na ataro renigi na golo ma na marâ vigana, hanana vigamu rahesira. Inênga ka na Araha God iami.
5“Manga mu nahuia na ganiana tanga na vogasiha ni tonganiha, mu ototo nga surigi na ramata, gê bani nakagi tangagamu, ma inê kê kahu aganaria na vogasiha. 6Mu ngaua nga na hasigona igê nga na tangiana mu nahuia igê na ganiana, se igê na ruata na tangiana. Manga tagua na hasigoni ma ka hitahita râ igê na oruta na tangiana, mu sungigi râ nga, 7suria ngaigi ki pe matarotaro suria na hagesuringa na rotu. Manga ta na enoni ma ki ngaugi, inê ki asa be aganaria na vogasiha. 8Na enoni i ngaugi ki tasi, suria nga ki katogi na marâ apuna re vi na marâ purua ma. Vikana ka page paia hura tenira na kariaku.
9“Matena ka maua na mu iami, siana kamu huhuhu na koni igê na akirini i mu, ma siana kamu rugurugu aporo râ nikâ. 10Siana kamu rugurugu aporo râ nika igê na pariki ni vaini iami, hanana vigamu husigi na guani i hita vê, se vigamu ruguni na guani i vota. Mu nakanaka mavê tangara na enoni matareha ma na mahuara. Inê nga ka na Araha God iami.
11“Siana kamu hanago, se vigamu hagahagabeka, se vigamu hagaparu. 12Siana kamu tohetohe reniê, manga mu pe takusia, vigamu hagamonaria. Siana kamu gâga erasiê vikana. Inê nga ka na Araha God iami i maata na enoni. 13Siana kamu hagabekasia na enoni se vigamu hanago tenia. Siana kamu hagababe vigamu vurira na enoni ga tagara tangamu naka ma vi suria ma na tangiana gi tage.
14Siana kamu tamasi erasia na enoni i pungu na karingana. Siana kamu naka hepusi i tara ta na marâ karia na enoni i guru na maana, hanana vi tapasu igê. Mu têtê viteaku nga. Inênga ka na Araha God iami.
15“Igê na kotiha ki tuguhigamu, vigamu surira na enoni igê ma na otoha. Siana kamu panepane henia na enoni se vi suria ngaia ki matareha, se vi suria mu magutenia na enoni, suria vi ngaia ki ruruguha.
16“Siana kamu tokorenigi na hagaparunga renia ta na enoni. Igê na kotiha siana kamu hagaparu se vi mu pinihia ta na marâ, se vi mu hagatoraia na enoni, i era ma ka suria ki meme na enoni, ga hagatamasia. Inê nga ka na Araha iami.
17“Siana kamu ama ni mangariaga nga tanga ta na enoni. Mu hagaotoa nga hete na berarogami, i era ma kamu hagaratemi maremi renia ngaia. 18Siana kamu naka na siva tanga ta na enoni. Siana kamu ama kikitenia nga ta na enoni. Mu takuira nga hete na enoni getera manga igamu maremi. Inê nga ka na Araha iami.
19“Mu marupegi na ramata iaku. Siana kamu katora na togoha iami ka rikihira na ani ga tora getera. Siana kamu hasihasi i mu gi tage na ngêra ga tora hegitigi. Siana kamu tuguni renia na tuguni ga tagarahia renirerua na marâ, garu tora hegitigi.
20“Manga na gete na kare rakuraku ma ki vora re na gete iana râ ma na mane ma ka pe vuripusia se vige rupasia, ma na mane getea ki mêru henia, hoi, ka page hagaitangirerua, ma siana ka nahuirerua karu meme, suria na gete ka na kare rakuraku. 21Na mane ngekana ki tuguhia, vi torea na sipi mane tanga na ruma na gahu iaku tanga na vogasiha ni kasi meni. 22Na mane ni vogasiha ki vogasi renia, hanana na mane ngekana ki matarotaro aporo, ma inê God kê page bonotenia na tasi iana.
23“Matena mu atata vê i Kanani ma kamu hasihasi igê na ani mavê na apinige ni ngauha, mu takusia nga, vi na guani ki apu tangagamu vigamu ngaugi surigi na harisi gi oru hagenago. Siana kamu ngaugi igê na matena ngekana. 24Ige na heta na harisi na guani hato na apinige kamu tagarenigi nga tangê inê na Araha, hanana mu visiê koro renigi. 25Igê na rimata na harisi kamu kahu ngaugi na guani. Manga mu katokato vikana, na apinige ni ngauha iami ka page rasirasi. Inênga ka na Araha God iami. 26Siana kamu ngaugi na ganiani ga gagapuga mênga.
“Siana kamu katogi na ani mavê na girarasiha ma na mangata ma na marâ hato vigana.
27“Siana kamu gurigi na apaniniheri na bêmi se vigamu tapurugi na taboturimi, 28se vi mu rapurapu se vi mu haraharasigamu maremi, matena mu angiangi maramara. Inê nga ka na Araha.
29“Siana kamu hagamakira ka karemi, suria vigamu kasira ka voravora re na êrâ igê na agua ga vogasia igê na ataro. Manga mu katokato vikana, igamu kamu murisigeê ma kamu aharira na ataro, ma na rongoha era ma na eraha ka page aharêsia na agua.
30“Mu marupea hete na tangiana ni mamaroha. Mu hagahigasia na ruma na hagarahenga iaku. Inênga ka na Araha.
31Siana kamu totora na tamasinga tenira na enoni, ga matunira na atarota na enoni ga me. Manga mu katokato vikana, igamu kamu pe matarotaro. Inênga ka na Araha God iami. 32Mu hagahigasira na gemêa ma kamu hanetasira. Mu hagahigasiê maninga. Inênga ka na Araha.
33“Siana kamu katora bera na mahuara i berarogami. 34Mu katora hete manga vi ngaira ka na goami na Isiraelita. Mu takuira nga manga igamu maremi. Mu takusia tare, vi i nago igamu kamu mahuara i Esipito. Inênga ka na Araha God iami. 35Siana kamu hagabekasira na enoni, matena mu hagararingenigi na borahusigani, na higahigani se vi ki hita. 36Mu hagararingenigi bâkoro hete na higahigani, na borahusigani ma vi ki hita. Inê nga ka na Araha God iami ma kê bêngenigamu hura tenia i Esipito. 37Mu marupegi na ramata ma na tamasinga hato iaku. Inênga ka na Araha.”
Currently Selected:
HAGARAHENGA 19: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
