HAGARAHENGA 18
18
Na ani mavê na rongoha era ki apu
1Na Araha ki hagatora o Moise, ki hagatarêngenia na tamasinga iana tangara na Isiraelita. 2God ki vi: “Inê nga ki na Araha God iami. 3Siana kamu amaka surigi na bagatauhata na ai ni Esipito, na agua mu oga igê i nago, se vi surigi na bagatauhata na ai ni Kanani, na agua gê bêngenigamu tanga. 4Mu marupegi nga na ramata iaku ma kamu têtê viteaku. Inênga ka na Araha God iami. 5Mu arâ surigi na ramata ma na hagesuringa, gê vategamu renigi. Manga mu arâ surigi, igamu kamu page tahitahi. Inênga ka na Araha God iami. 6Inê na Araha kê nakagi tangagamu na ramata igê.
Siana kamu merarongo era na goami.
7Siana kamu hagamakira o vaemami, suria vigamu merarongo era kenami.
Siana kamu hagamakira kenami igê na tarana vikana. 8Siana kamu hagamakira o vaemami i heroga, suria vigamu merarongo era tani na gete iana.
9Siana kamu merarongo era kesimi se keogami tonge se kesimi se keogami râ ma, naka ma vi ngaia kamu tage raha i ruma gi tage. 10Siana kamu rongo era henira ka kareta na karemi, i era ma kamu hagamakigamu maremi.
11Siana kamu rongo era henira ka karena na hitangita na gete iana o vaemami, i heroga, suria ka karena ngegana nikâ kani kesimi se keogami. 12Siana kamu rongo era henira keogana se kesina o vaemani, suria ngaira ka na gapu gi tage.
13Siana kamu rongo era henira keogana se kesina kenami, suria ngaira ka na gapu gi tage. 14Siana kamu rongo era henira na gete iata o vaemami hagareha, suria ngaira nikâ kani kenami hagareha.
15Siana kamu rongo era henira ka hungâmi, suria ngaira kani kaniata o karemi. 16Siana kamu rongo era henira na gete iata o veogami se o vesimi, i era ma kamu hagamakira.
17Siana kamu rongo era henira na gete ma ka kareta. Ki apu nikâ, vigamu auragia ka karena na karena na gete ngekana, suria ngaira ka na gapu haku. Na tarana ngekê ki era ngavê manga na kavaniha. 18Manga mu heroga, siana kamu auragira me nikâ kehami, manga viga tahitahi mêngara keogata se kesita mu bani êragira.
19Siana kamu mauru henira na gete, matena i tahataha na obata, suria ga pe matarotaro suria na hagesuringa igê na rotu. 20Siana kamu rongo era henira na gete iata na mane getera, suria i katogamu kamu pe matarotaro.
21Siana kamu nakara na karemi ka voravora re na êrâ tanga na vogasiana o Moleki na ataro, suria inê na Araha kê God iami. Tahema siana kamu gâga erasiê i maata na enoni. 22Igamu na mane, siana kamu rongo era henira na tamani na mane. Inê God kê kitenia ngavê na tarana ngekana.
23Igamu na mane ma na gete siana kamu rongo era henira na o se na goti ma na marâ vigana. Na tarana ngekana ki katogamu kamu pe matarotaro ngavê.
24Siana kamu katogamu maremi, kamu pe matarotaro renigi na tarani ngegana. Na enoni ga hagarapera na ataro ka katora mareta vikana. Ngaira ka bani oga hagenago tarami igê na agua, ma inê na Araha kê tarigenira hura tarami, kamu banu me. 25Na bagatauhata ka katoa na agua ki pe matarotaro. Tahema inê na Araha kê hagaitangia na agua ma kê katoa, ki kasira hura na enoni, ga oga igê. 26-27Ngaira ka katogi na tarani era hato ngegana ma ka katoa na agua i pe matarotaro. Ma igamu, siana kamu katokato vikana. Igamu hato, na Isiraelita se na mahuara i berarogami, igamu ki tuguhigamu, vigamu marupegi na ramata ma na tamasinga iaku. 28Vikana na agua ki asa, vi ge page kasigamu hura, manga i bani kasira hura na enoni ga hagarapera na ataro, ga bani oga hagenago tarami igê. 29Igamu kamu bani girara, vi na enoni ma ki katogi na ani mavê na tarani era ngegana, ka page paia hura tenira na kariaku. 30Mu marupegi na ramata, gê nakagi tangagamu inê na Araha. Siana kamu arâ surigi na bagatauhata na enoni ga bani oga hagenago tarami. Siana kamu katogamu maremi kamu pe matarotaro renigi na tarani era ngegana. Inênga ka na Araha God iami.”
Currently Selected:
HAGARAHENGA 18: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
