JUTITI 4
4
Na ai ni Juta ka nanê tanga na hearihatana
1Na ai ni Juta ka rongogi na tarani i katogi o Holoperenesi i bêngenira na mane ni me iana na maneraha o Nebukanesare tangara na enoni igê na agua getigi. Ngaira ka rongo, vi ngaia ki rurugu tenigi na ngêsu iata ma ki ruhuruhugi. 2Vikê ngaira ka magu ngavê ma ka anumanuma, vi i era ma ki kato vikana nikâ tanga i Jerusaleme ma tanga na ruma ni rotu iana na Araha God iata. 3Ngaira ka kahu aporo me ma tangagi i pasita i Juta tenigi na agua ga henahuraura tange ma ka kahu hagapunaria aporo ma na ruma ni rotu henigi na marâ tanga na hagarahenga ma na bea ni vogasiha, suria na merongata ka bani erasigi. 4Vikê ngaira ka hagatorangenira na mane tora tamasinga ka hagananêra na apanena hagenani i Samaria ma na hinua i Kona, i Betegoroni, i Belemaini, i Jeriko, i Goba, i Aesora ma i maruguna i Saleme. 5Ngaira ka ogasigi ototo râ na barani, ka pararihigi na hinua igê na hungani ma ka rurugi haku na ngêra tanga na matena ni hearihatana. Ngaira ka babarisi, suria ga kahu hakugi ma na ngêra, suria ga mêa na mu iata.
6O Joiakimo na mane ni vogasiha i teha i oga i Jerusaleme igê na matena ngekana, ngaia ki sege tangara na enoni i hinua i Betulia me Betomesitaimi garu maatia na maruguna i Jeserele hagarangia i Totane. 7Ngaia ki bonasira na enoni i hinua ngegana, ka ogabarasigi na teha igê na hungani tanga i Juta. I ngekana ki mataku tanga vi ga hagabarasira igê na merongata, suria na teha ki roro ma ki ararirerua ma na vererua garu taratara râ harahara igê. 8Na Isiraelita ka tê viteata o Joiakimo na mane ni vogasiha i teha ma na enoni raha ga hekarigi i Jerusaleme.
Na Isiraelita ka avarasia na Araha
9Na Isiraelita ka avarasia bâraha God ma ka harihari. 10Ngaira ka gahu kakaga: ngaira ma na gete iata, na kareta, na togoha iata ma na mahuara hato ga oga i berarogata, ma ngaira hato na kare vurivuri ma na enoni tagara iata. 11Na Isiraelita hato i Jerusaleme henira na gete iata ma na kareta ka tâ so i ano i maana na ruma ni rotu. Ngaira ka tuguni kakaga ma ka kuhuigi ne beta renigi na rahu. 12Nikâ ngaira ka buhia na bea ni vogasiha renia na gahu i kakaga. Ngaira ka avarasia haku God iata na Isiraelita, vi siana na merongata ka henahuraura na kareta ma na gete iata ma siana ka ruhuruhugi na hinua iata ma siana ka hagaerasia na ruma ni rotu, hanana siana ka memarabe ma ka tamasi paroparo. 13Na Araha ki bâsigi na anumanumaha iata ma ki aganarigi na avarasiha iata. Surigi rako na tangiani na ai ni Juta ka ama ni harihari nga i maana na ruma ni rotu iana na Araha raramohaga hunia. 14O Joiakimo na mane ni vogasiha i teha, na mane ni vogasiha ma na enoni hato getera ga tagara i ruma ni rotu iana na Araha, ngaira ka gahu kakaga, matena ga susu tanga God i na ara ni tangiani, ka tagarenigi tanga God na votovoto iata na enoni ma na vogasiha ni suruha iata na enoni. 15Ngaira ka kuhuigi na bêta renigi na rahu ma ka avarasia raha na Araha, ka nungia hanana vi takira na Isiraelita hato.
Currently Selected:
JUTITI 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific