JUTITI 16
16
Na ki iana ka Jutiti
1Hoi, ka Jutiti ki kiria na ki ni visiha koro i maata na Isiraelita hato, ma na enoni hato ka kiki suria. 2Ngaia ki ki vikê:
“Ge kiria na Araha God iaka.
Ge hagarahasia renigi na gogo ma na maramara.
Ge hagarahasia renia na ki haoru.
Ge katoa ke rongo raha na atana.
3Na Araha God kani teha igê na hearihatana.
Ngaia ki hagatahiê tenira na merongaka
ma ki meêaporo me tanga na tênga iata na kariana.
4Na me ni Asiria ka vato me tenigi na hungani.
Na mane ni me iata ka gahu teha ngavê.
Ngaira ka ahunigi na maravegani.
Na hosi iata ka manasigi na hungani.
5Ngaira ka tohe viga hagamakaka na agua iaka,
ka mutera na mane na gapu haoru iaka,
ka metametarira so i ano na kare meramera iaka,
ka henahuraura vê na kareka
ma ka torera vê na kare viru iaka.
6Ma na Araha raramohaga hunia ki katora
ma ki mutera renia na rimana na gete.
7Mareha vi na mane ni me na gapu haoru,
mareha vi na mane borahu ga raramohaga
kanige taharia ma ke tê hunia na mane ramo teha iata
ma ka Jutiti hete ka karena o Merari
kani hagavotaria renia na bâkorohana.
8Ngaia ki katora ka teha na Isiraelita ga mamasiaga.
Ngaia ki naka râ na gahu ni nâ,
ki monea na maana renigi na oile i sigini koro.
Ngaia ki rere igê na tuguni bâkoro ngavê
ma ki surugi na varehuna renia na sigana na gahu,
hanana i hagamua renigi.
9Na êgana ka Jutiti ka hagabarea.
Na bâkorohana ki gona i obana
ma na tatapa borahu ki rete nguria na bêna.
10Na me ni Pesia ka bubununuga, suria i pe magu.
Na ai ni Metia ka konetenia, suria i ramo.
11Na merongaka ka magu, suria igia ka ngere hagaramo.
Ngaira ka hagamamasiagagia ka memeaga
ma igia ka ngirira ma ngaira ka magu.
Ngaira ka hetogotogo ka gavagava.
12Na kareta na gete ga karekare ka ahurara
ma ka mutera o kareta na ani ga hakuhaku marapageva.
Ngaira hato ka me igê na henahuita iana na Araha.
13Inê kê kiria na ki haoru tanga God iaku.
Igo Araha ko raramohaga ma ko bâhahanetaga.
Na raramohamu ki raha ngavê ma igo ko tehateha tare.
14Na marâ hato go hagavorara ke tê viteamu,
suria igo ko tamasi ma, ma ngaira ka vora me.
Igo ko uhira renia na roga ni mêriha
ma ngaia ki hagavorara
ma ki asa ta na hitangita vige guguruga tangago.
15Na hungani ka angingi ka guguru tenigi na hunani
ma ka apuripuri vato i asi.
I maamu na hê ka rono manga na êbe.
Ma igo ko takira na ani ga hagahigasigo.
16Na vogasiha, henaka i sigini koro ngavê,
ngaia ki na marâ i sisite ma tanga na Araha.
I tagenana ma na êbe ga susu renia tanga.
Ma na enoni i têtê viteana, ngaia ki raha tanga.
17I era ngavê tangara na enoni
ga merongasira na kariaku.
Na Araha raramohaga hunia ki page hagaitangira
igê na tangiana na suriha raha.
Ngaia ki page hagatorangenira na gi ma na mama,
hanana ga ngaugi na apeta.
Ngaira ka page angiangi renia na mamasiaganiha iata
tare ki bâ ki arâ.
I rongo raha na atana ka Jutiti
18Matena na enoni ka ata i Jerusaleme, ngaira ka hagamatarotarora mareta suria na rotu ma ka kahu rahesia God. Ngaira ka susu tanga God, ka vogasia suri parongata mareta ma ka tagarenigi na votovoto iata tanga. 19Ka Jutiti ki hagapunarigi tanga God na nahuninga hato iana o Holoperenesi na enoni ga bani vatea renigi. Nikâ ngaia ki tagarenia tanga God na gahu vavararaga pusira na namu, i bani torea tenia na bea iana o Holoperenesi, hanana i hagamonaria na suruha. 20Surigi na hageha gi oru na enoni ka ama ni gâga haku nga ka vagevage i maana na ruma ni rotu i Jerusaleme ma ka Jutiti ki oga henira.
21Hemuri na enoni hato ka aporo hegitigi i pasita. Ka Jutiti ki aporo nogana i pasina i Betulia ma ki oga igê na mako iana marena. Rârâ mataro me ki me, ki rongo raha na atana suria i Isiraele hagenani. 22Rako na mane ka obania viga auragia ma ngaia ki usi vige êragi aporo nikâ i murina i me o Manase o vaniana ma ki hakunira na êvarina. 23-24Na atana ki ama ni rongo raha nga. Ngaia ki oga i ruma i me tenia o vaniana. Ngaia ki gemêa ngavê. Hagenago ma ki me, ngaia ki votogi na nahuninga iana tangara na goana o Manase o vaniana ma tangara na goana so marena. Ngaia ki hatungia na gete tagara iana tenia vige kare vurivuri. Ka Jutiti ki me i Betulia, matena i tonga na 105 na harisi iana. Ga bagia igê na vaba ngahisia o vaniana. Na enoni ka angi maramara surigi na tangiani gi pi. 25Matena ka Jutiti ki tahitahi mênga ma ki arihu era i murina i me, ki mareha rârâ ta na enoni vige hagabubununugara nikâ na Isiraelita.
Currently Selected:
JUTITI 16: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific