ESETA (Greece) (A)
(A)
Na maruteha iana o Moretekai
1-3[1-3] O Moretekai ki na Siu tenia na varo ninuni iana o Benamino. Ga henahuraua henia o Jegonia na maneraha i Juta tanga i Babilonia, matena o Nebukanesare na maneraha i Babilonia i henahuraua igê i Jerusaleme. O Moretekai ka no karena o Jairi. O virana ka no Simi. O vaemane o Simi ka no Kise. O Moretekai ki oga i hinua i Susa i Pesia. Ngaia ki tê tagaraha raha i ruma raha iana o Ataseresese na maneraha.
Matena o Ataseresese ki maneraha noga surirerua na harisi gi rua, o Moretekai ki marute igê na tangiana hagenago igê na hageha na Nisane. 4[4] Ngaia ki marutegi na ngereha, na rotoha, na akuruha, na nunu ma na maveta hagenani i hetogotogo. 5[5] Na bagahua raha gi rua karu vora me, karu nanê vigaru heariha. 6[6] Ngairerua karu ngurunguru raha. Vikana na enoni hato i maveta ka nanê hanana viga meraheariha na kariana God ga toto suria. 7[7] Tanga na maveta ngaia ki na tangiana ni mengo, ni bubununuganiha, ni bagabevoani, ni mamasiaganiha, ni hagamamasiaganiha, ni aruhuruhunga ma ni hagamakakaniha. 8[8] Na enoni hato ga toto suria God ka magu ngavê ma ka bubununuga renigi na tarani ga sugi tarahura. Ngaira ka nanê ni mera, 9[9] ma ka avarasia God. Tenia na avarasiha iata ki gogo raha me na ve raha tenia na kere ve banga sisite. 10[10] Ki tangi me matena i raboa na arito, ma na enoni ga mamasiaga ka ramo aporo ma ka unumira na ani ga hagamamasiagara.
11[11] Matena i rite, na maruteha iana renia na katoha iana God ki oga nga igê na aitangihana. Ngaia ki ama ni garia nga na girarana na maruteha, rârâ mataro me ki bungi nikâ.
Na harikatoha renia na maneraha
12[12] Matena o Moretekai ki mamaro i ruma raha iana na maneraha henirerua o Gabata mo Tara na vâmavo iana na maneraha garu anumasia na ruma raha, 13[13] ngaia ki rongorerua garu hetamatamasi renia na katoha iaterua. Ngaia ki karingarerua maninga ma ki kahu tahetara, vi ngairerua karu harikato vigaru nahuia na maneraha ki meme. Vikê o Moretekai ki hagarongoa na maneraha o Ataseresese renia na harikatoha iaterua. 14[14] Na maneraha ki haribona ka hagatererua ma ka tarahurerua. Ngairerua karu hagarongo. Ngaira ka torererua vê ka nahuirerua karu me.
15[15] Na maneraha ki haribona, ka segea so na tarana ngekana igê na buka tanga ma o Moretekai ki segea so nogana. 16[16] Hoi, na maneraha ki atea o Moretekai tanga na tagaraha i ruma raha iana ma ki vatea renigi rako na mahatanga meni na tauhana.
17[17] Ma o Hamane ni Bugea karena o Hamatata na maneraha i hagahigasia, ngaia ki naka na siva tangara na Siu o Moretekai ma na tamana na Siu, suria o Moretekai tahema na vâmavo gi rua karu me.
Currently Selected:
ESETA (Greece) (A): KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific