ISAIA 9
9
Na maneraha i muri me
1I nago God ki hagamakira na raraha hegetigi
iaterua o Sebuloni mo Napatali,
ma hemuri me ngaia ki page hagahigasira
i tahegê na apanena tarê na ve i Jotano kerekê
mataro me na asi i kereso,
ma i Galilea nikâ, ga oga igê na enoni, ga pe Siu.
2Na enoni, ga arâ igê na roto hono,
ka bani rigia na marara raha.
Na marara ki mavesira na ani,
ga oga igê na agua ni mengo.
3Araha, igo ko bani hagakoro obata ngavê,
ma i ngekê ngaira ka vagevage bâraha.
Ngaira ka vagevagesigi na korohamu,
mangara na enoni, ga vagevagesigi na harisi iata,
se matena ga tonganigi na ruruguha, ga henahuraugi.
4Igo ko bani musigi râ na varo, ga rakura re,
ma ko bani barugigi na mata ma na apinige,
ga ramusira ma ka hagamamasiagara renigi.
Igo ko bani teharira na merongata na kariamu,
manga i nago go bani teharira igê na me i Mitiani.
5Na gi ki page ngaugi na buti ma na gahu gagapuga
iata na mane ni me, ga taharira na kariaku.
6Na kare ki vora me tangagia!
Ga page hêtana vi “Maneraha ni takoha mataha”,
“Araha raramohaga hunia”,
“Vaemaka tare”, “Maneraha ni ramana”.
7Na raramohana ki ama ni raharaha nga
igê na ramana, i asa, vige page hato.
Ngaia ki page maneraha urusina o Tavite.
Na koroha ma na otoha
ka na hunana na arahanga iana
i tahegê i rikini, ki bê ki arâ.
Na Araha raramohaga hunia
ki togeaga, ki katokato vikana.
Na Araha ki page hagaitangia i Isiraele
8Na Araha ki bani ranganira na ai ni Isiraele,
ma ki bani surira na raraha iana o Jakobo.
9Na enoni hato ni Isiraele
ma ngaira hato nogata i hinua i Samaria
ka bani girara na tarana ngekana.
Henaka, ma ngaira ka ama ni hagarahasira mareta nga,
ma ka ama ni tamasi paroparo nga, ka vivi:
10“Na ruma ni hê ahu ka aruhuruhu,
ma kami page urusigi renigi na ruma na hê gatagata.
Na u na voromaga ka bani tapigi so,
ma kami page urisigi renigi na u na bagora.”
11Na Araha ki hagaramonira na merongata, ka taharira.
12Siria i kerekê ma i Pilisitia i kereso
karu manganga karira karu unumira.
Henaka, ma na mangariganiha iana na Araha
ki asa, vige page hato.
Na rimana ki nanê mênga, hanana i hagaitangira.
13Na ai ni Isiraele ka pe urisi parongata.
Henaka na Araha raramohaga hunia ki hagaitangira,
ma ngaira ki asa vige aitangi.
14Igê na tangiana gi tage togo
na Araha ki page hagaitangira igê
na maneraha i Isiraele henira na kariata.
Ngaia ki page retegi râ na bêna ma na kerena Isiraele.
15Na meraha ma na maneraha ngaira ka na bêna,
ma na poropete ni hagaparunga ngaira ka na kerena.
16Na ani, ga bêngenira na enoni ngegana,
ka hagaotora bera, ma ka katora, ka tugupu ngavê.
17Ngaira hatohato na enoni, ga pe botage renia God,
ka tamasi erasia ma ka erataga ngavê.
Tahema na Araha ki page hagaitangira nikâ na mane haoru,
ma ki asa, vige page takuira na gete na nâ ma na kare banogo.
Henaka, ma na mangariaganiha iana na Araha
ki asa, vige page hato.
Na rimana ki nanê mênga, hanana i hagaitangira.
18Na erahata na enoni ki ramo manga na gi,
i ngaugi na tone ma na rauga era.
Ngaia ki ngaugi na vapuni
ma ki akê na asêsuna raha.
19Suria na Araha raramohaga hunia ki mangariaga,
na hagaitangiha iana ki noro manga na gi
suria na agua hagenani,
ma ki sungira na enoni.
Na ara ni hitangita ki takusia so ma
na mêrihana marena.
20Igê na agua hagenani na enoni ka herêrê
renigi na kere ngauha, ga tarahugi, hanana viga ngaugi,
ma na magêha iata i asa, vige page hato.
Ngaira ka ngaura nikâ na kareta mareta!
21Na raraha iana o Manase ma iana o Eparaimi
ka hemeronge, ma ka taharira haku nikâ
na raraha iana o Juta.
Henaka, ma na mangariganiha iana na Araha
ki asa, vige page hato.
Na rimana ki nanê mênga, hanana i hagaitangira.
Currently Selected:
ISAIA 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
