ISAIA 10
10
1I page era ngavê tangagamu na enoni,
mu hagamamasiaga apeta na kariaku
renigi na ramata, ga pe oto.
2Suria mu kato vikana,
tahema mu pe surira oto na enoni, i bara tangara,
ma kamu hanagogi tenira na enoni matareha
na marâ, ga oto tangara, viga nahunigi.
Suria mu kato vikana, tahema mu hanagogi
na nahuninga iata na gete, ga nâ, ma na kare banogo.
3Mu katokato mara ta,
matena God ki hagaitangigamu igê?
Mu katokato mara ta,
matena ga tarahugamu igê na bagabevoani,
manga na roga raha, i arâ me hagatê?
Ti kamu page togâna?
I he kamu page pinihigi igê na ruruguha iami?
4Mu page meme igê na henahuita,
se ga page henahuraugamu.
Henaka, ma na mangariganiha iana na Araha
ki asa, vige page hato.
Na rimana ki nanê mênga, hanana i hagaitangigamu.
God ki nakara na ai ni Asiria ka hagaitangira na kariana
5Na Araha ki vi: “Hoi, Asiria!
Asiria ki manga na bêata iaku,
hanana gê hagaitangira re na ani,
gê mangariaga tangara.
6Inê kê hagatorangenira na ai ni Asiria,
ka taharira na enoni, ga pe botage reniê,
ma ka hagamangariê ngavê.
Inê kê hagatorangenira, ka rurugu ma ka hanago,
ma ka purira so na enoni, mangagi na mako i tara.”
7Ma na maneraha teha i Asiria ki kato so marena,
ki varoa na hearihatana.
Ngaia ki togeaga, ki hagaerasira ngavê
igê na agua rako getigi.
8Ngaia ki tamasi paroparo, ki vi:
“Na mane, ga bêngenira na mane ni me iaku,
ka hega, ga pe maneraha vari?
9Inê nga kê teharigi na hinua i Kalano,
i Kagemisi, i Hamata me Arapata,
i Samaria me Tamasiko.
10Inê nga kê teharigi na hinua ma na agua,
ga hagarapera igê na ataro,
ga rako teharira na ani i Jerusaleme me Samaria.
11Inê nga kê teharira Samaria ma na ataro hato igê.
I hega, i bara vari, vi ve kato vikana nikâ
tangara Jerusaleme ma na ataro i ngekana?”
12Ma na Araha ki vi:
“I murina gê hatungigi igê na katoha iaku
renia Jerusaleme i hungana i Sione,
inê kê page hagaitangia na maneraha teha i Asiria,
suria ngaia ki tamasi paroparo ma ki hagarahasia marena.”
13Na maneraha i Asiria ki tamasi paroparo, ki vi:
“Inê mareku nga kê katogi na marâ hato ngegana.
Inê kê ramo, ki mave na bêku, ma kê tako mataha.
Inê nga kê hatungigi na taritarihani na agua.
Inê nga kê rurugugi na nahuninga iata.
Inê kê purira so na enoni raha i ngegana
manga na puruka mane i purira.
14Na enoni hato i maveta ka manga na robona na manu,
ma na ruruguha iata ka mangagi na oruna.
Inê kê rurugugi na nahuninga,
manga gê rurugugi na oruna na manu.
I bara tangara, vige hagamagusiê, se vige ngiriê.”
15Ma na Araha ki vi:
I hega, na akesi ki teharia vari na mane, i tapitapi renia?
I hega, na soa ki teharia vari na mane i soasoa renia?
Na bêata ki pe tagarenia akê na mane.
Na mane hete ki tagarenia akê na bêata.”
16Tahema na Araha raramohaga hunia
ki page hagatorangenia na ringa,
hanana i hagaitangira na me bigabigaraga ngegana.
Ngaira ka page avasugusugu,
ma na raramohata ma na bâkorohata ka page aru makaka.
17God, i apuna teha ngavê
ma ki mavesigi na obata na Isiraelita,
ngaia ki page manga na gi, manga na vavatana na gi,
i page ngaugi na ara ni marâ hato,
na rauga era ma na tone nikâ,
i rarona ma na tangiana gi tage togo.
18Ngaia ki page ngaugi na vapuni koro ma na mu,
manga na ringa, i hagamesira na enoni.
19Tani ma na apinige ka page hitahita so.
I pe bara tanga na kere kare, vige tomanigi.
Tani ma na enoni ka page tahitahi
20I na matena ngekana na Isiraelita, na ani ga tahi ma ka hita so, ngaira ki hato, vige page oga hagêgurira igê na ai ni Asiria, ga hagaerasira ngavê. Ngaira ka page hagêguri togo maninga hete renia na Araha, na God iata na Isiraelita, i apuna teha ngavê. 21Tani ma na Isiraelita ka page aharia God raramohaga hunia iata. 22Henaka i ngekê na ai ni Isiraele ka rako teha ngavê mangagi na one i one, tani ma ka page aporo me i pasita. Na hagaitangiha raha teha ki nananêra na enoni, ma ki ararira. 23Hoi, suria na agua hagenani na Araha God raramohaga hunia ki page hagaitangira ngavê, manga i bani vi.
Na Araha ki page hagaitangia i Asiria
24Na Araha raramohaga hunia ki vi tangara na kariana, ga oga i Sione, ki vi: “Naka ma na ai ni Asiria ka hagamamasiaga apemi, mangara na ai ni Esipito i nago, siana kamu magutenira. 25I sugia ma ge hato, vi ve hagaitangigamu igamu, ma hemuri kê page hagaerasira ngavê ngaira hete. 26Inê nga, na Araha raramohaga huniê, kê page ramusira, manga gê bani ramusira noga na ai ni Mitiani i Hê ni Orebe. Inê be hagaitangia i Asiria, manga gê bani hagaitangia noga i Esipito. 27Igê na matena ngekana inê kê hagatahigamu igê tenia na raramohata na ai ni Asiria, hanana i page hato, vige page hagahigegamu nikâ.”
Asiria ki taharia i Jerusaleme
28Na me ni Asiria ka râ me tenia i Rimone.
Ngaira ka bani rêa na hinua i Aiati,
ma ka bani ri i Migironi.
Ngaira ka naka na toraha iata i Migimasi.
29Ngaira ka bani aharê igê na hungana,
ma ka mêru i Geba.
Na ai ni Rama ka bubununuga,
ma na ai ni Gibea, i pasina na maneraha o Saulo,
ka bani gava.
30Ai ni Galimi, mu ngere!
Ai ni Laisa, mu karinga!
Ai ni Anatote, mu arami!
31Na ai ni Matemena me Gebimi
ka migitanu manavata ma ka gava.
32Na meronga ka tariha me noga i Nobo,
ma ka hagaramo tanga na hungana i Sione,
tanga na hinua raha i Jerusaleme.
33Na Araha raramohaga hunia ki page uvera,
ka mangagi na arani na apinige, ga maguhu i ano.
Ngaia ki page hagamakira ngavê na ani,
ga raha teha ma ka paroparo ngavê.
34Na Araha ki page tapira so mangagi na apinige,
ga tapigi so i gupu na toro renia na akesi,
nakagi ma na apinige koro ngavê i Libanone.
Currently Selected:
ISAIA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
