ISAIA 58
58
Na morana na hariharinga
1Na Araha ki vi:
“Ngere! Hagangere raha!
Ke rongo raha manga na ahuri!
Hagarongora na kariaku na Isiraelita
renigi na tasi iata,
suria ga pe marupegi na ramata iaku.
2Ngaira ka rahesiê i na ara ni tangiani,
ma ka vi ngaira,
viga mage ni giraragi na obaniha iaku,
ma ka agana, viga marupegi na ramata iaku.
Ngaira ka vi, viga obaniê, vigê vatera renigi na ramata oto,
ma ka vi, vi ngaira ka vagevagesia na hagarahenga tangê.
3“Ngaira ka hagate, ka vi,
‘Tanu hega igia ka harihari,
manga vi na Araha, ma ki pe gagêmaga renigia?
Tanu hega igia ka hatamia na magêha,
manga vi ngaia, ma ki pe botage renigia?’
“Ma inê kê aramira, kê vi:
Bâ, matena mu hari,
igamu kamu râ surigi ma na obaniha iami maremi,
ma kamu hagamamasiagara ma na enoni tagara iami.
4Na hariharinga iami ki katogamu, kamu mangariaga,
kamu hekorekore ma kamu herupurupu.
Mu takusia vari, vi na hariharinga iami ngekana
ki katoê, kê aganarigi na nunginungiha iami?
5Matena mu hari,
igamu kamu katogamu maremi, kamu mamasiaga.
Igamu kamu tu bê manga na go i abarere.
Igamu kamu gasigi na tarisigani na gahu
ma kamu kangikangi na rahu, kamu tâtâ igê.
Mu visigi vari nga, vi na hariharinga ngegana?
Mu takusia vari, vigamu hagakoro obaku renigi?
6“Na tarana na hariharinga, gê obania, ki manga ikê:
Siana kamu hagamamasiagara na enoni.
Siana mu hagahigera renigi na tarani, ga pe oto.
Rupasira na kare rakuraku.
Siana kamu hagamarâ apeta na enoni.
7Na enoni, ga magê, mu meratongani na ngêra iami.
Mu hagarukuhira na enoni, ga matareha
ma ka pe nahunigi na ruma iata mareta.
Mu hagesurura na ani ga rupaturi.
Mu tamanira na goami.
8“Manga mu katokato vikana,
na korohami ki page mave manga na arito, i raboa,
ma na mara iami ka page mavomavo rêrê.
Ma inê be ngahisigamu tare,
ma be anumasigamu renia na raramohaku.
9Matena mu nunginungi, inê be aganarigamu.
Matena mu avarasiê, inê be tamanigamu.
“I hato hagetage, vi igamu kamu hagamamasiagara na enoni.
Siana kamu usira na enoni ma kamu tugurira.
Siana kamu torahurira na enoni.
10Mu hagangêra hete na enoni, ga magê.
Mu tamanira hete na ani i bara tangara.
Manga mu katokato vikana,
na roto ni mamasiaganiha iami
ki page vora re na mavetana na ritovagana.
11Ma inê be hagaotogamu tare,
ma be hagakoro obami renigi na marâ koro.
Inê be katogamu, kamu ramoramo ma kamu komaga.
Igamu kamu page manga na mu i magaroha,
se manga na ve banga, i asa vige page mamata.
12Igamu kamu page tagarahigi aporo na hinua aruhuruhu
igê na agua i bani oga me.
Ga page visigamu, vi igamu ka na enoni
mu tagarahigi aporo na para ni hinua
ma na ruma ga ahogehoge.”
Na marupeana na Tangiana ni Mamaroha
13Na Araha ki vi:
“Mu marupea na Tangiana ni Mamaroha,
suria ngaia ki na tangiana apuna.
Siana kamu tari surigi igê na tagaraha iami.
Mu vagevagesia hete na tangiana apuna,
ma kamu hagahigasia.
Mu gâga tonge igê.
Siana kamu tagara igê,
se mu tamasigi igê na marâ purua.
14Vikana igamu kamu page vagevagesiê.
Inê be katora na enoni hato i maveta, ke hagahigasigamu
ma igamu kamu page nahunia aporo na agua,
gê bani vatea renia o Jakobo na êvarimi.
Ngaia nga kani gê visia inê na Araha.”
Currently Selected:
ISAIA 58: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
