ISAIA 56
56
God ki pe kitenia ta na enoni
1Na Araha ki vi:
“Mu katogi na tarani, ga koro ma ka otooto i maaku,
suria na tahinga tangagamu ki hagarangi me noga.
I sugia ma, be hagatahigamu.
2Ga babarisi na enoni, ga katokato vigana,
ma ka marupea tare na Tangiana ni Mamaroha,
ma ke pe katogi na tarani, i apu vige katogi igê.
Ga babarisi na enoni, ga pe oga sutaga.
3“Na mahuara, i hakunira na kariaku,
siana ki vivi, ‘Na Araha ki usiteniê vari,
vi ve hagarahe henira na kariana.’
Na mane, ga voea, siana ngaia ki vi,
‘Inê ki asa be hakunira na kariana God,
suria inê kê manga na apinige i maria
ma ki bara ngavê be apara kare.’
4Renia inê kê vi tanga na mane vikana, kê vi:
Manga igo ma ko marupea na Tangiana ni Mamaroha
ma ko hagakoro obaku renigi na tauhamu,
ma ko tototo suria na suruheri iaku henira na kariaku,
5inê kê naka na giraramu
i Ruma ni Rotu iaku i hinua iaku,
hanana na kariaku ka page takusigo tare,
ma ka page takusia tare na atamu
teharira na kare, manga vigu aparara.
6“Tangara na mahuara, ga hakunira na kariaku,
hanana viga takuiê ma ka tototo suriê, inê kê vivi:
Mu marupea na Tangiana ni Mamaroha
ma kamu tototo suria maninga na suruheri iaku.
7Minê be kasigamu i Sione na hungana apuna iaku.
Inê be hagakoro obami i ruma ni nunginungiha iaku
ma be aganarigamu, matena mu vogasi ma kamu susu tangê.
Na Ruma ni Rotu iaku ki na ruma,
ga hagarahe igê na enoni hato i maveta.
8Inê be hagahakura me rako na enoni getera,
ke hakunira na kariaku na Isiraelita,
gê bani torera me tenigi na agua, ga henahuraura tange.
Ngaia nga kani gê visia, inê na Araha God.”
Na enoni raha ni Isiraele ka erataga
9Na Araha ki vi:
“Ai ni mahuara,
mu mangara na marâ vasiga, ga garagara,
mu râ me kamu ngasira na kariaku.
10Na enoni raha, vige bâsurira hete na kariaku,
ngaira ka guru.
Ngaira ka hite ngavê!
Ngaira ka mangara na o ni ngereha
ma ki bara vige ngere.
Ngaira ka ata ni tâtâ ma vê,
ka mauru ma ka marute.
Na mêruha ma ki angarira.
11Ngaira ka ngêngê papasi
ma ka hagatage ngêra mangara na o.
Na enoni raha ngegana ki mareha ngavê, vige tako.
Ngaira hato ka râ suri barisuta mareta
ma ka takusira mareta ma.
12Ngaira ka vivi,
‘Ge tono na vaini!
Ke ruguhigia!
I gomaga nikâ teharia i ngekê!’”
Currently Selected:
ISAIA 56: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
