ISAIA 55
55
God ki suruheri nikâ henira na kariana
1Na Araha ki vi:
“I mamata na riomi?
Râ me! Na ve ikê.
Mu baguru re na haga vari?
Mu vuri ngêra ma kamu ngê!
Râ me! Vurigi na vaini ma na miliki.
Ga vategamu purua ma.
2Renia ta mu kasikasi purua ma na haga
renigi na ngêra, i asa vige hagamasugamu monari?
Renia ta mu kasikasi purua ma na memi renigi na marâ,
i asa vige togâni monari na aitangihami?
Karingê maninga ma kamu têtê viteaku.
I ngekana igamu kamu page vagevagesigi
na ngêra moraga ngavê.
3“Hoi, kariaku, râ me kamu rongo.
Râ me i pasiku,
hanana mu nahunia na mêriha mora.
Inê be naka na suruheri henigamu,
na ani i asa vige page hato.
Inê be korokoro tangagamu
suria na suruha iaku tanga o Tavite.
4Inê kê kasia ki maneraha
ma ki marungira na enoni i maveta,
hanana i taroheniê tangara.
5Ma i ngekê inê kê ategamu igamu,
hanana mu unira me na enoni i maveta,
ga pe bani giraragamu me i nago.
Mu bâ, ngaira ka page gahasigamu
ma ka page hakunigamu.
Inê na Araha God iami,
na God Apuna iami na Isiraelita,
inê nga kê page katogi na tarani ngegê,
suria gê page hagarahasigamu.”
6Aharia na Araha,
ma kamu avarasia i ngekê nga ikê,
matena i agana igê, hanana vi aganarigamu.
7Na enoni era ke urisi parongata.
Na enoni, i pe oto na parongata, ke hagaotogi.
Ke aporo tanga na Araha God iaka,
hanana ga takuira
ma ke bonotenigi ngavê na tasi iata.
8Na Araha ki vi:
“Na takoha iami ki pe manga na takoha iaku.
Na tauhami ka pe maratoraku.
9Na vavearo ki kerekê noga ngavê i avorana na maveta.
I tagenana ma, na takoha iaku ma na tauhaku
ka tora hegetigi ngavê tenigi na animi.
10“Na tamasinga iaku
ki mangagi na kârupu ma na rangi,
ga râ me tenia na vavearo,
hanana ga hagavokaria na ano.
Ngaigi ki hagavokarigi na ngêra ma ka akê,
hanana na enoni ka ngêngê
ma ka nahunigi na ani ni hasinga.
11Na tamasinga, i râ me i haraku,
ki mareha vi na guruni ma na tamasinga.
Ngaigi ki page katogi hete na takoha iaku,
ma ki page akê me henigi na marâ, gê visigi.
12“Igamu kamu page vagevage,
matena mu pania i Babilone.
Igamu kamu page huhura pania suri parongami
Na barani ma na hungani
ka page kiki vagevage renigamu.
Na apinige hato ka page hitahita baro.
13Na apinige koro, ga bâkoro, ka page akê sikirigi
na apinige era, na tone ma na rauga era.
Na aporoha me iami ki page hagatakusira na enoni
reniê inê na Araha.
Ngaia ki na girarana, i asa vige page hato.”
Currently Selected:
ISAIA 55: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
