ISAIA 53
53
1Na enoni ka hetamatamasi, ka vi:
“Ti na hitangika i tongesurigi na marâ,
ga kahu bâsigi râ i ngekê akê?
Ti na hitangika i tongesuria,
vi na Araha kani katogi?
2Suria na katoha iana na Araha
tahema na kariana ki akê,
manga na apinige ga sugia
ma ki vagavagaraga igê na mako avagavaga.
Ngaia ki bâ purupuru ma ki pe bâkoro,
hanana vi igia ke hahutugia,
se vige marâ apeka renia, se vige tenia.
3Igia hato ka ruhia ma ka kitenia.
Ngaia ki hatamigi na mamasiaganiha ma na mera.
Mareha ngavê ta na hitangika vige sirea.
Igia ka puria so ma i ano, manga vi na marâ purua.
4“I monari, na mamasiaganiha ma na mera iaka
ka hagamamasiaga ngaia.
Ma igia ka vi ma, vi God kani hagaitangia
renigi na mamasiaganiha ngegana.
5Ma ga hagamamaria hete
renigi na tasi iaka.
Renigi hete na bagatarihaka
ga tahurua.
Igia ka kahu apekoro aporo
renia na hagaitangiha urusigia,
ma renigi na tahurunga urusigia.
6Igia hato ka mangara na sipi, ga tarupe.
Na ara ni hitangika ki râ suri barisuna marena.
Na Araha ki hagaitangia renigi na bagaparongaka.
Na hagaitangiha i ararigia hete igia.
7“Ga katoa bera ma ka hagamamasiaga.
Ma ngaia ki piringiape ma ki muni ma.
Ngaia ki manga na sipi, ga sugi nahuia,
se i manga na sipi, ga sugi tapurua,
ma ki asa vige angiangi.
Ngaia nikâ ki munimuni ma.
8Ga hagatotongoa ma ka suria ki me,
ma ka torea ka nahuia.
Ma ki mareha rârâ ta na enoni,
vige botage renia.
Ga nahuia ki me renigi na tasi iaka.
9Ga bagia henira na enoni era.
Ga naka henira na enoni ruruguha.
Ma ngaia ki marehasia ngavê,
vige katoa rârâ ta na marâ,
vige era, se vige hagaparu.”
10Na Araha ki vi:
“Ngaia ki hatamigi na mamasiaganiha
suria na katoha iaku.
Na mera iana ngaia ki na vogasiha
tanga na bonoteniha ni tasi.
Tahema ngaia ki page bâsira na raraha iana.
Ngaia ki page mauri arihu,
ma na katoha iaku ki page akê me renia ngaia.
11I murina na mamasiaganiha iana
ngaia ki page vagevage aporo.
Ngaia ki page girara,
vi ngaia ki pe mamasiaga purua ma.
Na kariaku hetakui, gê vagevagesia,
ki page hatamia na hagaitangiha urusira na enoni.
Tahema inê be bonotenigi na tasi iata.
12Vikê inê be hagarahasia
i berarogata na enoni raha, ga raramohaga.
Ngaia ki kasi manavana ki me,
ma ki agana, ka katoa manga na mane era.
Ngaia ki kasi mena urusira na enoni era,
ma ki nungiê, hanana gê bonotenigi na tasi iata.”
Currently Selected:
ISAIA 53: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
