ISAIA 52
52
Na tahinga tanga i Jerusaleme
1Jerusaleme, gu rite!
Gu aharaga! Gu ramo!
Hinua apuna iana God,
gu hagesuru bâkoro ma ku rêni!
Na enoni era ma na ahuroto ki asa,
vige page banu nikâ i pasimu.
2Aharaga, Jerusaleme!
Taruhigi râ na mako i apemu!
Ku ape tatara!
Ku oga so igê na atohamu!
Ai ni Sione, mu ruhasigi râ na seni i riomi,
ga rakugamu renigi.
3Na Araha God ki vi tangara na kariana, ki vi:
“Matena mu vora re na kare rakuraku,
ka toregamu vê purua ma,
ma ka page rupasigamu purua ma nikâ.
4Matena mu râ, kamu oga hagatora i Esipito,
igamu kamu oga suri parongami.
Ma na ai ni Asiria ka henahuraugamu
ma ka toregamu vê purua ma.
5Ma na ta kê bâsia i Babilone?
Ngaira nikâ ka henahuraugamu
ma ka toregamu vê purua ma.
Ma na ani, ga hagatagarahigamu bâraha,
ka kasi mamava ma ka tamasi paroparo,
ma ka ruhiê tare.
6Kariaku, igamu kamu page aitangisiê vi inê God,
ma igê na tangiana ngekana
igamu kamu page girara igê,
vi inê kani gê vi, ‘Inê ikê.’”
7I hagakoro obata na enoni
na râha me iana na mane tora tamasinga.
Ngaia ki aharêvoro me igê na hungani,
i merâ me na taroha koro,
na taroha koro ni ramana ma ni tahinga.
Ngaia ki vi tanga i Sione, ki vi:
“God iamu ki Araha!”
8Na mane, ga anumasia na hinua, ka ngerengere,
ka ngerengere heri ma ka kiki vagevage,
suria ga rigia re maata
na aporoha me iana na Araha tanga i Sione.
9Jerusaleme, gu aruhuruhu,
gu hagangere vagevage.
Na Araha ki page hagatahia na hinua iana
ma ki page haganakura na kariana.
10Na Araha God Apuna ki page hagabângenia na raramohana.
Ngaia ki page hagatahira na kariana,
ma na enoni hato i maveta ka page bâsia.
11Mu râ! Mu tari era!
Mu pania i Babilone!
Siana kamu hatarigi na marâ, ga apuna tangagamu,
hanana mu marupegi na ramata igê na rotu.
Igamu na ani, mu migirâ na marâ apuna tanga na hagarahenga,
ki tuguhigamu, mu matarotaro hagenago.
12Siana kamu hagatata!
Na matena raha mênga.
Mareha vige manga i nago, matena mu gava.
Na Araha iami ki page bêngenigamu,
ma ki page anumasigamu rihigamu.
Na kariana mora na Araha ki mamasiaga
13Na Araha ki vi:
“Na kariaku ki page akê me igê na tagaraha iana.
Ga page hagarahasia ma ka page hagahigasia bâraha.
14Na enoni rako ka kakahuru renia, matena ga bâsia,
suria i mamari na apena ma ki rupugapu ngavê.
Ngaia ki pe bâ manga na enoni.
15Ma kamu bâ, rako teha ngavê na enoni ka page konetenia,
ma na maneraha ka page tuturiha so nogata,
suria ngaira ka page rongogiraragi na marâ,
ga pe bani bâsigi, se vige bani rongogi.”
Currently Selected:
ISAIA 52: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
