ISAIA 35
35
Na matena koro i muri me
1Na masusu avagavaga ki page vagevage.
Na bagamanihê raha ki page vagevagesigi
na takani na mahe i rako.
2Ngaia ki page kiki
ma ki page ngerengere vagevage.
Ngaia ki page bâ hahaneaga ngavê
mangagi na barani i Libanone,
ma ki page bâkoro ngavê
mangagi na hungana i Karamele ma na bena i Sarone.
Na ara ni enoni hato ka page bâsigi
na bâbâhana raha ma na raramohana na Araha God iaka.
3Hagaramonigi na rima mangusi
ma na êga ga tatata.
4Tangara na ani, ga rumakaka, mu vivi:
“Bâ, God ki râ me ki hagatahigamu,
i râ me, hanana i hagaitangira na merongami.
Mu ramo! Siana mu magu!”
5Na ani ga guru
ki page marava aporo na maata.
Na ani i pungu na karingata
ka page rongorongo aporo.
6Na ani ga tavi
ka page asireke manga na karena na puruka.
Na ani ga bi
ka page ngerengere vagevage.
Na ve oto ka page gogogo
igê na masusu avagavaga.
7Na one rarata ka page vora re na rano.
Na ve banga ka page rako igê na mako rikitaga.
Na bena pusuga ki page vora re na papana na ve
ka akê igê na gogona ma na pupuruta.
8Na tara raha ki page oga igê,
ga page hêtana vi “Tara ni Otoha”.
Na enoni era ka pe arâ igê
ma na ani ga bonobonoga nogata.
9Na laione ka pe gâga i ngekana
ma na marâ vasiga nogata ga garagara.
Nga noga ma na ani, na Araha i bani hagatahira,
kani ga page aporo i pasita suria na tara ngekana.
10Ngaira ka page ataata râ i Jerusaleme.
Ngaira ka page obakoro, ka page kiki
ma ka page ngerengere vagevage igê.
Ngaira ka page vagevage tare,
suria ga kahu hato hagetage
na mamasiaganiha ma na anumanumaha tenira.
Currently Selected:
ISAIA 35: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
