HOSEA 5
5
God ki ramonira ma ki ranganira na maneraha
1Na Araha ki vi:
“Igamu na mane ni vogasiha, mu rongo!
Igamu na Isiraelita, mu karinga!
Ma igamu nogami na maneraha iata na enoni!
Ki tuguhigamu, vigamu surira na enoni suria na otoha.
Ma igamu ki mareha!
Igamu kamu naka na tu tangara na kariaku i Misipa.
Igamu kamu naka na basu igê na hungani i Tabore.
2Igamu kamu sutasuta i hinua i Akasia.
Inê mareku nga be hagaitangigamu hato,
na ara ni hitangimi.
3Inê kê bani girarara na Isiraelita.
I asa iata, vige ahi paniê.
Ngaira ka pe toto suriê,
ma ki pe ararira, vige rahesiê.”
4Na bagaparongata mareta na enoni ka hagabarasira,
ka pe aharia aporo na God iata.
Na vogasiha tangara na ataro ka angarira.
Tahema ngaira ka pe hagêguri togo renia na Araha.
5Na paroparoha iata na Isiraelita
ki hagatanga monari renira, viga pe koro.
Na parongata era ka katora, ka tapasu ma ka votavota,
ma na ai ni Juta ka vota henira.
6Ngaira ka merarâ na sipi ma na puruka iata,
hanana viga vogasia na Araha renira.
Ma ngaira ka vogasi purua ma.
Ngaira ki asa, vige tarahua na Araha,
suria i bani panira.
7Ngaira ka pe toto suria na Araha.
Na kareta ka mangara na kare ni tara,
suria ga pe raruni togo renia na Araha.
Ngaira ma na mu iata ka sugi era hagetage.
Na ai ni Juta ma na Isiraelita ka hemeronge
8Na Araha ki vi:
“Mu uhigi na ahuri ni hearihatana i Gibea!
Mu uhigi na ahuri i Rama!
Mu sugaria i Betavene!
Mu arâ, mane na raraha iana o Benamino,
mu râ igê na hearihatana.
9I ata me noga na matena ni hagaitangiha.
Na apanena iata na Isiraelita ki page bâ
manga na bagamanihê raha.
Isiraelita, na tarana nga ngekê ki voravora me!
10“Inê kê mangariaga ngavê,
suria na maneraha i Juta ka banu i Isiraele
ma ka parênia na mako.
Tahema na hagaitangiha iaku tangara
ki page tarahura manga na maganuha raha.
11Na Isiraelita ka mamasiaga bâraha,
suria ga tê tara renia na mako,
ma suria ga nungia na hetamaniha tenira na enoni,
i bara tangara, vige hetamani.
12Inê be erasira na Isiraelita manga na hasikoko
ma na ai ni Juta manga na ane.
13Matena na Isiraelita ka bâsia,
vi ngaira ka ape era ma na ai ni Juta ka rigia,
vi ngaira ka mamari,
ngaira ka râ i Asiria,
ka nungia na maneraha i ngekana,
hanana vi tamanira.
Ma ngaia, ngaia ki bara tanga.
Ngaia ki asa, vige hagakomagara se vige hagamavora.
14Renia inê nga be ohera na ai ni Isiraele mi Juta
manga na o vasiga, i ramo.
Inê mareku be ngasira ma hemuri be panira.
Inê be oke rataratagenira,
ma ki asa ta na enoni, vige hagatahira.
15“Inê be panira na kariaku mataro me na matena,
i arari na mamasiaga iata renigi na bagaparongata,
ma ka bâbâ reniê igê.
Igê na mamasiaga iata
ngaira ka page gariê vari.”
Currently Selected:
HOSEA 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
