HOSEA 4
4
Na Araha ki ramonira ma ki ranganira na Isiraelita
1Igamu na Isiraelita, mu karinga na Araha,
suria na Araha ki ramonigamu ma ki ranganigamu.
Na enoni, mu oga i na agua ikê,
ngaia ki hagatamasigamu, ma ki vi:
“Na totosuriha ma na takuiha karu mareha igê na agua.
Mareha ta na enoni, vige hagêguri togo reniê.
2Ngaira ka tohetohe vero.
Ngaira ka hagaparu ma ka nahu enoni.
Ngaira ka hanago ma ka gamogamo.
Na ogasutaganiha ki ama ni raharaha nga
ma na nahunga ni nuni ki ama ni akê me tare.
3Tahema na ano ki page avagavaga.
Na enoni ma na marâ hato, ga mauri igê, ka page me.
Ma na marâ vasiga i bemu ma na manu
ma nikâ na siare i asi ka page me.”
Na Araha ki ramonira ma ki ranganira na mane ni vogasiha
4Na Araha ki vi:
“Igamu na mane ni hagarahenga,
siana hagetage kamu ramonira na enoni se mu hagatamasira.
Inê kê hagatamasigamu igamu hete!
5Naka ma na tangiana, igamu kamu tari purupuru,
ma suria na bungiana na poropete nogata.
Ma inê be hagamesia i Isiraele, kenami.
6Na kariaku ka meme,
suria ga pe hagêguri togo reniê.
Mane ni vogasiha,
igamu kamu pe tako togo reniê.
Tahema inê kê kasi renigamu,
ma ki hato, vigamu page mane ni vogasiha iaku.
Tahema inê nogaku kê page kitenira na karemi.
7“Mane ni vogasiha,
matena mu ama ni rakorako nga,
igamu kamu ama ni aharêngigi nga na ramata iaku.
Tahema inê be hagamakigamu,
suria mu vora na mane ni vogasiha.
8Mu mauri renigi na tasi iata na kariaku.
Tahema mu obanira, vige ama ni tasitasi nga.
9Na hagaitangiha tangara na enoni ki tangagamu nogami.
Inê be hagaitangigamu renigi na bagaparongami,
ma kamu page kasikasi mena renigi.
10Igamu kamu ngêgi na vogasiha,
ma ki asa iami, vigamu ngê masu.
Igamu kamu gamogamo,
suria mu vogasira na ataro,
ma ki asa iami, vigamu tataka,
suria igamu kamu bani kasi reniê,
hanana mu gogogo surira na ataro.”
Na Araha ki kitenia na vogasiha tangara na ataro
11Na Araha ki vi:
“Na vaini, na bani ani ma na ani haoru,
karu katora na kariaku ka bekabekaga.
12Ngaira ka nungia na mavorona na apinige,
hanana vi hagagirarara renia ta na marâ!
Ma na vato ki hagarongora renigi na marâ,
ga obanigi, viga giraragi!
Aige, ngaira ka beka ngavê!
Ngaira ka kasi reniê.
Manga na gete, i vora renia na êrâ,
ngaira ka gogo surira na ataro.
13I na agua ni vogasiha igê na barani
ngaira ka vogasira igê na ataro.
I ruguhani na apinige raha, ga arubebe,
ngaira ka susu tangara igê na ataro.
Aige, na mamaruha ki hagakoro apeta vari?
Ma na ta ki akê me?
Ka karemi ka êra
ma ka hungâmi ka gamogamo.
14Naka ma ka karemi ma ka hungâmi ka manga ngegana,
inê ki asa be hagaitangira renigi,
suria igamu na mane kamu gogogo surira na êrâ
i ruma ni vogasiha
ma kamu tage vogasira na ataro.
Mu girara, na enoni ka ama ni hagabekasia nga
na ani i bekabekaga.
15“Isiraelita, naka ma igamu kamu pe toto suriê
ma kamu paronga manga na gete, i gamogamo,
siana kamu katora na ai ni Juta ka tasitasi nogata.
Siana mu hagarahe i Gilegale.
Siana mu arâ i Betavene, na agua ni eraha,
ma siana mu tohetohe i ngekana reniê,
suria inê nga ki na Araha mamauri.”
16Na Isiraelita ka guguruga manga na puruka,
i marababaga re râha.
Manga i he na Araha ki girara i hagangêra
mangara na kareta na sipi igê na pariki ni go?
17Na ataro ka angarira na Isiraelita.
Nakara vê ke râ!
18Matena i ruguhira na vaini,
ngaira ka vagevagesia na gamogamoha.
Na teniha era ki erasia na ogaha koro iata.
19Ngaira ka page mangagi na marâ,
i ahegenigi vê na roga.
Ma ngaira ka page maki ngavê,
renia ga vogasira na ataro.
Currently Selected:
HOSEA 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
