HOSEA 11
11
God ki ama ni takuira nga na kariana ga guguruga
1Na Araha ki vi:
“Matena na Isiraelita ka sisite mêngara,
inê kê takuira.
Inê kê unira hura tenia i Esipito
ma kê katora renira vi na kariaku.
2Inê kê ama ni unira nga,
ma ngaira ka ama ni murisigeê nga.
Ngaira ka vogasira na ataro
ma ka susu tangara na nunuta, ga tahegi.
3Inênga nga na ani gê hagesurira ka arâ,
ma ngaira ka hagaigê, vigê marupera.
4Inê kê karuhira me bâkoro,
ma kê here i rimata, kê bêngenira, ma kê takuira.
Inê kê topera ma kê siginira.
Inê kê maruruhira ma kê hagangêra.
5“Ngaira ka usi, vige ahariê.
Tahema ge aporo tanga i Esipito,
ma na maneraha i Asiria ke marungira.
6Na hearihatana ki page tarahugi na hinua iata
ma ki page hogegi na maani para na hinua.
Na kareta ka page meme igê na hearihatana,
suria ga râ surigi na obaniha iata mareta.
7Ngaira ka ama ni murisigeê nga.
Ngaira ka page avarasira na ataro,
suria ga higera na mamasiaganiha,
ma ki asa, vige hagamahagara.
8“Isiraelita, tanu hega kê rumakaka renigamu?
Tanu hega kê kasigamu?
Manga i he kê girara gê erasigamu
manga gê erasira na ai ni Atema?
Manga i he kê girara gê hagaitangigamu
manga gê hagaitangira na ai ni Seboimi?
I bara ngavê tangê, be kato vikana,
suria gê takuigamu bâraha.
9I asa be hagaitangigamu igê na mangariaganiha iaku.
Isiraelita, i asa be erasigamu ngavê nikâ,
suria inê nga kê God, mareha vi na enoni.
Inê nga kê God raramohaga huniê,
ma kê koro teha ma kê ngahisigamu.
Tahema i asa be hagaitangigamu,
matena gê mangariaga.
10“Na kariaku ka page arâ suriê, inê na Araha
matena gê hagaramo tangara na merongata,
manga na laione i ngurunguru raha.
Ngaira ka page akê me susu tenia i kere so.
11Ngaira ka page soso me susu tenia i Esipito,
mangara na manu ga gaha susu,
tenia i Asiria mangara na kuvê.
Inê be torera aporo tanga i pasita.
Ngaia kani gê visia, inê na Araha.”
Na Araha ki ranganira na Siu
12Na Araha ki vi:
“Na Isiraelita ka hagaparuê tare
ma ka hagabekasiê bâraha,
ma na ai ni Juta ka murisigeê mênga.
Inê nga kê God,
gê hagamonarigi tare na tamasinga iaku,
ma kê koro ma oto teha ngavê.
Currently Selected:
HOSEA 11: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
