HOSEA 10
10
Na poropete ki ranganira na Isiraelita
1Na Isiraelita ka mangagi na apinige na vaini,
ga rasirasi ma ka varo uri.
Ngaira ka ama ni toregi nga na bea ni vogasiha,
ma ka ama ni korokoro nga na mu iata.
Ngaira ka ama ni hagabâkorogi nga
na vakivaki na hê ni vogasiha.
2Na hagaparunga ki angarira na enoni.
Tahema ki page tarahura na mamasiaganiha
renigi na tasi iata.
Na Araha ki page hogegi na bea ni vogasiha iata,
ma ki page paparigi na vakivaki na hê na vogasiha iata.
3Na enoni ka sugia ma vige vi:
“Igia ka pe nahunia nikâ na maneraha,
suria igia ka pe hagahigasia na Araha.
Ma na ta nikâ ki page katoa tangagia na maneraha?”
4Ngaira ka tamasi purua ma,
ka surusuru hagaparu,
ka tohetohe vero ma ka pe hagamonarigi
na suruheri iata henira na enoni.
Na mane igê na kotiha ka pe râ suria na otoha.
Ngaira ka manga na rauga, i akê i mu,
ma na enoni, ga ngaua, ka meme renia.
5Na ai ni Samaria ka page magu
ma ka page angiangi maramara,
suria i magahuru tenira na ataro iata,
na nununa na puruka na golo i Betele,
na hinua ni eraha.
Ngaira ma na mane ni vogasiha,
ga vogasia na ataro ngekê,
ka page angisia,
suria i tarataraga na golo na bâkorohana.
6Ma na nununa ka page torea râ i Asiria,
manga na votovoto tanga na maneraha i teha i ngekana.
Na Isiraelita ka page maki ngavê,
suria ga pe akê me na katoha iata.
7Na hinua i Samaria ka page hagasuhia ngavê,
ma na maneraha i Samaria ka page henahuraua vê,
manga na bahitana na apinige i torea vê na ve.
8Na ngêsu igê na boteni ka page sungigi erasigi,
suria ngaigi ki na agua ni eraha,
na Isiraelita ka vogasira igê na ataro.
Na tone ma na rauga ka page rubuhigi
na bea ni vogasiha iata.
Na enoni ka page avarasigi na barani, ka vivi,
“Mu piringigami!”
Ma tangagi na hungani ka vivi,
“Mu ahunigami!”
Na Araha ki surira na Isiraelita
9Na Araha ki vi:
“Na Isiraelita ka ama ni tasitasi nga,
haganega tenia na matena ga tasi i Gibea.
Tahema na hearihatana ki page tarahura i Gibea nikâ,
suria na enoni ka ama ni erataga nga.
10Inê kê bani kato,
vigê hagamamasiagara ma be hagaitangira.
Na enoni, ga pe Siu, ka page panepane haku tangara,
ma ka page hagaitangira,
renia ga rako na tasi iata.
11“I nago na Isiraelita ka manga na puruka,
i manata ngavê ma ki agana ki tanugi
na ani ga mataku na tagaraha.
Ma inê kê naka na totora igê na riona bâkoro
ma kê barogi igê na marâ ni tagaraha raha.
Inê kê katora na ai ni Juta ke hikiru vaga
ma na Isiraelita ke hagamako na kiru.
12Inê kê bani vi, ‘Mu hikiru vaga vikana
igê nga na mu haoru iami maremi,
ma kamu hasigi igê na otoha,
hanana mu tarahua na takuiha iaku,
ma be korokoro tangagamu,
suria mu toto suriê.
I ngekê ki na matena koro tangagamu.
Mu gariê igê, inê na Araha iami,
mataro me kê page arâ me
ma kê page vategamu na morana na mauriha.’
13Ma hete mu hasia na eraha,
ma na harisi iami ka na guana na eraha.
Igamu kamu bani ngêgi hato
na guani na hagaparunga iami.
“Igamu na Isiraelita, igamu kamu tako togo
renigi na raramohami
ma renira na mane ni me iami, ga rako.
14Tahema na hearihatana ki page erasigamu
ma na hinua nganganihaga iami
ka page hagasuhigi ngavê.
I page manga na matena na maneraha o Salamana,
ki hagasuhia ngavê igê na hinua raha i Betabele,
ma na gete ma na kareta ka amenamena ka me.
15Isiraelita, na tarana ngekê ki page tarahugamu nogami
surigi na eraha raha i pasimi.
Igê na mahogotana, i haganega igê na hearihatana,
na maneraha iami ki page meme otooto râ nga.”
Currently Selected:
HOSEA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
