HAGONEGAHANI 9
9
God ki naka na suruheri iana henia o Noa
1God ki koro tangara o Noa ma o karena ma ki vi: “Mu apapara kare, hanana na raraha iami ka vunusia na maveta hagenani. 2Na ara ni marâ hato ga mauri i ano, na manu hato ma na siare i asi ka page magutenigamu. Inê kê hagatoragamu renira hanana mu marungira. 3Igamu kamu girara mu ngaura na ganiani ma na ngauha ni agua. Ngaigi ka na ngauha iami. 4Na marâ gi tage ma ki apu tangagamu. Siana kamu ngaugi na ganiani gagapugaga. Inê kê manimania vikana, suria na gapu ki na mêriha. 5Na anima na enoni i nahuia ki meme na tamana, inê kê page hagaitangia ki meme nogana. Inê kê page hagaitangia ki meme na ani mavê na marâ i mauri, manga i nahunahu hunia na enoni. 6Na enoni ki maratorana God. Tahema manga vi tani ma ki nahuia ki meme na tamana, ngaia ka page nahuia ki meme nogana. 7Mu apapara kare, hanana na raraha iami ka vunusia na maveta.”
8God ki vi tangara o Noa ma o karena, ki vi: 9“Inê be naka na suruheri iaku henigamu igamu ma na raraha iami, 10ma henira na ara ni marâ hato ga mauri: na manu hato, na marâ hato ga mauri i ano henira na ara ni marâ hato, mu merahura me tenia na haka. 11Inê be naka na suruheri iaku henigamu vikê. Inê kê tohe, vi inê ki hato, vi ve mutera nikâ na ara ni marâ hato ga mauri renia na maganuha. Na maganuha ki hato hagetage, vige erasia nikâ na maveta. 12Na suruheri iaku henigamu, igamu ma na ara ni marâ hato ga mauri, ngaia ki asa vige page hato. Na girarana ki manga ikê. 13Inê be naka na rorovagaro ni marapeha iaku igê na vaha. Ngaia ki na girarana na suruheri iaku henia na maveta. 14Na ara ni mateni gê katoa na vavearo ki vahagaga ma na rorovagaro ki voravora me, 15inê be takusia aporo na tohenga iaku tangagamu, igamu ma na ara ni marâ hato ga mauri, hanana vi na maganuha ki hato hagetage vige mutera nikâ na ara ni marâ hato ga mauri. 16Matena na rorovagaro ki voravora me igê na vaha, inê be rigia ma be takusia aporo na suruheri iaku henigamu, igamu ma na ara ni marâ hato ga mauri i maveta, vi ngaia ki asa vige page hato. 17Ngaia nga ka na girarana na tohenga iaku tangara na ara ni marâ hato ga mauri.”
Vahemate Noa
18O karena o Noa ga hura me tenia na haka, ngaira ka no Semi mo Gamu mo Japeti. O Gamu ki apara o Kanane. 19O karena gi oru o Noa ngegê ngaira ka na êvarita na enoni hato i maveta.
20O Noa ka na mane i tagarahigi na mu. Ngaia ka na mane i hagenago ki hasigi na mu ni vaini. 21Matena i tono hato na vaini, ngaia ki aripo na maana. Ngaia ki tasia na gahu iana ma ki tâ rupaturi igê na ruma na gahu iana. 22Matena o Gamu, o vaemana o Kanane, ki bâsia vi o vaemana ki rupaturi, ngaia ki urahura ma ki hagarongorerua o veogana. 23Ma hemuri o Semi mo Japeti karu tavoa na gahu ni aruha karu tê gasia ma karu tê tongani na bogoniheri i bêni gaparaterua. Ngairerua karu mebanu murisiga igê na ruma na gahu ma karu tukuia o vaematerua renia. Ngairerua karu aharo nga getererua, suria garu pe obania vigaru bâsia o vaematerua i rupaturi. 24Matena i hato na raramohana na vaini tenia o Noa, ngaia ki rongoa na tarana i katoa o karena hemuri tanga, 25ma ki vi:
“Na hagaitangiha tanga o Kanane.
O veogana karu page hagatutunguhia.
26Ge hagarahasia na Araha God o Semi ki rahesia.
O veogana karu page hagatutunguhia o Kanane.
27God ke hagarakonira na raraha iana o Japeti.
Na raraha iana ke oga haku henira na anina o Semi.
O veogana karu page hagatutunguhia o Kanane.”
28I murina na maganuha raha o Noa ki oga nikâ surigi na harisi 350. 29Ngaia ki tonga na harisi 950 iana ma ki kahu me.
Currently Selected:
HAGONEGAHANI 9: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific