HAGONEGAHANI 45

O Josepo ki kahu hagagirarara o goanna renia marena

1O Josepo ki bara tanga vige hagagatagata i maata na kariana. Tahema ngaia ki bonasira ka hura tenia na kiboru. Ngaira getera ma o vahegoata kaniga oga, matena o Josepo ki hagagirarara renia marena. 2Ngaia ki angi raha matomatoania. Vikê na ai ni Esipito ka rongoa ma na rongoha ki tarahua na maneraha i Esipito, i oga i ruma raha iana. 3O Josepo ki vi tangara o goanna, ki vi: “O Josepo kani inê. I hega, o vaemaku ki tahitahi mênga?” Ma na matena o goana ka rongo vikana, ngaira ka magu ngavê ma ka muni raha. 4Ma o Josepo ki vi tangara, ki vi: “Mu guru me hagarangi.” Ma ngaira ka guru râ. O Josepo ki vi tangara, ki vi: “Inê ka no goami o Josepo. Igamu kamu bani hagavuringeniê me i Esipito. 5Hoi, siana kamu takotako bâraha. Siana kamu hagahunigamu maremi, suria vigamu hagavuringeniê me ikê. God hete kani hagatorangeniê me tarami ikê, hanana gê hagatahira na enoni tenigi na mera. 6I ngekê ki na ruata ma na harisi ni magêha igê na maveta. Na harisi gi rima ni magêha ka mamêngagi me, ma ki asa vige hasihasi se vige apâpa nikâ. 7God ki hagatorangeniê hagenago me tarami, hanana gê hagatahigamu, ma hanana siana igamu ma na raraha iami kamu meme. Na katoha iana God ngekê ki hagakonegia ngavê. 8Tahema i mareha, vi igamu kanimu hagatorangeniê me ikê, ma God hete. Ngaia ma God kani kasiê kê vora na ruata râ tanga na maneraha. Inê kê onosuria i Esipito hagenani.

9Hoita, mu aporo rêrê i pasina vaemaku ma kamu hagarongoa renia na tamasinga iaku tanga. Inê o Josepo o karena kê vi vikê: God ki kasiê kê marungia i Esipito hagenani. Go arâ me i pasiku. Siana ko hagarihu. 10Igo ko girara go gâga i na apanena i Gesene: igo, na karemu, na esimu, na sipi iamu, na goti iamu, na puruka iamu ma na ani mavê na marâ hato getigi go nahunigi. I ngekana igo ko gâga hagarangiê igê. 11Manga go gâga i Gesene, inê kê girara ge marupego. Na harisi gi rima ni magêha ka mamêngagi me. Inê kê pe obania, vi igo, na ahetama iamu ma na togoha iamu, vigamu mesi magêha.”

12O Josepo ki vi tangara o goana, ki vi: “Hoi, igamu hato ma igo nikâ o Benamino, igamu kamu girara maninga, vi inê ka no Josepo monari. 13Mu hagarongoa o vaemaku, vi inê kê raramohaga teha ikê i Esipito, ma kamu hagarongoa renigi na ara ni marâ mu bâsigi. Ma hemuri kamu hata ni meaporo me ikê.”

14Ngaia ki ruia o Benamino o vesina ma ki haganega ki angi. O Benamino ki angi nogana, suria o veogana ki ruia. 15Ma hemuri matena i angiangi mênga, ngaia ki ruira tatage o veogana ma ki siginira. I murina vikana o goana ka kahu metamasi.

16Matena na maneraha i Esipito ma na mane ni hagaotonga iana ka rongoa, vi o goana o Josepo ka râ me, ngaira ka vagevage. 17Na maneraha ki vi tanga o Josepo, ki vi: “Gu vi tangara o goamu ke hagarutangigi na gerita na tonki iata ma ke aporo i Kanani. 18Vi tangara ka merarâ me o vaemata ma na ahemata iata tanga ikê. Inê kê page haganahunira renia na mako na ani i koro teha i Esipito, ma i ngekana na ngêra ki page aharêsira igê. 19Vi tangara nikâ ka tagirigi na kati tenia i Esipito tanga i pasita, hanana ga mera aporo me igê kaniata ma na kareta ma o vaemata. 20Siana ka takotako renigi na nahuninga iata ga page panigi vê, suria ngaira ka page nahunia na mako, na ani i koro teha ngavê i Esipito.”

21O karena o Jakobo ka kato vikana. O Josepo ki vatera na kati na maneraha ki bani visigi, ma na suarita i tara. 22Nikâ o Josepo ki tonganira renigi na gahu ni urisiha, ma tanga o Benamino ngaia ki vatea na tangarê gi oru na haga na siliva ma na gahu gi rima ni urisiha. 23Tanga o vaemana ngaia ki hagatorangenira na tonki tangahuru gi tage ga hagarutangira renigi na marâ na ani ga koro teha i Esipito, ma na tonki tangahuru gi tage nikâ, ga hagarutangira renigi na koni, na bereti ma na ani getigi na ngêra na suari ni tara. 24Ngaia ki kasira vê o goana ka râ, ma ki vi vikê tangara: “Siana kamu heariha i tara.”

25Ngaira ka pania i Esipito ma ka aporo i pasina o Jakobo o vaemata i Kanani. 26Ngaira ka hagarongoa, ka vi: “O Josepo ki tahitahi mênga. Ngaia ki marungia i Esipito hagenani!” O Jakobo ki unuia na agua gi tage suria i pe tongesurira.

27Matena ga hagarongoa hato renigi na tamasinga iana o Josepo tangara ma na matena ngaia ki bâsigi hato na kati, i hagatorangenigi me o Josepo tenia i Esipito, ngaia ki kahu tako ki vi: 28“E, o kareku o Josepo ki tahitahi mênga! Nga hanana gê obania ngekana! Be râ nga, be bâsia ma kê kahu meme.”

Currently Selected:

HAGONEGAHANI 45: KCB

Highlight

Copy

Compare