HAGONEGAHANI 44

Na kâkâ iana o Josepo

1O Josepo ki bonasia na kariana, i onosuria na ruma iana, ki vi: “Gu hagavunusigi ku sisingigi na anga iata renigi na ngauha i ararira ga totora. Go nakanaka na haga iata hegetigi tonganigi na maani na anga iata. 2Go naka na kâkâ na siliva iaku igê na maana na anga iana o vesita hagemuri henigi na haga i vuri re na koni.” Ma ngaia ki kato vikana. 3Matena i tangi me ka kasira vê vahegoata ka râ henira na tonki iata. 4Matena ga ura râ sisite tenia na hinua, o Josepo ki vi tanga na kariana, i onosuria na ruma iana, ki vi: Rêrê! Gu mumurira o vani agana. Matena go tarahura, go hagatera, ko vivi, ‘Tanu hega kamu barua na koroha renia na eraha? 5Tanu hega mu hanagoa na kâkâ na siliva iana na araha iaku? Na kâkâ ngekana ngaia nga ka na ani i totono igê ma ngaia nikâ ki na kâkâ ni girarasiha. Na tarana mu katoa ngekê ki erataga ngavê!”

6Matena na kariana o Josepo ki tarahura, ngaia ki tamasi tangara vikana. 7Ngaira ka aramia, ka vi: “Tanu hega go visigami vikana? Igami kami tohe, vi igami kami pe katoa rârâ na tarana go visia. 8Igo ko bani girara, vi igami kami bani migiaporo me tangago tenia i Kanani na haga, mi tarahugi igê na maani na anga iamami. Tanu hega kani vi ararigami, vigami hanagoa na siliva se na golo tenia na ruma iana na araha iamu? 9Bâ, manga vigo tarahua i pasina ta na hitangimami, ngaia ka page nahuia ki meme, ma igami na ani mi hitahita râ kami page voravora re na kare rakuraku iamu.”

10Ngaia ki vi: “Ua, i koro ma. Ma ki nga noga ma na veretage na hitangimi ki hanagoa na kâkâ, ngaia ki page voravora re na kare rakuraku iaku, ma igamu na ani getegamu kê nakagamu vê kamu arâ.” 11Vikê ngaira ka hatani nakagi so na anga iata ma na ara ni hitangita ki tangahia na anga iana. 12Na kariana o Josepo ki gari maninga i raroni. Ngaia ki gari hagenago i pasina na bêbê ni kare rârâ ma ki hato i pasina na ani i muri tatare. Ngaia ki tarahua na kâkâ igê na anga iana o Benamino. 13O veogana o Benamino ka tarisigi na tuguni iata, suria ga hataera bâraha. Ngaira ka hagarutangira aporo na tonki iata ma ka aporo tanga i pasina o Josepo.

14Matena o Juta mo vesina ka ata i ruma iana o Josepo, ma ngaia ki gâga mênga i ngekana. Ngaira ka tubê so tanga. 15Ma o Josepo ki vi: “Na ta mu katoa? Mu pe girara vari, vi inê ka na mane vikê, gê nahunia na ramoha, hanana gê girarasigamu?”

16O Juta ki arami, ki vi: “Araha, ma vi na ta kami visia tangago? Tanu hega kami vigami hagaiga? Manga i he kami vigami hagatanga monari, vi igami kami pe erasia ta na marâ? God ki hagabângenigi mave na bagatauhamani. I arari ma, vi igami hato kami voravora na kare rakuraku iamu, siana vi ngaia getea ma na ani ga tarahua na kâkâ i na anga iana.”

17O Josepo ki vi: “Mareha vê! I asa vi ve kato vikana. Ngaia ma na ani i torea na kâkâ iaku, ngaia nga ka na kare rakuraku iaku, ma nga noga ma igamu, igamu kamu girara mu aporo asitatara i pasina o vaemami.”

18O Juta ki ura râ ma ki vi tanga o Josepo, ki vi: “Araha, gu nakê be megotamasi. Siana ko mangariaga tangê. Igo ko maratorana na maneraha i Esipito. 19Araha, igo ko hagategami, ko vi, ‘I hega o vaemami ki tahitahi mênga? I hega tani o vesimi nikâ ki gâga?’ 20Ma igami kami aramigo, kami vi, ‘Ua, o vamamami ki gâga mênga ma ki merahaga. Ma tani vesimami ki gâga mênga. O vaemamami ki apara o vesimami, matena i gemêa ngavê. O veogana ki bani me ma o vesina garu tage vora haku. Ngaia getea ma kani tahitahi mênga. O vaemana ki takuia ngavê.’ 21Araha, igo ko bani vi tangagami, kami merâ me ikê, suria vigo bâsia. 22Ma igami kami arami kami vi, vi ngaia ki bara vige pania o vaemana. Manga vi i manga ngekana, o vaemana ki meme. 23Ma igo ko vi tangagami, ko vi, ‘Inê kê usi vi ve bâsigamu nikâ, manga vi igamu ma kamu pe merâ me o vesimi i muri tatare.’

24Matena mi aporo i pasina o vaemamami, igami kami hagarongoa manga go vi. 25Ngaia ki vi tangagami, kami aporo me kamu vuri nikâ na kere ngêra. 26Igami kami aramia, kami vi: “I bara vê, vi igami râ. O vani akana ki usi vige bâsigami, manga vi igami ma kami pe merâ me o vesimami i muri tatare. Igami kami girara ma mi arâ, manga vi o vesimami ki takugami.” 27O vaemamami ki vi tangagami, ki vi, ‘Mu bani girara, vi igamirua ka Ragele menê kamuru apararerua na kare mane gi rua ma. 28Na hitangiterua ki bani magahuru teniê. Vari ta na marâ vasiga kani ngasi hunia, suria haganega tenia na matena i râ, inê kê kahu pe bâsia rârâ nikâ. 29Inê kê merahaga. Manga vi igamu kanimu torea teniê na ani ngekana ma ta na marâ i tarahua, inê kê page mesi hetakiha, suria ma igamu nge.’

30-31O Juta ki tamasi nga, ki vi: “Hoita, araha, manga gê aporo i pasina o vaemaku ma ngaia ki pe bâsia o vesiku vige râ me heniê, ngaia ki page meme ototo râ nga, suria ngaia mo karena karu hearinusige ngavê, ma suria nikâ ki gemêa ngavê. Ngaia ki page mesi hetakiha suria ma igami. 32Ma nikâ inê kê bani tohe tanga o vaemaku, vi na mêriha iaku ki na vurina na mera tanga o vesiku. Inê kê tohe, vi manga inê ma kê pe meaporo me o vesiku tanga, inê tangahuriê mataro me kê meme. 33Araha, gu nakê be urusia o vesiku, be vora na kare rakuraku iamu ikê. Gu naka vê ki aporo henira o veogana. 34Tanu hega kê aporo inê tanga o vaemaka manga vi o vesiku ki pe takuê? Inê kê usitenia ngavê, vigê bâsia na mamasiaganiha raha ngekana vige tarahua o vaemaku.”

Currently Selected:

HAGONEGAHANI 44: KCB

Highlight

Copy

Compare