ESEKIELE 38

O Gâka na maneraha iata na mane ni me gahu

1Na Araha ki tamasi tangê, ki vi: 2“Igo, karena enoni ma, gu rangania o Gâka, na maneraha ni Magâka, i marungira na ai ni Meseki me Tubala. Gu tamasi poropete tanga. 3Gu hagarongoa renigi na tamasinga iaku tanga, gê vi vikê: Gâka, inê na Araha God, kê merongasigo. 4Inê be ranguigo. Inê be ara i haramu renia na gavi, ma be okebaba henigo henira na mane ni me hato iamu, henira na hosi ni me iamu, henira na mane ni me igê, ga hagesuru bâkoro. Na mane ni me iamu ka rako teha ngavê, ma na ara ni hitangita ki tangaru renigi na bêata ma na tatapa borahu. 5Na me ni Pesia me Etiopia me Libia ka page râ henigo. Ngaira hato ka tangaru renigi na mata ma ka buhigi na bêta renigi na esare ni kapa. 6Ma ka papane henigo nikâ na me ni Gomere me Bete-Togarama, ma rako na me tenigi na agua getigi. 7Gu raha tangara na mane ni me hato ngegana, ma ku nanê. 8I murini na harisi rako inê be bonasigo, hanana gu taharia ta na agua, i oga maninga aporo tenia na hearihatana. Na enoni i ngekana ka bani aporo me tenigi na agua, ga bani totoko surigi, ma ka oga i ngekana igê na ramana surigi na hungani i Isiraele. I nago i Isiraele ki aruhuruhu ma ki hihiruga, ma i ngekê na enoni ka oga suri parongata igê. Igo ko page sugarira. 9Igo henira na mane ni me iamu ma na me i na agua getigi, ga pane henigo, igo ko page taharira manga na roga raha, manga na roto bungibungiha, i buhia na agua hagenani.

10“Inê na Araha God kê vi: Gâka, i na matena ngekana ki page tarahugo igê na katoha, na ani i era. 11Igo ko page katokato, vigo taharia ta na agua, i oga maramarena. Na enoni igê ka oga igê na marapeha ma na ramana. Ngaira ka oga rara so ma, mareha vige oga igê na para. Ngaira ki asa, vige hinahinaru. 12Igo ko page taharira na enoni, ga ogasigi na hinua, ga surungigi aporo, suria i aruhuruhu. Igo ko page hanago tenira ma ko page rurugugi na hinua iata. Igo ko page taharira na enoni, ga bani aporo me tenigi na agua, ga totoko surigi. Ma i ngekê ngaira ka nahunigi na togoha ma na nahuninga getigi, ma ka ogasia na agua i gupuna na maveta, ga bê hetanga igê na tara tanga. 13Na enoni ni Seba me Tatana ma na enoni ni hagavaraha haga surigi na hinua i Sipeni, ngaira ka page hagatego, ka vivi: ‘Tanu hega go hagahakura na mane ni me hato iamu? Igo ko obania vari, vigo hanago ma ko rurugugi na hinua? Igo ko obania vari, vigo hanagogi na siliva ma na golo, na togoha ma na nahuninga, ma ko toregi vê ko migirâ?’

14“Hoi, igo karena enoni ma, râ ku tamasi tanga o Gâka, ma ko tamasi suriê inê na Araha God, ko vi vikê: I ngekê na kariaku na Isiraelita ka takusia vari, vi ngaira ka oga so igê na ramana. Ma igo ko page tavoraha, hanana vigo taharira. 15Igo ko page hura tenia na apanena hagatê iamu. Igo ko page bêngenira na mane ni me gahu tenigi rako na agua getigi. Ngaira hato ka na mane ni me ramo, ga tagirira na hosi ni me. 16Igo ko page sugarira na kariaku na Isiraelita, manga na bagaroga raha i hitaria na agua. I na matena ngekana inê be hagatorangenigo o Gâka, hanana go taharia igê na apanena iaku. Vikana na enoni surigi na agua getigi ka page tahetara reniê, vi o ti kani inê. Ngaira ka page tahetara reniê, vi inê ka na God apuna, suria gê hagabângenia na raramohaku renigo igo.

17“Inê na Araha God kê vi, vi igo nga ka na ani, gê bani takusigo i nago vê, matena gê tamasi i harata na kariaku na poropete ni Isiraele, vi inê kê page hagatorangenia ta na enoni i ta na matena i muri me, hanana vi taharia i Isiraele. Ngaia kani gê visia, inê na Araha God.”

God ki page hagaitangia o Gâka

18Na Araha God ki vi: “Igê na matena o Gâka ki taharia igê i Isiraele, inê kê page mangariaga ngavê. 19Igê na mangariaganiha raha iaku inê kê tohe, vi na apena na baganunu raha ki page tarahua i Isiraele igê na matena nga ngekana. 20Na ara ni manu ma na siare, na ara ni marâ ga mauri, na ani raha ma na ani sisite, ma na ara ni enoni hato i maveta, ngaira hato ka page tatata, suria ga maguteniê. Na hungani ka page maopa. Na tarihu ka page guguru, ma na ara ni para ma na apê ka page ahogehoge. 21Inê be hagamagusia o Gâka renigi na ani mavê na bagabevoani. Ngaia kani gê visia, inê na Araha God. Na mane ni me iana ka page ahurara heri so mareta. 22Inê be hagaitangia renigi na ringa ma na henahuita. Na rangi raha i anumaga ngavê, na gi ma na hê karekare ni sivi ka page vato hurira, ngaia, ma na mane ni me iana, ma na me hato tenigi na agua getigi, ga tamania. 23Inê be hagabângenia vikana tangara na enoni hato i maveta, vi inê kê raramohaga huniê ma kê apuna ngavê. Vikana ngaira ka page tahetara reniê, vi inê ka na Araha.”

Currently Selected:

ESEKIELE 38: KCB

Highlight

Copy

Compare